Sé bon nouvèl-ya ka vini di Jéova. I sa roun Bondjé éré é i lé ki sé fanmi-ya viv éré (1 Timothée 1:11). A li ki mété maryaj-a. Maryaj douvan lalwa oblijé pou fanmi-a trapé bonèr : i ka poté roun santiman sékirité pou mouché ké madanm é pou sé timoun-yan. Sé krétyen-yan divèt rèspèkté lalwa péyi-ya asou anréjistréman sé maryaj-ya. — Li Luc 2:1, 4, 5.

Kouman Bondjé ka wè maryaj-a ? Pou li, maryaj-a, a roun mouché ké roun madanm ki pou rété ansanm pou tout-tan. Jéova lé ki mouché ké madanm rété fidèl roun ké ròt (Hébreux 13:4). I rayi divòrs (Malaki 2:16). Mé i ka pèrmèt roun krétyen divòrsé épi roumaryé si so mari ouben so madanm tronpé l’. — Li Matthieu 19:3-6, 9.

Mouché ké madanm, yé chak gen roun ròl annan maryaj-a, mé sa ròl-ya ka maché ansanm. A sa Jéova té prévwè lò i kréyé yé (Genèse 2:18). Mari-a, a li ki chèf annan fanmi-a, a pou sa i gen rèsponsabilité. I divèt bay so madanm ké so pitit tousa yé bizwen pou viv. È i divèt palé yé di Bondjé épi ansényé yé. I divèt osi kontan so madanm é i divèt paré fè sakrifis pou li. Toulédé divèt kontan ké rèspèkté yé konpanyen. Pyès mari ké madanm pa parfè, a pou sa yé divèt anprann pardonnen. A roun bagaj ki ka édé mouché ké madanm trapé bonèr annan yé maryaj. — Li Éphésiens 4:31, 32 ; 5:22-25, 33 ; 1 Pierre 3:7.

Si ou maryaj ka pran dlo, fo zòt toulédé travay rèd pou aji ké lanmou roun ké ròt (1 Corinthiens 13:4, 5). Paròl Bondjé-a pa ka konséyé séparasyon pou réglé problèm ki ka rivé souvan ant mouché ké madanm. — Li 1 Corinthiens 7:10-13.

Jéova lé ki to tchò kontan. I ka bay to pi bon konsèy i gen pou to profité di to jénès. I lé to kouté to papa ké to manman ki gen plis sajès ké èspéryans ki to (Colossiens 3:20). I lé osi ki to rousanti lajwa i gen lò to ka fè bagaj pou to Kréyatèr, é pou so Pitit Jézi. — Li Ecclésiaste 11:9–12:1 ; Matthieu 19:13-15 ; 21:15, 16.

Ou divèt travay rèd pou bay ou timoun manjé, pou bay yé roun kaz, ké lenj pou yé mété (1 Timothée 5:8). Mé pou yé viv éré, ou divèt osi anprann yé kontan Bondjé é lésé li ansényé yé (Éphésiens 6:4). Si ou ka montré annan ou lavi ki ou kontan Bondjé, sa pouvé détenn asou yé. Si ansèyman ou ka bay yé ka apiyé asou Labib-a, i ké byen fòrmé yé lèspri pou yé pran bon désizyon. — Li Deutéronome 6:4-7 ; Proverbes 22:6.

Sé timoun-yan ka grandi pi byen lò yé gen ankourajman ké félisitasyon. Yé bizwen yé paran roupran yé ké disipliné yé. Sa kalité fòrmasyon-an ké protéjé yé : i ké édé yé pa fè bagaj ki ké anpéché yé trapé bonèr-a (Proverbes 22:15). Mé, disiplin-an pa jen divèt ni rèd ni mové. — Li Colossiens 3:21.

Témwen Jéova-ya pibliyé plizyèr liv pou édé sé paran-yan ké sé timoun-yan. Sa liv-ya ka apiyé asou Labib-a. — Li Psaume 19:7, 11.