Jézi di : « Roun nasyon ké lévé kont rounòt nasyon, roun rwayonm kont rounòt rwayonm. I ké gen gran tranblémandétèr é roun koté aprè ròt lafamin ké épidémi » (Luc 21:10, 11). Lò nou ka mété yé ansanm, tout sa lévènman-yan ka bay rounsèl sign. É a sa sign-an ki té ké pèrmèt konprann ki « rwayonm Bondjé-a pròch ». Ès nou ka wè sa lévènman-yan rivé an menm tan é asou tout latè-a ? Annou gadé sa.

1. LAGÈR

An 1914 roun lagèr pété, roun kalité lagèr ki pyès moun pa té janmen wè anvan. Èspésyalis-ya souvan ka di ki 1914 chanjé bokou bagaj annan Istwè-a, paské sa lannen-an, a té prémyé fwa yé té ka wè roun lagèr fèt toupatou asou latè-a an menm tan. Mitrayèt, avyon ki ka largé bonm, gaz ka tchwé moun, char... Moun-yan pa té janmen sèrvi otan ké sa kalité zarm ki ka tchwé moun. Apré sa, dézyèm lagèr mondyal-a pété, é sa kou-a yé sèrvi ké bonm atomik-a pou prémyé fwa. É dipi 1914, i toujou gen roun lagèr roun koté annan monn-an. Sa lagèr-ya ja tchwé milyon moun.

2. TRANBLÉMANDÉTÈR

Liv Britannica Academic ka di ki chak lannen nou ka konté apéprè san tranblémandétèr ki asé fò pou fè « gro déga ». Biro étid jéolojik Étazini ka di ki « dapré enfòrmasyon yé pran asou plizyèr lannen (dipi lannen 1900 apéprè), a pou prévwè apéprè 16 gro tranblémandétèr chak lannen ». Sèrten moun ka di ki si nou gen lenprésyon i gen plis tranblémandétèr, a paské nou pouvé savé pi byen kitan yé ké rivé. Antouka, gran tranblémandétèr ka mennen soufrans ké lanmò kou nou pa té janmen wè anvan.

 3. LAFAMIN

Annan bokou koté asou latè-a, i pa gen asé manjé paské i gen lagèr, moun-yan malonèt, i gen problèm soumaké, moun-yan pa ka byen distribiyé prodwi latè-a, ouben paské moun-yan pa djè savé kisa pou yé fè lò i gen katastròf akoz di klima ki ka chanjé. Òrganizasyon entèrnasyonal-a ki ka distribiyé manjé pou péyi pov té ka di annan so rapòr pou lannen 2018 : « Annan monn-an, 821 milyon moun pa ka manjé asé, 124 milyon moun annan yé pa ka manjé menm » (The World Food Programme’s “2018 Year in Review”). Chak lannen, 3,1 milyon timoun ka mouri paské yé pa gen asé manjé. An 2011, 45 % timoun ki mouri annan monn-an mouri paské yé pa té gen asé manjé.

4. MALADI KÉ ÉPIDÉMI

Roun piblikasyon di Òrganizasyon mondyal di lasanté ka di : « 21^èm syèk-a ja wè so gran épidémi. Nou ka wè ansyen maladi ka viré (koléra, lapès ké lafyèv jonn), é nouvo maladi ka parèt (SRAS, lagrip pandémik, MERS, Ébola ké Zika). » Dèrnyé-a, a pandémi Covid-19-a. Menm si lasyans ké lamèdsin fè gro progrè, yé pa ka rivé trouvé médikaman pou tout sa maladi-ya.

5. MOUN KA PRÉCHÉ ASOU TOUT LATÈ-A

Jézi palé di rounòt parti di sign-an lò i di : « É sa bon nouvèl di Rwayonm-an ké préché asou tout latè-a pou bay tout nasyon-yan témwanyaj, é la, lafen-an ké rivé » (Matthieu 24:14). Toupannan i gen gro problèm toupatou asou latè-a, i gen plis ki wit milyon moun di tout nasyon ki ka préché bon nouvèl rwayonm Bondjé-a annan 240 péyi, é annan plis ki 1 000 lang. A roun bagaj nou pa té janmen wè !

Diféran parti sign Jézi té bay-a ka réyalizé annan nou lépòk. Poukisa sa divèt entérésé nou ? Paské Jézi di : « Lò zòt ké wè sa bagaj-ya rivé, savé ki rwayonm Bondjé-a pròch » (Luc 21:31).

Lò nou ka byen gadé sign Jézi bay-a, é lò nou ka kalkilé gras a sa Labib-a ka di, nou ka konprann ki rwayonm Bondjé-a koumansé dirijé annan syèl-a an 1914 a. A sa moman-an, Bondjé fè so pitit, Jézi Kris, divini rwa (Psaume 2:2, 4, 6-9). Titalò, rwayonm Bondjé-a ké dirijé monn-an. I ké tiré tout ròt dominasyon é i ké fè latè-a divini roun paradi koté moun-yan ké viv pou tout-tan.

Roun ti moso tan ankò, é nou ké pouvé wè réyalizasyon sa paròl-ya ki annan lapriyè ki ka sèrvi di modèl, é ki Jézi anprann nou : « A pou to rwayonm vini. A pou to volonté fèt asou latè-a, kou annan syèl-a » (Matthieu 6:10). Mé kisa Rwayonm-an ka fè dipi i koumansé dirijé an 1914 ? É ki bèl bagaj nou ké wè dimen lò sa rwayonm-an ké koumansé dirijé tout latè-a ?