LÉSON 42
Kisa Labib-a ka di asou moun ki maryé é asou moun ki pa maryé ?
Annan sèrten kiltir, i gen moun ka di ki ou pa pouvé gen tchò kontan si ou pa maryé. Mé i gen moun ki maryé é yé tchò pa kontan é i gen moun ki pa maryé, mé yé tchò kontan. Pou di vré, Labib-a ka di ki lò to maryé é lò to pa maryé, toulédé a bèl kado ki ka vini di Bondjé.
1. Ki bon bagaj i gen lò ou pa maryé ?
Labib-a ka di : « Sa-la ki ka maryé ka fè roun bon bagaj, mé sa-la ki pa ka maryé ka fè roun pi bon bagaj ankò » (li 1 Corinthiens 7:32, 33, 38). Poukisa Labib-a ka di ki roun moun ki pa ka maryé ka fè « roun pi bon bagaj ankò » ? Paské, kou i li rounso, i gen plis libèrté. Parèkzanp, i pouvé pi fasilman alé préché bon nouvèl-a annan rounòt koté ouben annan rounòt péyi. Anplis di sa, i gen plis tan pou fè so lanmityé ké Jéova vin pi fò.
2. Ki bon bagaj i gen lò ou maryé douvan lalwa ?
Lò roun moun pa maryé, i pouvé trapé bénédiksyon. É lò roun moun maryé, i pouvé trapé bénédiksyon osi. Labib-a ka di ki « dé pi bon pasé rounsèl » (Ecclésiaste 4:9). Sa vré èspésyalman pou krétyen-yan ki ka kouté konsèy Labib-a ka bay asou maryaj-a. Lò roun mouché ké roun madanm ka maryé douvan lalwa, yé ka promèt kontan, rèspèkté ké pran swen roun di ròt. Paské yé maryé douvan lalwa, yé ka santi yé kò plis an sékirité ki sa-ya ki ka viv ansanm mé ki pa maryé douvan lalwa. É si yé ka lévé timoun, timoun-yan ké santi yé kò plis an sékirité osi.
3. Kisa Bondjé ka pansé asou maryaj-a ?
Lò Jéova fè prémyé maryaj-a, i di : « A pou sa, wonm-an ké lésé so papa ké so manman, é i ké rété ké so madanm » (Genèse 2:24). Jéova lé ki roun mouché ké so madanm kontan roun ròt é i lé yé rété ansanm tout yé lavi. Jéova ka lésé yé divòrsé sèlman si roun ka tronpé ròt-a. Annan sa sitiasyon-an, Jéova ka bay moun-an ki inosan drwa désidé si i ké divòrsé ouben si i pa ké divòrsé a (gadé nòt-a) (Matthieu 19:9). Jéova pa ka asèpté lò roun krétyen gen plizyèr mouché ouben plizyèr madanm (1 Timothée 3:2).
ANNOU FOUYÉ ANNAN LABIB-A
Gadé kouman sa-ya ki maryé ké sa-ya ki pa maryé pouvé gen tchò kontan é fè tchò Jéova kontan.
4. Kouman sa-ya ki pa maryé pouvé byen itilizé yé lavi
Pou Jézi, lò to pa maryé a roun bèl bagaj (Matthieu 19:11, 12). Li Matthieu 4:23, épi kozé asou sa késyon-an :
-
Kouman Jézi itilizé libèrté i té gen pas i pa té maryé pou adoré so Papa ké idé ròt-ya ?
Kou Jézi, roun krétyen pouvé trapé lajwa lò i pa maryé. Gadé VIDÉYO-a, épi kozé asou sa késyon-an :
-
Di ki fason roun krétyen ki pa maryé pouvé itilizé so lavi pou gen tchò kontan lò i ka adoré Jéova ?
Ès ou savé sa ?
Labib-a pa ka bay roun laj pou maryé. Mé i ka ankourajé moun-an pa maryé « tro jenn », pas lò i tro jenn so anvi gen rélasyon sèksyèl tro fò, é sa pouvé fè moun-an pran roun mové désizyon (1 Corinthiens 7:36).
5. Byen chwazi ké kimoun ou ké maryé
Chwazi roun moun pou maryé, a roun annan désizyon-yan ki pi enpòrtan annan lavi roun moun. Li Matthieu 19:4-6, 9, épi kozé asou sa késyon-an :
-
Poukisa roun krétyen pa divèt kouri présé pou maryé ?
Labib-a pouvé idé ou savé ki bèl kalité ou divèt chaché annan roun mari ouben roun madanm. Mé pi enpòrtan-an, a chwazi roun moun ki kontan Jéova b (gadé nòt-a). Li 1 Corinthiens 7:39 ké 2 Corinthiens 6:14, épi kozé asou sa késyon-yan :
-
Poukisa nou divèt maryé ké roun moun ki ka adoré Jéova ?
-
Kisa Jéova ké rousanti si nou ka maryé ké roun moun ki pa kontan li ?
Si nou ka maré ansanm dé zannimo ki diféran menm, yé ké soufri. Menm fason-an, roun krétyen ki ka maryé ké roun moun ki pa kontan Jéova ké gen bokou problèm osi.
6. Wè maryaj-a kou Jéova ka wè l’
Sèrten wonm annan pèp Bondjé tan-lontan-an té ka divòrsé di yé madanm pas yé té ka gadé yenki pou yé douvan lèstomak. Li Malachie 2:13, 14, 16, épi kozé asou sa késyon-an :
-
Poukisa Jéova rayi roun divòrs ki pa gen roun rézon biblik ?
Moun-an ki ka tronpé so mari ouben so madanm é ki ka divòrsé ka fè moun-an ki inosan é timoun-yan soufri menm.
Gadé VIDÉYO-a, épi kozé asou sa késyon-an :
-
Si ou maryé ké roun moun ki pa ka adoré Jéova, kisa ou pouvé fè pou gen tchò kontan annan ou maryaj ?
7. Kouté konsèy Jéova ka bay asou maryaj-a
Roun moun ké bézwen pitèt fè bokou éfòr pou kouté konsèy Jéova ka bay asou maryaj-a c (gadé nòt-a). Mé Jéova ka béni sa-ya ki ka fè l’. Gadé VIDÉYO-a.
Li Hébreux 13:4, épi kozé asou sa késyon-an :
-
Ès ou ka pansé ki sa posib kouté konsèy Jéova ka bay asou maryaj-a ? Poukisa ou ka di sa ?
Annan près tout sé péyi-ya, gouvèrnman-an ka doumandé moun-yan maryé douvan lalwa ouben divòrsé douvan lalwa. Jéova lé krétyen-yan obéyi sa lalwa-ya. Li Tite 3:1, épi kozé asou sa késyon-an :
-
Si ou maryé, ès ou sir ki ou maryaj anréjistré douvan lalwa ?
SI ROUN MOUN DOUMANDÉ OU : « Maryé pou fè kisa ? Nou pa pouvé jis viv ansanm ? »
-
Kisa ou ké réponn ?
SA NOU WÈ
Ki nou maryé ki nou pa maryé, sa dé bagaj-ya sa kado Jéova. Moun ki maryé é moun ki pa maryé pouvé gen tchò kontan si yé ka kouté konsèy Jéova ka bay.
Kisa ou anprann
-
Kouman roun moun ki pa maryé pouvé byen itilizé so lavi ?
-
Poukisa Labib-a ka di ki a ké roun moun ki ka adoré Jéova rounso nou divèt maryé ?
-
Labib-a ka bay rounsèl rézon pou divòrsé. Kilès ?
SA OU POUVÉ TRAPÉ OSI
Kisa sa lé di « maryé ké roun disip Sényèr-a rounso ».
« Questions des lecteurs » (La Tour de Garde, 1é jwiyé 2004)
Gadé sa dé ti vidéyo-ya ki ké idé ou pran bon désizyon lò ou ka soti ké roun moun é asou maryaj-a.
Gadé poukisa roun frè ka pansé ki Jéova bay li roun bagaj ki miyò ki sa-la i té lésé.
Anvan roun moun désidé divòrsé ouben séparé di so mari ouben di so madanm, i divèt réfléchi asou kisa ?
« Honore “ce que Dieu a uni” » (La Tour de Garde, désanm 2018)
a Nòt-a : Gadé parti-a « Pou byen konprann » no 4 pou savé lò sa posib roun moun pouvé séparé menm si roun pa tronpé ròt-a.
b Nòt-a : Annan sèrten kiltir, a papa ké manman-an ki ka chwazi ké kimoun yé timoun ké maryé. Annan sa sitiasyon-an, pi enpòrtan-an pou papa ké manman-an plen ké lanmou, a wè si sa moun-an kontan Jéova. Yé pa ka gadé si sa moun-an gen roun patché soumaké ouben si i gen roun plas enpòrtan annan yé kiltir.
c Nòt-a : Si ou ka viv ké roun moun san ou pa maryé ké li douvan lalwa, a ou pou désidé si ou ké lésé sa moun-an ouben si ou ké maryé ké li douvan lalwa.
