Nou osi, i gen roun gro « tanpèt » ka vini asou nou. Jézi aplé l’ « gran tribilasyon-an » (Matthieu 24:21). Nou pa pouvé alé pyès koté pou évité sa tribilasyon-an. Parkont, nou pouvé protéjé nou kò. Kisa nou divèt fè ?

Annan so sèrmon asou montangn-an, Jézi bay sa konsèy-a : « Kontinyé chaché Rwayonm-an ké lajistis Bondjé an prémyé » (Matthieu 6:33). Kouman nou pouvé swiv sa konsèy-a ?

Chaché rwayonm Bondjé-a an prémyé. Sa lé di ki a rwayonm Bondjé-a ki divèt pi enpòrtan pou nou pasé ròt bagaj (Matthieu 6:25, 32, 33). Poukisa nou divèt wè sa konsa ? Paské moun-yan pa pouvé réglé problèm ki asou latè-a pyès. A rwayonm Bondjé-a rounso ki ké pouvé fè sa gro travay-a.

Chaché lajistis Bondjé. Nou divèt fè tousa nou pouvé pou rèspèkté lalwa ké prensip jis ki Bondjé bay nou. Poukisa ? Paské lò nou ka désidé pou nou menm sa ki bon ké sa ki mové, a problèm ki ka vin dèyè (Proverbes 16:25). Parkont, lò nou ka viv sélon règ Bondjé, nou ka fè li plézi, é anplis di sa nou ka jwenn gran bénédiksyon (Isaïe 48:17, 18).

Kontinyé chaché Rwayonm-an ké lajistis Bondjé an prémyé. Jézi di ki i té ké gen roun ran moun ki té ké bliyé ki sa enpòrtan. Pou yé, yé ké an sékirité si yé ka ranmasé tout  soumaké yé pouvé ranmasé. Rounòt ran té ké lésé traka lavi-a pran tout yé tan ké yé fòrs, é yé pa menm té ké gen tan pou « chaché » rwayonm Bondjé-a (Matthieu 6:19-21, 25-32).

Mé, Jézi promèt ki sa-ya ki ka soutni rwayonm Bondjé-a ké rousouvwè jòdla menm sa yé bézwen pou viv, épi roun patché bénédiksyon pou dimen (Matthieu 6:33).

Menm si disip Jézi annan 1^é syèk-a té chaché Rwayonm-an ké lajistis Bondjé an prémyé, yé pa wè malò ké soufrans disparèt annan yé lépòk. Parkont, yé rousouvwè protèksyon. Kouman ?

Yé té ka rèspèkté prensip jis di Bondjé, é sa té ka protéjé yé kont difikilté moun-yan té ka trapé lò yé pa té ka kouté Bondjé. Anplis di sa, yé té sèrten ki rwayonm-an té ké vini, é sa idé-yé sipòrté éprèv-ya, menm sa-ya ki té pi rèd. Épi, Bondjé té ka bay yé « pwisans ki ka dépasé pwisans ki nòrmal-a » pou yé té pouvé andiré éprèv-ya (2 Corinthiens 4:7-9).

Krétyen annan 1^é syèk-a obéyi lòrd Jézi : yé chaché Rwayonm-an an prémyé. Yé préché bon nouvèl Rwayonm-an toupatou koté yé té ka viv (Colossiens 1:23). Ès i gen moun ki ka fè sa jòdla ?

Wi ! Témwen Jéova-ya savé ki i pa ka rété bokou tan anvan rwayonm Bondjé-a fini ké sa monn-an. Donk yé ka fè tousa yé pouvé pou fè sa Jézi doumandé yé fè : « Sa bon nouvèl di Rwayonm-an ké préché asou tout latè-a pou bay tout nasyon-yan témwanyaj, é la, lafen-an ké rivé » (Matthieu 24:14).

Kouman ou ké réyaji a sa bon nouvèl-a ? Nou vréman ka ankourajé ou imité moun ki viv annan 1^é syèk-a : Moun ki té ka viv Béré, roun vil di Masédwann. Lò apot Pòl palé yé di bon nouvèl Rwayonm-an, yé asèpté so mésaj « ké tout yé tchò ». Épi yé ‘byen gadé Ékritir-ya’ pou vérifyé si tousa yé té tandé té vré. Apré sa, yé apliké tousa yé té anprann (Actes 17:11, 12).

Ou pouvé fè kou yé. Si ou ka chaché Rwayonm-an ké lajistis Bondjé an prémyé, ou ké trapé roun protèksyon dipi aprézan, é dimen ou ké jwenn lapè ké sékirité pou tout-tan.