Ngkana ko kani kinaa raoi temanna, e ibuobuoki ngkana ko reiakini baike e a tia ni kakororaoi ao kangaanga ake e a tia n tokanikai iai. N aron anne, ngkana ko kani kinaa raoi te Atua, ko riai n reiakini baike e a tia ni karaoi. Ni karaoan anne, ko na bae ni mimi n ataakini mwaitini baike e a tia ni karaoi rimoa aika ti a kakabwaiaaki iai ngkai ao n taai aika a na roko.

Iehova ae te Atua bon te tia Karikiriki ae Kakannato, ao “a teretere raoi aroarona aika aki nonoraki ni moa mani moani karikan te aonnaba ni karokoa ngkai, ibukina bwa a noraki ni baika karikaki.” (I-Rom 1:20) “Boni ngaia te tia Karaoa te aonnaba ni mwaakana, are Teuare katea ni kamatoaa te aba ae maiureirei ni wanawanana, ao e taakina karawa n ana ataibwai.” (Ieremia 10:12) E oti naba tabeakinara iroun te Atua ni kamimin ana karikibwai.

Iangoa aron Iehova ni kanakoraoa maiura ni karikaia aomata bwa “katotongana.” (Karikani Bwaai 1:27) E nanonaki n anne bwa e karekea te anga ae ti na kona iai ni katotongi teutana aroarona aika rangi n rianako. E karikira ma te kona n iaiango n ai arona, ke te kona n ota n ana iango ma ana kaetieti. Ngkai ti kakorakoraira ni maiuakini, ti a nori baika kakukurei riki ao manenani maiura. Ma ae moamoa riki, e anganira te kona n iraorao ma ngaia.

E oti ana namakin te Atua ibukira, man ana karikibwai. E taku te abotoro Bauro bwa te Atua “e boni kaotiota taekana ni baika raraoi ake e karaoi. E anganingkami te karau mai karawa ao boong ni mari, ao e kanuaingkami n te amwarake ma ni kaon nanomi n te kimwareirei.” (Mwakuri 14:17) A bati riki baika e katauraoi te Atua nakon tii baika ti kainnanoi ni maiura. E katauraoi baika bati ao baika kakaokoro bwa ti aonga ni kimwareirei ni maiura. Ma a bati riki baika e kani karaoi te Atua ibukira.

E karika te aonnaba Iehova bwa a aonga ni maekanna aomata n aki toki. E taku te Baibara: “E angania  natiia aomata te aonnaba” ao e “aki karaoia bwa e na matebuaka, ma e karaoia bwa e na maekanaki.” (Taian Areru 115:16; Itaia 45:18) Antai aika a na maekanna ao maanra? “A na abana te aonnaba akana raoiroi, ao a na maeka i aona n aki toki.”​—Taian Areru 37:29.

E karika te moani mwaane ao n aine Iehova aika Atam ma Ewa, ao e kamaekaia n te bwaretaiti n te aonnaba “bwa [a] na ribanaia ma n tararuaia.” (Karikani Bwaai 2:​8, 15) E angania te Atua mwiokoaia aika uoua aika kakukurei ni kangai: “Kam na kabatiaia ami kariki ao kamwaitingkami, kaona te aonnaba ao taua arona.” (Karikani Bwaai 1:28) Ngaia are iai te kantaninga ibukia Atam ma Ewa bwa a na maiu ni kukurei n aki toki n te aonnaba. E kananokawaki bwa a rinea ae a na aki ongeaba iroun te Atua, ao ibukin anne a a kabuaa te kantaninga ae te mena i buakoia “akana raoiroi” ake “a na abana te aonnaba.” Ma n aron ae ti na noria, aroia anne e aki bita ana kantaninga Iehova ibukira ke ibukin te aonnaba. Ma ti na iangoa moa te bwai riki teuana ae e a tia ni karaoia te Atua.

E ataaki naba te Baibara bwa Ana Taeka te Atua. E aera Iehova ngkai e katauraoa te Baibara ibukira? Bukina raoi bwa ti aonga n reiakina taekana. (Taeka N Rabakau 2:​1-5) E koaua bwa e aki kaekai ara titiraki nako te Baibara ibukin te Atua, bwa akea te boki ae kona ni karaoa anne. (Te Minita 3:11) Ma bwaai nako ake i nanon te Baibara a buokira n ataa te Atua. Ti a ataia iai bwa antai ngaia man arona nakoia aomata. Ti a ataia naba iai bwa aekaki n aomata raa aika e kukurei irouia ao aika e aki. (Taian Areru 15:​1-5) Ti reiakina iai ana iango ibukin te taromauri, te aroaro ni maiu ae riai, ao bwaikorakin te maiu aei. Ao e kataamneia aroaron Iehova nakoira ae moan te mataata te Baibara, rinanon ana taeka Natina ae Iesu Kristo ao ana mwakuri.​—Ioane 14:9.

Bukina naba teuana ae e katauraoa iai ana Taeka ae te Baibara Iehova, bwa ti aonga n ataa aroni karekean te kukurei ni maiura ao manenana naba. E tuangira Iehova rinanon te Baibara aroni karekean te kukurei n ara utu, arora n rauaki ni maiura, ao ni kekeiaki ma tabeaiangara. Ao n aron ae e na kabwarabwaraaki n te maekatin aei, iai n te Baibara kaekaan titiraki aika rangi ni kakawaki ibukin te maiu n aron aikai: E aera ngkai e a rangi ni bati te rawawata? Tera kanoan taai aika a na roko? E kabwarabwaraaki naba iai te bwai ae e a tia ni karaoia te Atua ibukini kakororaoan ana moani kantaninga.

Iai riki aanga aika bati are e oti iai bwa te Baibara bon te boki ae rangi n okoro ao te tia koreia bon tii te Atua. E koreaki n te maan ae riaon 1,600 te ririki irouia mwaane aika 40 tabun mwaitiia, ma bon tii teuana te boto n iango iai ibukina bwa bon te tia Koreia te Atua. (2 Timoteo 3:16) E kaokoro ma bokin rimoa bwa e kaeweweaki n te aro ae eti raoi i nanon ririki aika bati, ao e kakoauaaki anne n nira ni boki aika nga ma nga ake bwain rimoa. Irarikin anne e teimatoa ni waakinako rairan te Baibara, tibwatibwaana, ao warekana, n aki ongei waaki n totoko. Bon te boki ae te kabanea ni bati tibwatibwaana, ao rairana ni boong aikai. E kakoauaaki n teimatoan te Baibara bwa “e teimatoa n aki toki ana taeka Atuara.”​—Itaia 40:8.

Ma e a tia naba te Atua ni katauraoa te bwaintangira ae okoro are e a kamatoaa iai bwa a na boni koro bukin ana kantaninga ibukira. N aron are taekinaki mai mwaina, bon nanon te Atua bwa a na maiu n aki toki aomata n te aonnaba. Ma ngke e a aki ongeaba Atam iroun te Atua ao ni bure iai, e aki tii kabuaa te maiu n aki toki ibukina, ma ibukia naba kanoana ake a na riki. “Bwa aron rokon te bure irouia kaain te aonnaba mairoun te mwaane ae tii temanna ao rokon te mate n te bure, ao e a ituia aomata ni kabane te mate ibukina bwa a bane ni bure.” (I-Rom 5:12) Aia aki ongeaba aomata e ekaanako kakoroani bukin ana kantaninga te Atua. Tera are e karaoia Iehova?

E oti raoi aroaron Iehova n ana mwakuri ae e karaoia iai. E motika taekaia Atam ma Ewa ibukin aia mwakuri, ma e tatangira ni katauraoi bwaai ibukia kanoaia ake a na riki. E kabongana wanawanana Iehova ni kaeta te kangaanga, ao e waekoa n taekina aroni kanakoraoana. (Karikani Bwaai 3:15) E na  katauraoaki te kawai ibukini kainaomataara man te bure ao te mate rinanon Natin te Atua ae Iesu Kristo. Tera ae irekereke ma anne?

Ibukini manga kabooaia aomata ni mwin ana karitei Atam, e kanakoa Iesu Iehova nakon te aonnaba bwa e na reireinia aomata te kawai nakon te maiu, ao “e na anga maiuna bwa te kaboomwi ibukia aomata aika bati.” a (Mataio 20:28; Ioane 14:6) E kona Iesu n riki bwa te kaboomwi ibukina bwa e kororaoi n aron Atam. Ma e kaokoro Iesu ma Atam, bwa e kateimatoa ongeabana n uaa naba matena. Kioina ngkai e aki tau ni mate Iesu, e a manga kautia Iehova nakon te maiu i karawa. E a kona ngkai Iesu ni karaoa te baere e kabwaka ni karaoia Atam, ae anganakia aomata aika ongeaba kantaningaan te maiu n aki toki. “Bwa n aroia aomata aika bati aika riki bwa taani bure n ana aki ongeaba te mwaane ae tii temanna, ao ai arona naba bwa a na riki n raoiroi aomata aika bati n ana ongeaba te aomata ae tii temanna.” (I-Rom 5:19) E na boni kakororaoa ana berita te Atua rinanon ana karea ni kaboomwi Iesu, are a na maiu n aki toki aomata n te aonnaba.

E bati reireiara ae reke ibukin Iehova man iangoan arona ni kaeta te kangaanga ae reke man ana aki ongeaba Atam. Ti noria bwa akea te bae e kona n tuka Iehova mani katiaan te bwai ae e a tia ni moana karaoana, “e na boni kakororaoa” ana taeka. (Itaia 55:11) Ti kakaitau naba n tangirara ae rangi ni korakora iroun Iehova. “E kaotaki ana tangira te Atua ibukira, n aei: ngkai e kanakomaia Natina ae te rikitemanna te Atua nako buakoia kaain te aonnaba bwa ti aonga ni karekea te maiu rinanona. Aio aron te tangira aei, bwa e tangirira te Atua ao e kanakoa Natina bwa te karea ni kan raoi ibukin ara bure, ao e aki karaoa aei ibukina bwa ti tangiria.”​—1 Ioane 4:​9, 10.

“E aki rawa te Atua n anga oin Natina ma e kaburea bwa e na mate ibukira ni kabane,” ngaia are a karauaki nanora bwa te Atua “e na bon akoira naba . . . n anganira bwaai ni kabane” ake e a tia ni beritani. (I-Rom 8:32) Tera ae e beritanna te Atua bwa e na karaoia ibukira? Warekia nako.