Areru 69:1-36
Te kaetieti nakon te mataniwi n te anene, ae “Taiani Kiebu.” Ana areru Tawita.
69 Kamaiuai ngkoe ae te Atua, bwa N nangi bwabwa n te ran.+
2 I a iinako n te bokaboka ae nano, ike ai akea iai te tano ae matoatoa.+
I a iinako n te ran ae makuakua,Ao e a uotainako te raanga ae korakora.+
3 I a rangi ni kua imwin au wewete,+E a kee buuau.
Ao a a mamaara matau ngkai I tataningaa Atuau.+
4 A a rangi ni bati riki nakon irau,Akana ribaai n akea bukina.+
Ao naake a kani katiaa arou,Aika taani kairiribai nakoiu* aika mwamwanaa te aba, a a rikirake ni mwaiti.
Ao I taumatoaaki bwa N na anganako bwaai aika I aki iraei.
5 Ko ataa nanobabau ngkoe ae te Atua,Ao e aki raba mairoum au bure.
6 A bia aki kamaamaeaki ibukiu akana kabotoa aia kantaninga i aomNgkoe te Uea ae Moan te Rietata, ae Iehova ae Atuaia taanga ni buaka.*
A bia aki bwaibwainrang ibukiu akana ukoukoriko,Ngkoe ae Atuan Iteraera.
7 I kabuakakaaki ibukim+Ao e rabunaki ubuu n te bwaibwainrang.+
8 I a riki bwa te ianena nakoia tariu,Ao te iabatera nakoia natin tinau aika mwaane.+
9 E kororake ingaingan nanou ibukin umwam,+Ao a bwakarai taiani kabuakaka mairouia taani kabuakakako.+
10 Ngke I* kananorinanoai ma n aki mamatam,*Ao I kabuakakaaki iai.
11 Ngke I kunnikaiai n te raerobwa,*Ao I a riki iai bwa te bwai ni kakanikoaki* irouia.
12 I a riki bwa te bwai n tataekinaki irouia ake a tekateka ni mataroan oon te kaawa,Ao a karikai taani kokoro ni manging bwa kanoani mwaneweni kunaia.
13 Ma ke e roko au tataro iroum,Ngkoe ae Iehova, n te tai ae riai iroum.+
Ao ni kaineti ma mwaitin am tangira ae koaua* ngkoe ae te Atua,Kaekaai ao kaotia bwa boni ngkoe te tia kamaiu ni koaua.+
14 Kamaiuai man te bokaboka,Bwa I aonga n aki iinako nako naano.
Kamaiuai mairouia akana ribaai,Ao man te ran ae makuakua.+
15 Tai kariaia te ran ae raanga ni korakora bwa e na uotainako,+Ke marawa bwa e na kabwautai,Ke te mwanibwa* bwa e na bonota matana i aou.+
16 Kaekaai ngkoe ae Iehova, ibukina bwa e raoiroi am tangira ae koaua,*+Ao rairaki nakoiu+ ni kaineti ma am nanoanga ae bati,
17 Ao tai karabaa ubum mairoun am toro.+
Bareiko ni kaekaai, bwa I a rawawata.+
18 Nakomai kaaniai ao kamaiuai,Ao ko na manga kabooai mairouia akana kairiribai nakoiu.
19 Ko ataa aroni kabuakakaau, kamaamaeau, ao kabwainrangau.+
Ko noriia akana kairiribai nakoiu ni kabane.
20 E urua nanou te kabuakaka, ao e aki kona ni mao te ikoaki.*
I kantaningaa te nanoanga, ma bon akea+Ao taani karaunano, ma akea ae I noria.+
21 Ma a anganai te boitin* bwa kanau,+Ao a anganai te beneka* bwa N na nimma ngke I taka.+
22 Ke e riki aia taibora bwa te bwai ni kamwane nakoia,Ao toronibwaia bwa te kai ni kabwaru.+
23 Ke a karooaki mataia bwa a aonga n aki noraaba,Ao karurui nukaia* n taai nako.
24 Kabwaroa unim* i aoia,Ao ke e taonianako uraraken unim.+
25 Ke e kamaroaeaki aia kaembwa,*Ao ke akea te tia maeka n aia umwanrianna.+
26 Bwa a ukoukora teuare ko oreia,Ao a teimatoa n tataekini marakia aomata ake ko kaikoakiia.
27 Kauaataoi riki aia bure,Ao ke akea tibwangaia n am raoiroi.
28 Kariaia bwa a na mauna man te boki ni kamaiu,+Ao ke a aki mwakoro araia i buakoia aomata aika raoiroi.+
29 Ma I karawawataaki ao I maraki.+
Ke e kawakinai mwaakam ae kakamaiu, ngkoe ae te Atua.
30 N na anene n neboa aran te Atua,Ao N na kamoamoaa ma te katituaraoi.
31 E na kukurei riki Iehova n te baei nakon te kao mwaane,Ao nakon te kao mwaane ae ataei ae iai korona ao a manga waena.+
32 A na noria akana nimamannei, ao a na kimwareirei.
Ngkami aika kam ukoukora te Atua, ke a a manga maiu nanomi.
33 Bwa e ongora Iehova irouia akana maiu ni kainnano,+Ao e na bon aki ribaiia ana aomata aika taenikai.+
34 Ke a karaoiroia karawa ma aonnaba,+Ao taari ma bwaai nako ake a mwamwae i nanona.
35 Bwa e na kamaiua Tion+ te Atua,Ao e na manga katei kaawan Iuta,Ao a na maeka iai ao n abanna.
36 A na ababa iai kanoaia ana toro,+Ao a na maeka iai akana tangira arana.+
Taiani Kabwarabwara Mai Nano
^ Ke, “taani kairiribai n akea bukina.”
^ Ke, “Tabaota.” Nora Nanon Taeka.
^ Ebera, ne’phesh, nora Nanon Taeka.
^ Ke tao, “Ngke I tanginiwenei ma n aki mamatam.”
^ Nora Nanon Taeka.
^ Ebera, “te taeka n rabakau.”
^ Ke, “tangira ae kona n onimakinaki.”
^ Ke, “mwarua.”
^ Ke, “tangira ae kona n onimakinaki.”
^ Ke, “ao I a bwarannano.”
^ Ke, “te aroka ae boitin.”
^ Te moi ae kamangingi. Taetae n Ingiriti, “vinegar.”
^ Ebera, “bebeeia.”
^ Ke, “marakin nanom.”
^ Ke “kaembwa aika ooaki.”
