IBUKINA bwa ti a maeka n te aonnaba ae bati iai te rawawata, ti riai ni mwakuri korakora ni karekea te rau. Ngkana e reke iroura te rau teutana, n angiin te tai ti kakorakoraira ni kateimatoa. Tera buokara ae taekinaki n Ana Taeka te Atua ibukini karekean te rau ni koaua ao ae teimatoa? Ao ti na kangaa ni buokiia aomata bwa a na karaoa naba anne?

Ngkana ti na karekea te rau ni koaua, ti riai n namakinna bwa ti kamanoaki raoi ao ni mweraoi. Ti riai naba ni karikirakea ara iraorao ae kaan ma tabemwaang. Ma ae kakawaki riki ni karekean te rau ae teimatoa, ti riai ni karikirakea ara iraorao ae kaan ma te Atua. Ti na kangaa ni karaoa anne?

Ngkana ti ongeaba n ana tua ao ana boto n reirei Iehova aika raraoi, ti kaotia iai bwa ti onimakinna ao ti kani karekea ara iraorao ae kaan ma ngaia. (Ier. 17:7, 8; Iak. 2:22, 23) Ni karaoan anne, e na kaanira ao ni kakabwaiaira n anganira te raunnano. E taku Itaia 32:17: “Bon te rau mwin te raoiroi ni koaua, ao uaan te raoiroi ni koaua bon te rau ma te mweraoi ae teimatoa.” Ti kona ni karekea te raunnano ni koaua n ongeabara iroun Iehova ma nanora ni koaua.—Ita. 48:18, 19.

Ti buokaki naba ni karekea te rau ae teimatoa rinanon te bwaintangira ae moan te kamimi mairoun Tamara are i karawa, ae taamneina ae raoiroi.—Mwa. 9:31.

E korea taekan te rau te abotoro Bauro bwa te aroaro ae te katenua n “uaan te taamnei.” (IKar. 5:22, 23) Ibukina bwa e reke te rau ni koaua rinanon taamnein te Atua, ti riai ni butimwaea ana kairiri te taamnei ae raoiroi ibukini karikirakean te aroaro anne. Ti na rinanoi aanga aika uoua ake e kona iai ni buokira taamnein te Atua ni karekea te rau.

 Te moan, ti buokaki ni karikirakea te rau mani wawarekan Ana Taeka te Atua are e kaira koreana. (TaiAre. 1:2, 3) Ngkana ti kananoi ara iango n ana rongorongo te Baibara, e buokira taamnein te Atua bwa ti na ota n aron Iehova n iaiangoi baika bati. N te katoto, ti nora arona n teimatoa n rau ao e aera ngkai e kakawaki te rau irouna. Ngkana ti maiuakin reirei akanne man Ana Taeka te Atua, ti na namakina riki te rau ni maiura.—TaeRab. 3:1, 2.

Te kauoua, ti riai n tataroa taamnein te Atua. (Ruka 11:13) E berita Iehova bwa ngkana ti ukoukora buokara mairouna ao ‘te rau are mairoun te Atua ae riaon aia iango aomata, e na kawakin nanora ma ara iango rinanoni Kristo Iesu.’ (IBir. 4:6, 7) Ngkana ti katoatai n tataro ao ni bubutii taamnein Iehova, e na boni kaonira Atuara n te raunnano ae tii rereke irouia naake e kakawaki irouia aia iraorao ma ngaia.—IRom 15:13.

A kangaa tabeman ni maiuakina te reirei ni kairiri man te Baibara aei ao ni karaoi bitaki aika riai, ike a a kona iai n namakina te rau ae teimatoa ma Iehova, i bon irouia, ao ma tabemwaang?

Iai n te ekaretia ni Kristian ni boong aikai tabeman ake a “kakaiun” ngkoa, ma a a mwamwannano riki ngkai, a akoi, a taotaonakinnano, ao a rau n reitakia ma tabemwaang. * (TaeRab. 29:22) Nora koauan aei irouia uoman taan uarongorongoa te Tautaeka n Uea ake a buokaki n tokanikai i aon te un, ao ni karikirakea te rau ma aomata.

E rotakibuaka ana taetaenikawai David man aroarona ae buakaka. Imwaini katabuani maiuna nakon te Atua, e aki toki n tiribureiia tabemwaang ao e taekin taeka aika kammaraki nakoia kaain ana utu. Imwin tabeua te tai, e a ataia David bwa e riai ni bitaki ao ni maiuakina te rau. E kangaa ni karekea te rau? E taku: “I moanna mani maiuakinani booto n reirei man te Baibara, ao ibukin anne, e a rikirake te ikarinerine i marenau ma au utu.”

E rotakibuaka aroaron Rachel man aroni kaikawaana. E taku: “I teimatoa naba ngkai ni kabokorakora  ma te kan unun ibukina bwa I kaikawaaki n te utu ae a unun kaaina.” Tera ae buokia bwa e na maiuakina riki te rau? E taku: “I katoatai n tataro nakon Iehova ao ni butiia buokau.”

David ao Rachel boni banna ni katoto aika kaotia bwa ngkana ti maiuakin ana boto n reirei te Baibara ao ni butiia te Atua taamneina bwa e na buokira, ti na boni karekea te rau ae uaan te taamnei. E teretere bwa e ngae ngkai ti maeka n te aonnaba ae bati iai te riribai, ma ti boni kona ni karekea te raunnano ae boutokaa te boonnano i marenara ma ara utu ao raora ni Kristian. Ma e ngae n anne, e kaumakira Iehova bwa ti na “karekea te rau ma aomata ni kabane.” (IRom 12:18) E koaua bwa e kona n reke anne? Ao baikara kakabwaia aika kona n reke ngkana ti kakorakoraira ni karekea te rau?

Ti kaoia aomata rinanon ara mwakuri ni minita bwa a na kakabwaiaaki n te rongorongo ae karekea te rau ae taekan Ana Tautaeka n Uea te Atua. (Ita. 9:6, 7; Mat. 24:14) E kakukurei bwa a bati aika ongora. N tokina, a aikoa taonakinako n te bwarannano ke te un ibukini baika a riki i rarikia. Ma a a karekea ngkai te kantaninga ni koaua ibukin taai aika a na roko ao ni kairaki bwa a na “ukoukora te rau ao [ni] kaea ni kan taua.”—TaiAre. 34:14.

A aki bane aomata ni kan ongora n ara rongorongo, moarara riki ni moani kawaraia. (Ioa. 3:19) Ma e ngae n anne, ti buokaki n taamnein te Atua bwa ti na taekina te rongorongo ae raoiroi nakoia ma te rau ao te karinerine. Ni karaoan aei, ti a kakairi iai n ana kaetieti Iesu ibukin te mwakuri ni minita ae ni Mataio 10:11-13, ike e anga iai ana taeka n reirei aei: “Ngkana kam rin n te auti, kamauriia kaaina ni kangai, ‘Te raoi iroumi,’ ao ngkana a tau ni kawaraki kaaina, e na mena te raoi i aoia ma ngkana a aki tau, e na okiringkami ami raoi.” Ngkana ti kakairi n ana taeka n reirei Iesu aei, ti a kona iai ni kitana te auti ma namakinan te rau ao ara kantaninga bwa tao e na kan ongora n te tai ae e na roko.

Ti boutokaa naba te rau ngkana ti taetae ma te karinerine nakoia bwakuakun te tautaeka, ao naake a kakaitaraa naba ara mwakuri. N te katoto, e korakora te kairiribai n te tautaeka n aban Aberika teuana ao e a aki kariaia katean Taabo n Taromauri. E kantaningaaki raoiakinan aei n te aro ae rau ngaia are e a mwiokoaki te tari te mwaane temanna are e beku ngkoa bwa te mitinare n aban Aberika anne bwa e na kawara te High Commissioner man te aba anne, i London i Engiran. E riai ni kaongoa te bwakuaku aei taekan aia mwakuri ae rau Ana Tia Kakoaua Iehova i abana. Tera mwina?

E taku te tari aei: “Ngke I roko iroun te tia butimwaeia taan roko, I a bon ataia naba mani kunnikain neiei bwa kaain te baronga ae I rabakau aia taetae. Ngaia are I a kamauria n oin ana taetae. E kubanako neiei ao e a titirakinai ni kangai, ‘Tera bukin rokom?’ I karaua te taetae nakoina n tuangnga bwa I kani kawara te High Commissioner. E tareboonia teuaei, ao e a roko ni kawarai ma ni kamaurai n taetaen te baronga anne. Imwina, e kakauongo raoi ngke I kabwarabwaraa nakoina aia mwakuri ae rau taani Kakoaua.”

A torobaki nako ana iango teuaei aika aki raraoi ao ana kairiribai ibukin ara mwakuri, man ana kabwarabwara te tari aei ae irianaki n te karinerine. Tabeua te tai imwina ao te tautaeka n aban Aberika anne e a kamaunai tuua ibukin totokoan te kateitei. Ai kimwareireira taari n te rau are e a reke mai iai! Ni koauana, kaotiotan te karinerine nakoia taan totoko e karekei kakabwaia aika bati n ikotaki ma te rau.

Ni boong aikai, e a reke te rau ni koaua i marenaia ana aomata Iehova n te bwaretaiti n taamnei. Ane ko na karakaa riki te rau anne ngkana ko karikirakea ni maium te aroaro aei ae uaan te taamnei. Ma ae moan te kakawaki, ko na karekea akoam iroun Iehova ao te rau ae bati n aki toki n ana aonnaba ae boou.—2Bet. 3:13, 14.