Te Maiu n Utu ao te Reitaki ma Aomata
A bati aika noria bwa e kangaanga kateimatoaan reitakia ma aomata. Iangoi tabeua ana boto n reirei te Baibara aika kona ni buokiko ni kanakoraoa reitakim ma aomata.
TAI TII IAIANGOIKO I BON IROUM
ANA BOTO N REIREI TE BAIBARA: “Kam na aki tii tabeakin oin aromi, ma kam na tabeakin naba aroia tabemwaang.”—I-Biribi 2:4.
AE NANONAKI IAI: Te reitaki ae nakoraoi e boboto i aon te anga ao tiaki te anganaki. Ngkana ko tii iaiangoiko, ko kona n urua reitakim ma aomata. N te katoto, te buu ni mare ae tii iaiangoia i bon irouna, e kona n aki kakaonimaki nakoni buuna. Ao bon akea naba ae kan raoraona te aomata ae kakamoamoa ibukini baike e karekei ao ake e atai. E taku te boki ae The Road to Character: “Aomata aika tii iaiangoiia i bon irouia, a na boni bati aia kangaanga.”
TE BWAI AE KO KONA NI KARAOIA:
Buokiia tabemwaang. A onimakinia ao n tatauraoi n ibuobuoki i marenaia raao ni koaua. E oti ni kakaae tabeua bwa aomata aika buobuokiia tabemwaang, e karako riki rotakia n te rawawatannano ao a kona riki n namakinna bwa iai manenaia.
Kaota te atataiaomata. E kakabwarabwaraaki te atataiaomata bwa namakinan raoi marakin te aomata temanna i nanom. Ngkana ko atataiaomata, ko na aki kona ni kabonganai taeka aika kaunun, aika taeka aika aongkoa taiani manikangare ma ko boni kani kammaraka te aomata.
Ngkana ko atataiaomata, ko a kona naba ni butimwaei aia iango tabemwaang. Ngaia are te atataiaomata e kona ni buokiko bwa ko na aki inanonano, ao ko na karekeia naba raoraom aika kakaokoro kateia ke rikiaia.
Kamwawaa am tai. Ko na kinaia riki tabemwaang ngkana e babane am tai ma ngaiia. E kainnanoaki te maroro ae uaana ma tabemwaang, ngkana ko kan raoraonia ni koaua. Ngaia are riiki bwa te tia kakauongo raoi. Kaotia bwa ko tabeakinia raoraom. E oti n te kakaae teuana bwa “te maroro ae uaana, e boni kona ni kakukureiia aomata.”
RINEIIA RAOI RAORAOM
ANA BOTO N REIREI TE BAIBARA: “A kabuakakai aroaro ni maiu aika raraoi taian iraorao aika bubuaka.”—1 I-Korinto 15:33, kabwarabwara mai nano.
AE NANONAKI IAI: E korakora rotakim n te aro ae raoiroi ke ae buakaka, irouia aomata aika e babane am tai ma ngaiia. A kakoauaa taani kamatebwaia aroia aomata, bwa e kona n rotaki iai maium. N te katoto, a taku bwa ngkana ko memena i rarikia aomata aika momoko ke aika buuraure, ko na manga kani moko ke ni buuraure naba.
TE BWAI AE KO KONA NI KARAOIA: Karekeia raoraom aika iai irouia aroaro ao anua aika ko mataaiakin ke ko kani kakairi iai. N te katoto, ukera te iraorao ma aomata aika taratara raoi, a karinerine, a tituaraoi, ao a akoiia iruwa.
ANA BOTO N REIREI RIKI TABEUA TE BAIBARA
Mataku n taamnei aika boto i aon te Baibara, ake a katauraoaki bwa buokaia taanga ni mare, rooro n rikirake, ao ataei, ibukini kanakoraoan aia utu
TAI KABONGANAI TAEKA AIKA KAMMARAKI.
“Te taetaenikawai ae aki iangoaki raoi kaanga ai aron te ewa n te kabaang.”—TAEKA N RABAKAU 12:18.
BWAINA TE TITUARAOI.
“E na toronibwai te aomata ae tituaraoi.”—TAEKA N RABAKAU 11:25.
KARAOA AE KO TANGIRIA BWA E NA KARAOAKI NAKOIM.
“Bwaai ni kabane aika kam tangiriia aomata bwa a na karaoi nakoimi, kam riai ni karaoi naba nakoia.”—MATAIO 7:12.
