Gbalashihilɛ hãa anáa weku hee. Eyɛ mli akɛ esa akɛ osumɔ ofɔlɔi ni obu amɛ be fɛɛ be moŋ, shi amrɔ nɛɛ ohefatalɔ lɛ ji mɔ ni he hiaa bo fe fɛɛ yɛ shikpɔŋ lɛ nɔ. Ekolɛ ebaawa kɛhã owekumɛi lɛ ekomɛi akɛ amɛaakpɛlɛ anɔkwa sane nɛɛ nɔ. Shi Biblia mli shishitoo mlai baanyɛ aye abua bo ni oŋmɛ pɛpɛɛpɛ, bɔ ni afee ni toiŋjɔlɛ ahi okɛ owekumɛi lɛ ateŋ be mli ni obɔɔ mɔdɛŋ koni owaje ogbalashihilɛ lɛ.

NƆ NI BIBLIA LƐ KƐƆ: “Wo otsɛ kɛ onyɛ.” (Efesobii 6:2) Kɛ́ oda jio, odako jio, esa akɛ okɛ woo ahã ofɔlɔi ni obu amɛ be fɛɛ be. Ná ole akɛ ohefatalɔ lɛ hu yɛ fɔlɔi, ni akɛni amɛbi ji lɛ hewɔ lɛ, esa akɛ ená deka ehã amɛ. “Suɔmɔ yeee awuŋa,” no hewɔ lɛ, kaanu he kɔkɔɔkɔ akɛ ohefatalɔ lɛ fɔlɔi lɛ baahé etsui.​—1 Korintobii 13:4, NW; Galatabii 5:26.

NƆ NI OBAANYƐ OFEE:

• Kaawo saji ahe, ní owie wiemɔi tamɔ “Be fɛɛ be lɛ, owekumɛi lɛ miiwie mihe sane fɔŋ” loo “Nɔ ko nɔ ko bɛ ni mifeɔ ni omami nyaa he”

• Bɔɔ mɔdɛŋ ni ona ohefatalɔ lɛ wekumɛi lɛ tamɔ bɔ ni enaa amɛ lɛ

NƆ NI BIBLIA LƐ KƐƆ: “Nuu aaashi etsɛ kɛ enyɛ, ni eeekpɛtɛ eŋa he, ni amɛaatsɔ̃ heloo kome.” (1 Mose 2:24) Kɛ́ obote gbalashihilɛ mli lɛ, ekolɛ ofɔlɔi baanu he akɛ oyɛ amɛshishi lolo, ni ekolɛ amɛbaasumɔ ni amɛkɛ amɛhe awo ogbalashihilɛ mli saji amli fe bɔ ni esa akɛ amɛfee.

Esa akɛ okɛ ohefatalɔ lɛ akpɛ yiŋ yɛ saji ni nyɛbaasumɔ ni amɛkɛ amɛhe awo mli kɛ nɔ ni nyɛsumɔŋ ni amɛkɛ amɛhe awo mli lɛ he, koni no sɛɛ lɛ, nyɛkɛ mlihilɛ ahã amɛle. Nyɛbaanyɛ nyɛjɛ bulɛ mli nyɛkɛ amɛ awie ni nyɛshiuuu nɔ ko nɔ. (Abɛi 15:1) Heshibaa, mlijɔlɛ, kɛ tsuishitoo baaye abua bo koni naanyobɔɔ kpakpa ahi okɛ owekumɛi lɛ ateŋ, ni nyɛya nɔ ‘nyɛhiɛhiɛ nyɛhe yɛ suɔmɔ mli.’​—Efesobii 4:2.

NƆ NI OBAANYƐ OFEE:

• Kɛ́ eegba onaa akɛ wekumɛi kɛ amɛhe miiwo nyɛsaji amli bɔ ni esaaa lɛ, okɛ ohefatalɔ lɛ asusu he be ni nyɛteŋ mɔ ko mli fuko

• Nyɛfea ekome kɛkpɛa yiŋ yɛ bɔ ni nyɛbaatsu saji nɛɛ ahe nii nyɛhã lɛ he