A pa paské 70 disip-ya pa té la lò Jézi fè Répa Sényèr-a ki sa lé di ki yé pa té ka fè Jézi plézi ankò ouben ki yé té anbandonnen l’. Jézi té lé pasé sa moman-an ké so apot-ya.

Ni 12 apot-ya, ni 70 disip-ya, yé tout té ka fè Jézi plézi. Pou koumansé, Jézi chwazi 12 mouché annan tout so disip é i aplé yé apot (Luc 6:12-16). I té Galilé lò i « rasanblé 12 apot-ya » é lò i « voyé yé préché rwayonm Bondjé-a é géri moun malad » (Luc 9:1-6). Pita, lò i té Jidé, i « chwazi 70 ròt disip é i voyé yé alé dépadé » (Luc 9:51 ; 10:1). Atò, i té gen disip ki té ka préché so mésaj annan plizyèr koté.

Chak lannen, Jwif-ya ki té divini disip Jézi té ka fété Lapak, é nou pouvé pansé ki yé té ka fè l’ ké yé fanmi (Ex. 12:6-11, 17-20). Roun tibi tan anvan i mouri, Jézi alé Jérizalèm ké so apot-ya. Mé i pa fè roun gro lafèt koté i té ké pouvé envité tout so disip ki té ka rété Jidé, Galilé ké Péré. A té ké so apot rounso Jézi té lé fété sa Lapak-a. I di yé : « Mo té vréman lé manjé sa Lapak-a ké zòt anvan mo mouri » (Luc 22:15).

Jézi té savé poukisa i té ka fè sa. Li ki sa « Timouton Bondjé ki ka tiré péché monn-an », té ké mouri titalò (Jean 1:29). I té gen pou mouri Jérizalèm koté yé té ka fè sakrifis pou Bondjé dipi nanninannan. Timouton-an yé té ka tchwé pou Lapak té ka fè Israyélit-ya sonjé ki Jéova té libéré yé di Léjip. Mé lò Jézi té ké bay so lavi, i té ké fè plis pasé sa : i té ké libéré tout moun di péché ké lanmò (1 Cor. 5:7, 8). Grasa sakrifis Jézi té ké fè, a 12 apot-ya an prémyé ki té fòrmé asanblé krétyen-an (Éph. 2:20-22). Liv Révélation-an ka di ki vil ki sen-an, Nouvo Jérizalèm-an, té ké gen « 12 ròch » é « 12 non té ké marké asou sa ròch-ya, non 12 apot Timouton-an » (Rév. 21:10-14). Wi, 12 apot-ya té ké gen roun gro travay pou fè pou projè Bondjé fèt. Atò, nou ka konprann poukisa Jézi té lé yé la ké li pou sa dèrnyé Lapak-a é pou sa i té ké fè apré : Répa Sényèr-a.

70 disip-ya pa té la ké Jézi pannan sa répa-a, ni larèstan disip Jézi non plis. Mé si yé tout té ka rété fidèl, yé té ké pouvé jwenn bénédiksyon grasa sa répa-a. Anfèt, tout sa ki té ké divini wen apré sa répa-a té ké fè parti di alyans-a pou roun Rwayonm. Jézi palé di sa alyans-a ké so apot pannan Répa Sényèr-a sa jou-a (Luc 22:29, 30).