YOMARA ké so dé frè Marcelo ké Hiver ka rété annan roun ti vilaj o Gwatémala. Yomara koumansé étidyé Labib-a ké Témwen-yan é so frè-ya vini apré. Mé i té gen roun problèm : yé toulétrwa pa ka wè é yé pyès pa té ka li bray. Donk pannan léson-an, frè-a ki té ka étidyé ké yé té divèt li ni léson-an ni vèrsé-ya.

Alé annan réinyon asanblé-a, a té rounòt problèm ankò. Yé té pou maché 40 minit pou alé annan sal di Rwayonm-an ki té pi pròch di yé kaz é yé pa té pouvé alé yé rounso. Donk, frè-ya annan asanblé-a pran dispozisyon pou mennen yé annan chak réinyon. É lò Yomara ké so dé frè koumansé fè sijè, plizyèr frè ké sò idé yé anprann yé sijè.

An mé 2019, yé koumansé fè réinyon annan yé vilaj. Roun ti moso tan anvan, roun frè ké so madanm, toulédé pyonyé pèrmanan, té déménajé annan yé vilaj. Menm si yé pa té konnèt li bray, yé désidé ki yé té ké anprann sa trwa jennjan-yan li bray. Donk, yé alé annan roun bibliyotèk pou pran déztrwa enfòrmasyon asou bray-a épi asou fason pou anprann moun li bray.

Apré déztrwa mwa, Yomara, Marcelo ké Hiver té ka li bray fasilman é sa idé yé fè progrè annan domenn èspirityèl. Jòdla, yé toulétrwa pyonyé pèrmanan é Marcelo asistan. Pannan tout simenn-an, a ké tchò kontan yé ka fè bagaj pou Jéova. Yé lajwa ka détenn asou ròt-ya !

Yomara, Marcelo ké Hiver ka di yé asanblé mèrsi pou tousa yé fè ké bokou lanmou pou idé yé. Yomara ka di : « Dipi prémyé fwa nou kontré ké Témwen-yan, yé montré nou a kisa ki vré lanmou krétyen-an. » Marcelo ka di dèyè sa : « Annan asanblé-a, nou gen bon zanmi menm, é nou tchò kontan paské nou ka fè parti di sa fanmi-a ki asou tout latè-a é ki ka rété ansanm ansanm gras a lanmou. » Yomara ké so frè présé wè jou-a koté yé ké pouvé wè, ké yé pròp wéy, latè-a divini roun paradi (Ps. 37:10, 11 ; Is. 35:5).