Hiɛkpamɔ
‘Nyɛkɔa mɛi ni tsɔɔ hemɔkɛyeli kɛ tsuishitoo nɔ náa shiwoi lɛ anane.’—HEBRIBII 6:12.
1, 2. Te nɔkwɛlɔ gbɛfalɔ ko wiemɔ ha ana bɔ ni ebu anɔkwafoi ni atsĩtsĩi amɛ tã yɛ Biblia lɛ mli lɛ eha tɛŋŋ, ni mɛni hewɔ amɛkɛ naanyobɔɔ baahi jogbaŋŋ lɛ?
“EWIEƆ mɛi ni atsĩtsĩi amɛ tã yɛ Biblia lɛ mli lɛ ahe oookɛɛ amɛji enanemɛi ni ekɛje nɔ.” Enɛ ji nɔ ni nyɛmi yoo ko wie beni ebo nɔkwɛlɔ gbɛfalɔ ko ni eda yɛ afiiaŋ lɛ wiemɔ ko ni eha lɛ toi lɛ. Nyɛmi yoo lɛ sane ja, ejaakɛ nyɛmi nuu lɛ kɛ afii nyɔŋmai abɔ ekase Nyɔŋmɔ Wiemɔ lɛ, ni no mli ejɛɔ etsɔɔ nii—aahu akɛ hii kɛ yei ni atsĩtsĩi amɛ tã yɛ Biblia lɛ mli ni jie hemɔkɛyeli kpo lɛ bafee tamɔ amɛji enanemɛi ni ekɛje nɔ, ni ekɛ amɛ ehi shi ewala beaŋ fɛɛ.
2 Ani eŋɔŋ onaa akɛ obaaná mɛi ni atsĩtsĩi amɛ tã yɛ Biblia lɛ mli lɛ ateŋ mɛi komɛi akɛ onanemɛi? Ani onaa amɛ akɛ mɛi ni hi shi diɛŋtsɛ? Feemɔ he mfoniri okwɛ; naa bo ni okɛ amɛ nyiɛ ni nyɛmiigba sane, ni okɛ hii kɛ yei tamɔ Noa, Abraham, Rut, Elia, kɛ Ester miibɔ koni ole amɛ jogbaŋŋ. Susumɔ bɔ ni ekolɛ amɛbaaná oshihilɛ nɔ hewalɛ amɛha—wiemɔi ni sa ni amɛkɛbaawo bo ŋaa kɛ hewalɛ lɛ he okwɛ!—Nyɛkanea Abɛi 13:20.
3. (a) Kɛ́ wɔkase hii kɛ yei anɔkwafoi ni Biblia lɛ tsĩtsĩi amɛ tã lɛ ahe nii lɛ, te wɔbaaná he sɛɛ wɔha tɛŋŋ? (b) Mɛɛ sanebimɔi wɔbaasusu he?
3 Ekã shi faŋŋ akɛ, kɛ́ ‘atee jalɔi ni egboi lɛ ashi lɛ,’ nakai naanyobɔɔ ni yɔɔ miishɛɛ lɛ baanyɛ aba mli diɛŋtsɛ. (Bɔf. 24:15) Kɛlɛ, amrɔ nɛɛ po lɛ, kɛ́ wɔkase hii kɛ yei anɔkwafoi ni atsĩtsĩi amɛ tã yɛ Biblia lɛ mli lɛ ahe nii lɛ, wɔbaanyɛ wɔná he sɛɛ. Mɛɛ gbɛ nɔ? Bɔfo Paulo kɛ hetoo ni sa nɛɛ haa: ‘Nyɛkɔa mɛi ni tsɔɔ hemɔkɛyeli kɛ tsuishitoo nɔ náa shiwoi lɛ anane.’ (Heb. 6:12) Beni wɔjeɔ hii kɛ yei anɔkwafoi nɛɛ ahe saji akasemɔ shishi lɛ, ha wɔsusu sanebimɔi fioo komɛi ni Paulo sane nɛɛ kɛbaa wɔjwɛŋmɔŋ lɛ ahe wɔkwɛ: Mɛni kwraa ji hemɔkɛyeli, ni mɛni hewɔ esa akɛ wɔná eko lɛ? Mɛɛ gbɛ nɔ wɔbaatsɔ wɔkase anɔkwafoi ni Biblia lɛ tsĩtsĩi amɛ tã lɛ?
Hemɔkɛyeli—Nɔ ni Eji kɛ Nɔ Hewɔ ni Esa Akɛ Wɔná Eko
4. Mɛɛ susumɔ mɛi komɛi hiɛ yɛ hemɔkɛyeli he, ni mɛni hewɔ amɛsusumɔ lɛ ejaaa?
4 Hemɔkɛyeli ji su kpakpa ko ni sa waa, eji su ko ni hii kɛ yei ni wɔbaakase amɛhe nii yɛ wolo nɛɛ mli lɛ fɛɛ ha ekã amɛtsui nɔ waa. Mɛi babaoo yɛ ŋmɛnɛ ni amɛbuuu hemɔkɛyeli akɛ eji nɔ ko ni he hiaa tsɔ, amɛsusuɔ akɛ eji nɔ ko ni aheɔ ayeɔ kɛkɛ ni abɛ nɔdaamɔnɔ loo odaseyeli ko ni akɛbaafi sɛɛ. Kɛlɛ, amɛsusumɔ lɛ ejaaa. Hemɔkɛyeli jeee nɔ ko ni baa trukaa; ejeee henumɔ flo ko kɛkɛ; eyaa shɔŋŋ kwraa fe nɔ ko ni aheɔ ayeɔ kɛkɛ. Nɔ ko ni baa trukaa kɛkɛ lɛ yɛ oshara. Henumɔ ko kɛkɛ baanyɛ aba ni eya, ni kɛ́ ebalɛ Nyɔŋmɔjamɔ gbɛfaŋ lɛ, efaaa akɛ abaahe nɔ ko aye kɛkɛ, ejaakɛ “mumɔi fɔ̃ɔji [loo daimonioi] hu heɔ yeɔ, ni amɛhe kpokpoɔ.”—Yak. 2:19, Ga Biblia hee.
5, 6. (a) Mɛɛ nibii enyɔ ni anaaa lɛ anɔ wɔhemɔkɛyeli lɛ damɔ? (b) Te esa akɛ wɔhemɔkɛyeli lɛ mli awa aha tɛŋŋ? Ha nɔkwɛmɔnɔ.
5 Anɔkwa hemɔkɛyeli yaa shɔŋŋ kwraa fe nɔ ko ni aheɔ ayeɔ kɛkɛ. Kadimɔ bɔ ni Biblia lɛ tsɔɔ hemɔkɛyeli shishi ehaa lɛ. (Nyɛkanea Hebribii 11:1.) Paulo wie akɛ, hemɔkɛyeli damɔ nibii srɔtoi enyɔ ni wɔnyɛɛɛ wɔna lɛ anɔ. Klɛŋklɛŋ lɛ, edamɔ amrɔ nɛɛ nibii ni yɔɔ “ni anaaa” lɛ anɔ. Wɔnyɛŋ wɔkɛ wɔhiŋmɛi diɛŋtsɛ ana nibii ni yaa nɔ yɛ ŋwɛiniiaŋ—tamɔ Yehowa Nyɔŋmɔ, e-Bi lɛ, loo Maŋtsɛyeli ni yeɔ nɔ yɛ ŋwɛi amrɔ nɛɛ lɛ. Nɔ ni ji enyɔ lɛ, hemɔkɛyeli damɔ “nii ni mɛi ahiɛ kã nɔ” lɛ anɔ—nibii ni kpaako amɛbaaba lɛ. Wɔnaaa jeŋ hee ni etsɛŋ ni Nyɔŋmɔ Maŋtsɛyeli lɛ kɛbaaba lɛ amrɔ nɛɛ. Ani no tsɔɔ akɛ hemɔkɛyeli ni wɔyɔɔ yɛ nakai nibii ni yɔɔ diɛŋtsɛ lɛ amli, kɛ nibii ni wɔhiɛ kã nɔ akɛ amɛbaaba lɛ bɛ nɔdaamɔnɔ ko kwraa?
6 Jeee nakai kwraa! Paulo tsɔɔ mli akɛ, anɔkwa hemɔkɛyeli yɛ nɔdaamɔnɔ ni yɔɔ shiŋŋ diɛŋtsɛ. Beni etsɛ hemɔkɛyeli akɛ ‘nii anɔ nɔmimaa’ lɛ, ekɛ wiemɔ ko tsu nii ni abaanyɛ atsɔɔ shishi hu akɛ “mla naa wolo ni maa nɔ ko nɔ mi akɛ eji mɔ ko nɔ̃.” Ŋɔɔ lɛ akɛ mɔ ko ekpɛlɛ akɛ ebaaha bo shĩa. Ebaanyɛ ekɛ mla naa wolo ni kã shĩa lɛ nɔ lɛ aha bo ni ekɛɛ akɛ, “Oshĩa hee lɛ nɛ.” Anɔkwa, nɔ ni efee lɛ etsɔɔɔ akɛ eekɛɛ bo akɛ obaahi nakai wolo bibioo ni ekɛha bo lɛ nɔ; moŋ lɛ nɔ ni etsɔɔ ji akɛ, wolo lɛ yɛ mla naa sɛɛfimɔ aahu akɛ, yɛ shishinumɔ ko naa lɛ, etamɔ nɔ ni wolo lɛ ji shĩa lɛ diɛŋtsɛ. Nakai nɔŋŋ nibii ni tsɔɔ akɛ wɔyɛ hemɔkɛyeli lɛ yɛ faŋŋ diɛŋtsɛ, ni emli wa aahu akɛ abaanyɛ akɛto wɔhemɔkɛyeli lɛ diɛŋtsɛ he.
7. Mɛni anɔkwa hemɔkɛyeli biɔ?
7 No hewɔ lɛ, anɔkwa hemɔkɛyeli damɔ hekɛnɔfɔ̃ɔ ni yɔɔ nɔdaamɔnɔ diɛŋtsɛ, kɛ hekɛnɔfɔ̃ɔ ni yɔɔ shiŋŋ ni ayɔɔ yɛ Yehowa Nyɔŋmɔ mli lɛ nɔ. Hemɔkɛyeli haa wɔnaa Nyɔŋmɔ akɛ wɔsuɔmɔ Tsɛ, ni ehaa wɔkɛ wɔhe fɔ̃ɔ eshiwoi fɛɛ anɔ akɛ, kɛ́ ŋshɔ ŋala tete, amɛbaaba mli. Shi hemɔkɛyeli krɔŋŋ biɔ babaoo fe nakai. Taakɛ eji yɛ nibii ni wala yɔɔ amɛmli agbɛfaŋ lɛ, esa akɛ alɛ lɛ koni eya nɔ ehi shi. Esa akɛ ajie lɛ kpo yɛ nifeemɔi amli kɛ́ jeee nakai lɛ, ebaagbo.—Yak. 2:26.
8. Mɛni hewɔ hemɔkɛyeli he hiaa waa nakai lɛ?
8 Mɛni hewɔ hemɔkɛyeli he hiaa waa nakai lɛ? Paulo kɛ sane nɛɛ hetoo ni kɔneɔ mɔ yiŋ jogbaŋŋ ha. (Nyɛkanea Hebribii 11:6.) Wɔnyɛŋ wɔbɛŋkɛ Yehowa loo wɔsa ehiɛ, ja wɔyɛ hemɔkɛyeli. No hewɔ lɛ, ehe miihia ni wɔná hemɔkɛyeli dani wɔbaanyɛ wɔshɛ taomɔnii ni he hiaa waa, ni akpaa gbɛ yɛ adebɔɔ nii fɛɛ ni le nii lɛ adɛŋ lɛ he: ni ji wɔtsĩ wɔbɛŋkɛ wɔŋwɛi Tsɛ Yehowa, ni wɔwo ehiɛ nyam.
9. Mɛni Yehowa efee kɛtsɔɔ akɛ ele akɛ hemɔkɛyeli he miihia wɔ?
9 Yehowa le bɔ ni hemɔkɛyeli he hiaa wɔ ha, no hewɔ lɛ, ekɛ nɔkwɛmɔnii haa wɔ kɛtsɔɔ bɔ ni wɔbaafee wɔtswa wɔhemɔkɛyeli wɔma shi, ni wɔjie lɛ kpo hu. Ekɛ hii ni feɔ hemɔkɛyeli he nɔkwɛmɔnɔ kpakpa ni nyiɛɔ hiɛ lɛ duroɔ Kristofoi asafo lɛ. Nyɔŋmɔ Wiemɔ lɛ kɛɔ akɛ: “Nyɛkasea amɛhemɔkɛyeli lɛ.” (Heb. 13:7) Ni eha wɔ mɛi krokomɛi hu ni wɔbaanyɛ wɔkase amɛhemɔkɛyeli lɛ. Paulo ŋma “odasefoi babaoo,” ni ji hii kɛ yei ni hi shi yɛ blema beaŋ ni fee hemɔkɛyeli ni sa kadimɔ waa he nɔkwɛmɔnii lɛ ahe saji. (Heb. 12:1) Ekã shi faŋŋ akɛ, jeee anɔkwafoi lɛ fɛɛ Paulo tsĩ amɛ tã yɛ Hebribii yitso 11 lɛ mli. Biblia lɛ mli eyi obɔ kɛ hii kɛ yei, gbekɛbii kɛ onukpai ni jɛ shihilɛi srɔtoi amli ni hiɛ amɛhemɔkɛyeli mli lɛ ahe saji; amɛhe saji lɛ baanyɛ atsɔɔ wɔ nibii babaoo yɛ wɔbe ni hemɔkɛyeli he esɛ̃ nɛɛ mli.
Te Wɔbaafee Tɛŋŋ Wɔkase Mɛi Krokomɛi Ahemɔkɛyeli Lɛ?
10. Mɛɛ gbɛ nɔ kɛ́ wɔtsɔ wɔfee aŋkro nikasemɔ lɛ, ebaaye ebua wɔ ni wɔkase hii kɛ yei anɔkwafoi ni Biblia lɛ tsĩ amɛ tã lɛ ahemɔkɛyeli lɛ?
10 Onyɛŋ okase mɔ ko, ja okpa mɔ lɛ shi jogbaŋŋ okwɛ daŋ. Beni okaneɔ wolo nɛɛ, obaayɔse akɛ atao nibii amli jogbaŋŋ bɔni afee ni eye ebua bo koni onyɛ ole hii kɛ yei anɔkwafoi nɛɛ jogbaŋŋ. Mɛni hewɔ bo hu ofeee nakai kɛtao hii kɛ yei anɔkwafoi nɛɛ ahe saji krokomɛi ofata enɛ he? Kɛ́ oofee aŋkro nikasemɔ lɛ, okɛ woji kɛ nibii krokomɛi ni oyɔɔ ni akɛfeɔ niiamlitaomɔ lɛ apɛi Biblia lɛ mli. Beni ojwɛŋɔ nɔ ni okaseɔ lɛ nɔ lɛ, bɔɔ mɔdɛŋ ni ofee he ni shihilɛ lɛ tee nɔ yɛ, kɛ nɔ ni ba ni Biblia lɛ bɔ he amaniɛ lɛ he mfoniri okwɛ. Bɔɔ mɔdɛŋ ni ona nibii ni yaa nɔ lɛ, onu gbɛɛmɔi lɛ, ni onu nibii ahe ŋma, tamɔ oyɛ jɛmɛ. Nɔ ni he hiaa fe fɛɛ lɛ, bɔɔ mɔdɛŋ ni oyɔse henumɔi ni mɛi ni awieɔ amɛhe lɛ jieɔ lɛ kpo lɛ. Beni okɛ ohe woɔ hii kɛ yei anɔkwafoi nɛɛ ashihilɛ mli lɛ, ebaafee tamɔ nɔ ni oona amɛ diɛŋtsɛ, obaale amɛ jogbaŋŋ—amɛteaŋ mɛi komɛi po baatsɔmɔ tamɔ onanemɛi ni okɛ amɛ je nɔ.
11, 12. (a) Te obaafee tɛŋŋ onu he akɛ okɛ Abram kɛ Sarai ebɔ kpaakpa lɛ? (b) Te obaafee tɛŋŋ oná Hana, Elia, kɛ Samuel nɔkwɛmɔnɔ lɛ he sɛɛ lɛ?
11 Kɛ́ obale amɛ jogbaŋŋ lɛ, obaasumɔ ni okase amɛ. Ákɛ nɔkwɛmɔnɔ lɛ, ŋɔɔ lɛ akɛ ooshwie oyiŋ yɛ nitsumɔ hee ko ni akɛwo odɛŋ lɛ he. Kɛtsɔ Yehowa gbɛjianɔtoo lɛ nɔ lɛ, afɔ̃ bo nine koni olɛɛ osɔɔmɔ nitsumɔ lɛ mli yɛ gbɛ ko nɔ. Ekolɛ, abi koni oshi kɛya he ko ni shiɛlɔi ahe ehia waa yɛ, loo akɛɛ obɔ mɔdɛŋ koni oka shiɛmɔ gbɛ ko ni oleee, loo onyaaa he lɛ okwɛ. Beni oshwieɔ oyiŋ yɛ nitsumɔ nɛɛ he, ni osɔleɔ yɛ he lɛ, ani Abram nɔkwɛmɔnɔ lɛ nɔjwɛŋmɔ yeŋ ebuaŋ bo? Ekɛ Sarai fɛɛ sumɔ koni amɛŋmɛɛ nibii ni haa shihilɛ feɔ ogbɔjɔ yɛ Ur lɛ he, ni no ha Yehowa jɔɔ amɛ babaoo. Kɛ́ okɔ amɛnane lɛ, ekã shi faŋŋ akɛ obaanu he akɛ oná ole amɛ jogbaŋŋ fe tsutsu lɛ.
12 Ni kɛ́ mɔ ko ni bɛŋkɛ bo kpaakpa lɛ kɛ bo ye kɛ joomɔ, ni no ha onijiaŋ je wui—ni onu he po akɛ ota shĩa ni okaya asafoŋ kpee hu? Kɛ́ osusu Hana nɔkwɛmɔnɔ lɛ, kɛ bɔ ni eye Penina subaŋ gbonyo lɛ nɔ lɛ he lɛ, ebaaye ebua bo koni okpɛ yiŋ ni ja—ni ebaanyɛ eha ona Hana tamɔ onaanyo kpaakpa hu. Nakai nɔŋŋ kɛ́ onu he akɛ osaaa, ni no ha onijiaŋ je wui lɛ, beni okaseɔ shihilɛ ni Elia tsɔ mli kɛ bɔ ni Yehowa shɛje emii lɛ he nii lɛ, obaanu he tamɔ okpɛtɛ Elia kpaakpa. Ni yɛ oblahii kɛ oblayei ni miiya skul, ni amɛskulbii jeŋbatsɛmɛi lɛ nyɛɔ amɛnɔ koni amɛfee nibii gbohii lɛ agbɛfaŋ lɛ, kɛ́ amɛkase bɔ ni Samuel fee enii eha yɛ Eli bihii lɛ ajeŋba ni ekpɔtɔ yɛ sɔlemɔwe lɛ ahe nii lɛ, amɛbaanu he tamɔ amɛkpɛtɛ Samuel kpaakpa.
13. Kɛ́ okase mɔ ko ni atsĩ etã yɛ Biblia lɛ mli lɛ hemɔkɛyeli lɛ, ani no tsɔɔ akɛ ohemɔkɛyeli lɛ baa shi? Tsɔɔmɔ mli.
13 Ani anɔkwa ni eji akɛ ookase nɔ ni mɛi komɛi fee kɛjie hemɔkɛyeli kpo lɛ tsɔɔ akɛ ohemɔkɛyeli lɛ baa shi fe amɛnɔ̃ lɛ yɛ Yehowa hiɛ? Dabi kwraa! Kaimɔ akɛ, Yehowa Wiemɔ lɛ woɔ wɔ hewalɛ koni wɔkase hemɔkɛyeli mlihiɛlɔi. (1 Kor. 4:16; 11:1; 2 Tes. 3:7, 9) Kɛfata he lɛ, mɛi ni wɔbaakase amɛhe nii yɛ wolo nɛɛ mli lɛ diɛŋtsɛ po kase anɔkwafoi ni tsɔ amɛhiɛ lɛ. Ákɛ nɔkwɛmɔnɔ lɛ, wɔkadiɔ yɛ wolo nɛɛ Yitso 17 lɛ mli akɛ, beni Maria wieɔ lɛ, eyɛ faŋŋ akɛ etsɛ Hana wiemɔi ayisɛɛ, ni no maa nɔ mi akɛ ena lɛ akɛ mɔ ko ni esa akɛ ekase lɛ. Ani no ha Maria fee mɔ ko ni hemɔkɛyeli mli waaa? Kɔkɔɔkɔ! No najiaŋ lɛ, Hana nɔkwɛmɔnɔ lɛ ye ebua Maria koni etswa ehemɔkɛyeli lɛ ema shi, bɔni afee ni lɛ hu efee gbɛ́i kpakpa yɛ Yehowa Nyɔŋmɔ hiɛ.
14, 15. Mɛɛ nibii komɛi yɔɔ wolo nɛɛ mli, ni mɛɛ gbɛ nɔ wɔkɛbaatsu nii jogbaŋŋ?
14 Afee wolo nɛɛ bɔ ni ebaaye ebua bo koni owaje ohemɔkɛyeli lɛ. Ajie yitsei ni nyiɛ sɛɛ nɛɛ kɛjɛ saji ni aŋmala yɛ Buu-Mɔɔ ni akala kɛjɛ afi 2008 kɛyashi afi 2013 ni hiɛ saneyitso akɛ “Kasemɔ Amɛhemɔkɛyeli Lɛ” mli lɛ amli. Kɛlɛ, akɛ nibii heei komɛi efata he. Yitso fɛɛ yitso hiɛ sanebimɔi ni baaye ebua wɔ kɛsusu nii ahe, koni wɔkɛ nɔ ni wɔbaakase lɛ atsu nii. Afee mfonirii fɛfɛji babaoo kɛ akrabatsai awo wolo nɛɛ mli, ni afee mfonirii memeji ni yɔɔ lɛ hu ehee, ni aha edara fe tsutsu lɛ. Akɛ nibii komɛi ni yeɔ ebuaa, tamɔ shikpɔŋ shikamɔ he wolo (map) kɛ akrabatsa ni tsɔɔ be ni mɛi komɛi kɛhi shi lɛ hu efata he. Aje gbɛ afee Kasemɔ Amɛhemɔkɛyeli Lɛ wolo nɛɛ kɛha aŋkro nikasemɔ, weku jamɔ, kɛ asafoŋ nikasemɔ. Yɛ wekui komɛi amli hu lɛ, amɛbaasumɔ ni amɛfee ekome kɛkane emli saji lɛ ni amɛbo toi.
15 Wɔgbɛkpamɔ ji akɛ wolo nɛɛ baaye abua bo koni okase Yehowa tsuji anɔkwafoi ni hi shi yɛ blema lɛ ahemɔkɛyeli lɛ. Ni eye ebua bo hu koni ohemɔkɛyeli lɛ mli awa beni otsiɔ obɛŋkɛɔ oŋwɛi Tsɛ, Yehowa kpaakpa lɛ!
