Ani okpa shi ona akɛ jamɔi babaoo kɛ amɛjwɛŋmɔ maa bɔ ni amɛbaafee amɛná shika babaoo nɔ moŋ fe ni amɛbaaye amɛbua mɛi ni amɛnyɛ amɛjá Nyɔŋmɔ? Amɛtswaa nibii ahe adafi koni ahe, ni kɛ́ amɛtsu jamɔŋ nifeemɔ ko he nii amɛhã mɛi lɛ, amɛheɔ nyɔmɔwoo. Amɛhiɛnyiɛlɔi lɛ babaoo lɛ, awoɔ amɛ nyɔji wujiwuji, ni amɛhiɔ shi akɛ niiatsɛmɛi kpanakpanai. Naa enɛ he nɔkwɛmɔnii fioo komɛi:

•   Atao nii amli ni ana akɛ yɛ afii 13 mli lɛ, Katolik osɔfo ko kɛ sɔlemɔ lɛ shika hai ɛlɔnplein kɛfã gbɛ aaafee shii 150 sɔŋŋ, nakai nɔŋŋ ekɛ sɔlemɔ lɛ shika hai limousine ni ji kar ko ni jara wa waa kɛfã gbɛ aaafee shii 200 sɔŋŋ. No sɛɛ hu lɛ, efite shika miliɔn ohai ejwɛ kɛ sɛɛ kɛsaa sɔlemɔ shĩa ni ewɔɔ mli lɛ.

•   Osɔfo ko ni shiɛɔ yɛ Afrika maŋ ko mli lɛ fɔɔ sɔlemɔ feemɔ, ni kɛ́ eefee sɔlemɔ lɛ mɛi akpei nyɔŋmai abɔ baa. Esɔlemɔtsu lɛ da waa, ni kɛ́ eefee sɔlemɔ lɛ, ehɔɔ nibii srɔtoi babaoo​—ekomɛi ji “miracle oil,” pampam, kɛ atadei ni aŋmala nibii yɛ mli. Eyɛ mli akɛ mɛi ni yaa esɔlemɔ lɛ ateŋ mɛi saŋŋ ji ohiafoi moŋ, shi osɔfo nɛɛ etsɔ niiatsɛ kpanaa.

•   Ayɛ gɔji ejwɛ komɛi yɛ China ni abuɔ amɛ akɛ Buddabii lɛ agɔji krɔŋkrɔŋi ni Buddabii lɛ jáa yɛ jɛmɛ, ni emli enyɔ lɛ, ale amɛ faŋŋ akɛ amɛji nitsumɔhei loo kɔmpenei. Ni Shaolin Temple ni ehe gbɛ́i waa lɛ hu lɛ, akɛtsuɔ jarayeli nitsumɔi srɔtoi​—ni atsɛɔ amɛsɔfonukpa lɛ akɛ nitsumɔ nɔkwɛlɔ kpanaa.”

•   Nɔ ni nitsumɔhei ni yɔɔ Amerika lɛ ekomɛi ebɔi feemɔ waa ji, amɛhaiɔ klamɔi loo mɛi ni tsɛɔ amɛhe ninalɔi kɛhãa amɛnitsulɔi. Amaniɛbɔɔ ko tsɔɔ mli akɛ, amɛfeɔ enɛ koni amɛnitsulɔi lɛ aya mɛi nɛɛ aŋɔɔ kɛhã kusumii komɛi loo gbɛtsɔɔmɔi.

 Te onaa jamɔi ni kɛ jarayeli etsɔ amɛnitsumɔ lɛ ohãa tɛŋŋ? Ani obi ohe pɛŋ akɛ, ‘Te Nyɔŋmɔ naa mɛi ni tsɔɔ jamɔŋ nifeemɔi anɔ amɛyeɔ mɛi ahe shika loo amɛnáa nii lɛ ehãa tɛŋŋ?’

 Nyɔŋmɔ ekpɛlɛɛɛ akɛ akɛ ejamɔ atsɔ jarayeli loo akɛye mɛi ahe shika. Biblia lɛ hãa wɔnaa akɛ, blema lɛ, Yehowa mli fu osɔfoi ni kɛɛ amɛmiisɔmɔ lɛ, shi amɛtsɔɔ nii “yɛ nyɔmɔwoo hewɔ” lɛ. (Mika 3:11) Nyɔŋmɔ wie eshi jarayeli nifeemɔi ni akɛyeɔ mɛi amim, ni hã ejamɔhe lɛ batsɔ “julɔi atɛkplo” lɛ.​—Yeremia 7:11.

 Bɔ ni Nyɔŋmɔ mli fu mɛi ni kɛ jamɔ tsɔ jarayeli loo amɛkɛyeɔ mɛi ahe shika lɛ, nakai nɔŋŋ ni Yesu hu mli fu mɛi ni feɔ nakai lɛ. Be ni Yesu yɔɔ shikpɔŋ nɛɛ nɔ lɛ, jamɔŋ hiɛnyiɛlɔi lɛ ŋmɛɔ jarayelɔi amimyelɔi gbɛ ni amɛbahɔ̃ɔ nii yɛ sɔlemɔ shĩa ni yɔɔ Yerusalem lɛ, ejaakɛ osɔfoi lɛ náa jarayelɔi lɛ ahe sɛɛ. Amɛshishiuɔ mɛi ni baa sɔlemɔ shĩa lɛ koni amɛbajá Yehowa lɛ. Yesu kɛ ekãa shwie jarayelɔi amimyelɔi nɛɛ kɛshi sɔlemɔ shĩa lɛ, ekɛɛ amɛ akɛ: “Nyɛkɛ mi-Tsɛ shĩa lɛ akpaa jarayeli shĩa feemɔ!”​—Yohane 2:14-16.

 Agbɛnɛ hu, Yesu tsɔ bɔ ni etsu esɔɔmɔ nitsumɔ lɛ ehã lɛ nɔ ehã ana Nyɔŋmɔ susumɔ yɛ sane nɛɛ he. (Yohane 8:28, 29) Kɛ́ etsɔɔ mɛi Nyɔŋmɔ he nii lɛ, eheee amɛ shika. Kɛ́ efee naakpɛɛ nii, tamɔ kɛ́ ehã mɛi ni hɔmɔ yeɔ amɛ lɛ niyenii, etsa helatsɛmɛi, ni etee gbohii ashi lɛ, ebiii ni awo lɛ nyɔmɔ. Ebaaa Yesu jwɛŋmɔ mli kɔkɔɔkɔ akɛ ebaatsɔ esɔɔmɔ nitsumɔ lɛ nɔ ená nii babaoo​—no mli lɛ Yesu bɛ lɛ diɛŋtsɛ eshĩa po.​—Luka 9:58.

 Yesu kɛɛ esɛɛnyiɛlɔi lɛ akɛ amɛkatsɔ amɛjamɔ nifeemɔi lɛ anɔ amɛtao shika kɔkɔɔkɔ. Ekɛɛ akɛ: “Yaka nyɛná, yaka nyɛkɛhãa.” (Mateo 10:8) Yesu sɛɛnyiɛlɔi nɛɛ ni sɛɛ mli lɛ abale amɛ akɛ Kristofoi lɛ, kɛ gbɛtsɔɔmɔi ni Yesu kɛhã amɛ lɛ tsu nii. Naa enɛ he nɔkwɛmɔnii fioo komɛi:

•   Bɔfo Petro fata Yesu he kɛtsu esɔɔmɔ nitsumɔ lɛ, ni be ko lɛ, nuu ko ni atsɛɔ lɛ Simon lɛ kɛɛ ebaahã Petro kɛ bɔfoi lɛ shika koni amɛhã ená hegbɛ kɛ hewalɛ kɛfee naakpɛɛ nii. Petro kpoo nɔ ni Simon kɛɛ ebaahã lɛ lɛ oya nɔŋŋ, ni ekɛ shiŋŋfeemɔ jaje lɛ ekɛɛ: “Bo kɛ ojwiɛtɛi lɛ fɛɛ hiɛ akpãtã, ejaakɛ osusuɔ akɛ obaanyɛ okɛ shika ahé Nyɔŋmɔ dromɔ keenii lɛ.”​—Bɔfoi 8:18-20.

•   Ale bɔfo Paulo waa akɛ eji sɔɔlɔ ni fãa gbɛ kɛyasaraa asafoi srɔtoi. Eyɛ mli akɛ ekɛ afii babaoo tsu nii waa yɛ Kristofoi asafoi pii amli moŋ, shi etsɔɔɔ nitsumɔ nɛɛ nɔ eyeee asafoŋbii lɛ ahe shika loo koni etsɔ no nɔ ená nii. Lɛ kɛ enanemɛi Kristofoi lɛ kɛ “Nyɔŋmɔ wiemɔ lɛ yeee jara tamɔ bɔ ni mɛi pii feɔ lɛ.” (2 Korintobii 2:17) Nɔ ni tamɔɔɔ nakai lɛ, Paulo ŋma akɛ: “Be mli ni wɔshiɛɔ Nyɔŋmɔ sane kpakpa lɛ wɔtsɔɔ nyɛ lɛ, wɔtsu nii jenamɔ kɛ jetsɛremɔ koni wɔkɛ jatsu ni jara wa ko akafɔ̃ nyɛteŋ mɔ ko nɔ.”​—1 Tesalonikabii 2:9.

 Yɛ anɔkwale mli lɛ, ehe bahia ni nakai mra be mli Kristofoi lɛ aná shika kɛtsu amɛshiɛmɔ kɛ yelikɛbuamɔ nitsumɔi srɔtoi lɛ ahe nii. Shi kɛ́ amɛtsu amɛjamɔ nifeemɔi lɛ ahe nii loo amɛfee nibii kɛye amɛbua mɛi koni amɛnyɛ amɛjá Nyɔŋmɔ lɛ, amɛhãaa awo he nyɔmɔ. Mɛi ni sumɔɔ akɛ amɛye amɛbua amɛ lɛ jɛɔ amɛsuɔmɔ mli amɛfeɔ nakai, yɛ gbɛtsɔɔmɔi ni nyiɛ sɛɛ nɛɛ anaa:

•   2 Korintobii 8:12: “Ejaakɛ kɛ́ mɔ ko yɛ he suɔmɔ waa lɛ, no lɛ, kɛ́ ejɛ nɔ ni eyɔɔ lɛ mli ehã, shi jeee nɔ ni ebɛ lɛ mli lɛ, esa hiɛ jogbaŋŋ.”

   Nɔ ni etsɔɔ: Yiŋtoo hewɔ ni mɔ ko hãa nɔ ko lɛ he hiaa kwraa fe nii abɔ ni enyɛɔ ehãa.

•   2 Korintobii 9:7: “Mɔ fɛɛ mɔ afee bɔ ni ekpɛ mli yɛ etsui mli, jeee kɛ mligbigbilimɔ loo yɛ nɔnyɛɛ naa, ejaakɛ mɔ ni hãa kɛ miishɛɛ lɛ, lɛ Nyɔŋmɔ sumɔɔ.”

   Nɔ ni etsɔɔ: Nyɔŋmɔ sumɔɔɔ ni mɔ ko anu he akɛ aanyɛ enɔ ni ehã nɔ ko. Kɛ́ mɔ ko jɛ esuɔmɔ mli ehã nɔ ko akɛni eesumɔ ni efee nakai hewɔ lɛ, Nyɔŋmɔ hiɛ sɔɔ waa.

 Biblia lɛ tsɔɔ faŋŋ akɛ, jeee jamɔi fɛɛ Nyɔŋmɔ kpɛlɛɔ nɔ. (Mateo 7:21-23) Yɛ gbalɛ ko ni sa kadimɔ waa lɛ mli lɛ, Biblia lɛ kɛ amale jamɔi fɛɛ to yoo ashawo ko he, ejaakɛ amɛkɛ nɔyelii lɛ feɔ ekome bɔ ni afee ni amɛná shika loo amɛná nibii krokomɛi, ni amɛshishiuɔ mɛi ni yɔɔ jeŋmaji lɛ amli lɛ loo amɛyeɔ amɛhe nii. (Kpojiemɔ 17:1-3; 18:3) Nakai gbalɛ lɛ tee nɔ etsɔɔ akɛ, etsɛŋ Nyɔŋmɔ baakojo amale jamɔi fɛɛ.​—Kpojiemɔ 17:15-17; 18:7.

 Shi dani nakai be lɛ baashɛ lɛ, Nyɔŋmɔ sumɔɔɔ ni amale jamɔi anifeemɔi gbohii lɛ alaka mɛi loo ehã amɛtsi amɛhe kɛje ehe. (Mateo 24:11, 12) Eewo mɛi fɛɛ ni hiɛ tsui kpakpa lɛ hewalɛ koni amɛkase ehe nii ni amɛsɔmɔ lɛ yɛ gbɛ ni saa ehiɛ lɛ nɔ, ni amɛjo foi kɛshi amale jamɔ mli.​—2 Korintobii 6:16, 17.