E MAEKA Yomara ma mwaanena aika Marcelo ao Hiver n te kaawa ae uarereke i Guatemala. E moana ana reirei n te Baibara Yomara ma taani Kakoaua, ao imwina riki a a manga reirei mwaanena. Ma iai te kangaanga. A bane ni mataki taari aika teniman aikai, ao a kabi ni wareka aia boki mataki ae te braille. Ngaia are aia tia reirei n te Baibara e a wawareki barakirabe ao kiibu man te Baibara nakoia.

E kangaanga naba irouia kaakaean te taromauri. A aki kona ni mwananga i bon irouia nakon te Tabo n Taromauri ae 40 te miniti kaeana. Ma a baireia taari n te ekaretia bwa a na kakairiia nakon te taromauri. Ao ngkana iai mwiokoaia n te taromauri n te wiki, a buokaki irouia taari ni kakamatea.

Ni Mei 2019, ao e a karaoaki te taromauri n te ekaretia n aia kaawa. N te tai anne, a mwaing taanga aika bwaiania aika katoatai nakon te kaawa anne. A katea tiaia bwa a na reireinia taari aika teniman aikai te wareware ao te koroboki ibukia mataki, e ngae naba ngke a aki ataa te bwai ae a na karaoia taanga aikai. A nakon te tabo ni boki n reiakina te wareware ibukia mataki ao n reiakin aanga aika kamanenaaki ibukin te angareirei.

I nanon tabeua te namwakaina, a a kona taari aika teniman aikai ni wareka te koroboki ibukia mataki, ao a buokaki iai ni karikirakea riki aia iraorao ae kaan ma Iehova. a A a beku ngkai Yomara, Marcelo, ao Hiver bwa bwaiania aika katoatai. Marcelo bon te tabonibai. A rangi n tabetabe n aia beku ibukin Iehova ni katoa wiki. A rangi n ingainga n aia beku ibukin Iehova n te aro are a a kakairi taari irouia.

A rangi ni kakaitau taari aika teniman aikai ibukin te tangira ae kaotiotaki n te ekaretia. E taku Yomara: “Man te tai are ti kaitiboo iai ma taani Kakoaua a a boni kaotiota naba te tangira ni koaua.” E reitia ni kangai Marcelo: “A a reke raoraora aika raoiroi n ara ekaretia, ao ti a riki bwa kaain te botaki n itaritari ae katobibia te aonnaba ae a katiteuanaaki n te tangira.” E rangi n ingainga Yomara ma mwaanena ni kariariaa te tai are e nang oneaki iai te aonnaba nakon te bwaretaiti.—TaiAre. 37:10, 11; Ita. 35:5.