Lò roun timoun ka rivé annan fanmi-a, a roun bèl bagaj, mé an menm tan sa ka mennen bon chanjman annan maryaj-a. Zòt ki manman ké papa aprézan, zòt ké pitèt rété èstébékwé lò zòt ké wè tan ké fòrs sa ka pran pou okipé di zòt timoun. A pa tout tan zòt ké santi zòt kò byen é détan zòt pa ké rivé dronmi. Tousa pouvé mété zòt maryaj an danjé. Zòt toulédé ké divèt fè chanjman pou okipé di zòt timoun mé osi pou protéjé zòt maryaj. Kouman konsèy ki annan Labib-a ké idé zòt rivé fè sa ?

SA LABIB-A KA DI : « Lanmou pasyan ké bon », « i pa ka gadé pou so pròp kò, i pa ka faché » (1 Corinthiens 13:4, 5). Ou ki manman aprézan, ou ka pran byen swen di ou timoun, a roun bagaj ki nòrmal pou ou. Pi tan-an ka pasé, ou mari pouvé santi ou pa gen tan pou li ankò. Atò, a pou ou sonjé ki li osi bézwen ou pran swen di li. Ké pasyans épi ké bonté, idé li santi so kò itil, é idé li konprann ki i divèt okipé di timoun-an osi.

Labib-a ka di « Zòt wonm maryé, asou fason zòt ka viv ké zòt madanm montré yé ki zòt ka konprann yé » (1 Pierre 3:7). Ou madanm ké bay zòt timoun près tout so tan ké so fòrs. A pou ou asèpté sa. Kou aprézan i gen plis rèsponsabilité, pitèt i ké las ouben i pa ké santi so kò byen. Détan i ké pitèt osi tonbé asou ou toubonnman konsa, mé a pou ou rété dous, paské « sa-la ki pa ka kouri faché pi bon pasé roun wonm vayan » (Proverbes 16:32). A pou ou konprann li ké idé li annan tousa i bézwen (Proverbes 14:29).

SA OU POUVÉ FÈ :

• Papa : Idé ou madanm pran swen di ou timoun, menm lannwit. Pa pasé trop tan annan dòt bagaj, konsa ou ké pouvé pasé plis tan ké ou madanm épi ké ou timoun.

• Manman : Lò ou mari lé idé ou okipé di timoun-an, a pou ou asèpté. Si ou ka wè i roun timoso groso ké timoun-an, pa fè li répròch, montré li kouman pou i fè.

SA LABIB-A KA DI : « Yé ké divini rounsèl lachè » (Genèse 2:24). Menmsi fanmi-a vini pi gran, pa bliyé ki ou ké ou mari ouben ou madanm ka fè « rounsèl lachè » toujou. Fè tousa ki fo pou zòt rélasyon rété solid.

Ou ki madanm, montré ou mari ki ou kontan sa i ka fè pou idé ou. A ké roun « gérizon » pou li (Proverbes 12:18). Ou menm mari, di ou madanm kouman ou kontan l’ é valò i gen pou ou. Di li mèrsi pou fason i ka okipé di fanmi-a (Proverbes 31:10, 28).

« A pou chak moun kontinyé chaché sa ki pi bon pou ròt-a, pa sa ki bon pou li » (1 Corinthiens 10:24). Fè toujou sa ki miyò pou ou mari ouben ou madanm. A pou zòt toulédé pran tan palé, félisité ké kouté zòt konpanyen. Pa gadé pou ou kò rounso annan domenn sèksyèl. Tchenbé kont di sa ou mari ouben ou madanm bézwen. Labib-a ka di : « Pa privé zòt konpanyen, sòf si a zòt toulédé ki désidé l’ ansanm » (1 Corinthiens 7:3-5). Pa pè palé di sa ké ou mari ouben ou madanm. Si zòt gen pasyans é si zòt ka konprann zòt konpanyen, zòt ké fè zòt maryaj divini pi solid.

SA OU POUVÉ FÈ :

• Pa bliyé mété tan asou koté pou zòt rété yenki zòt toulédé.

• A pou ou fè dé bagaj pou montré ou mari ouben ou madanm ki ou kontan l’. Parèkzanp ou pouvé ékri roun ti mo pou li ouben fè li roun kado.

SA LABIB-A KA DI : « Dipi to toupiti to konnèt sa ki ékri annan liv sakré-ya ki pouvé bay to sajès ki ka sové » (2 Timothée 3:15). Réfléchi asou sa ou ké fè pou anprann ou timoun. Anvan menm i fèt, i pouvé anprann bokou bagaj. Toupannan i annan vant so manman, i ka rékonnèt ou vwa é i ka réyaji sélon sa ou ka santi annan ou tchò. A pou ou li pou ou timoun dipi i toupiti. Menmsi i pa ka konprann sa ou ka li, sa pouvé idé l’ pran plézi li lò i ké gran.

Ou timoun pa janmen tro piti pou tandé palé di Bondjé. Priyè Jéova ké li (Deutéronome 11:19). Menm lò ou ka jwé ké l’, palé li di tousa Bondjé fè (Psaume 78:3, 4). Toupannan i ka grandi, i ké santi lanmou ou gen pou Jéova é i ké anprann kontan l’ osi.

SA OU POUVÉ FÈ :

• Doumandé Bondjé sajès ou bézwen-an pou anprann ou timoun.

• Répété pou ou timoun dé mo ké dé lidé enpòrtan pou i pouvé anprann yé bònò.