A kaaitara ma te kangaanga teuana ae kaokoro Nicolas ao Céline. A butimwaea mwiokoaia man te aobiti n tararua i Buranti bwa a na mwaing nakon te ekaretia ae boou. A taku: “N te moantai ti rangi n ingainga ma imwina ti a uringia raoraora ake n ara ekaretia ngkoa. Ti tuai raoi ni kinaia tarira n ara ekaretia ae boou.” a Ma ko na kangaa n tokanikai i aoni kangaanga aikai ngkana ko mwaing nakon te ekaretia ae boou? Tera ae a kona ni karaoia tabemwaang ni buokiko iai? Ao baikara kakabwaia ni kaineti ma te onimaki aika ko kona ni karekei ao n uotii naba nakon am ekaretia ae boou?

BOOTO N REIREI AIKA AUA AIKA A NA BUOKIKO NI KAITARAA TE KANGAANGA

1. Onimakina Iehova. (TaiAre. 37:5) E mwaing Kazumi, ae mena i Tiaban, man ana ekaretia ae mena iai i nanon 20 tabun te ririki, ngke e mwaing buuna ibukin ana mwakuri ni kareketianti. E kangaa neiei n “angan Iehova [arona]”? E taku neiei: “I bunra nanou nakon Iehova ni kaineti ma namakinan te nakonnano, te maroaa, ao te raraoma. Ni katoaa te tai are I karaoa iai anne, ao e anganai te korakora are I kainnanoia.”

Ko na kangaa ni karikirakea onimakinan Iehova iroum? N aron te aroka ae kainnanoa te ran ao te amwarake man te tano bwa e aonga n rikirake, e riai naba n ribanaaki ara onimaki bwa e aonga n rikirake. E noria Nicolas, are taekinaki mai mwaina bwa e kakorakoraaki onimakinan ana boutoka Iehova irouna, ni kananoan ana iango n ana katoto Aberaam, Iesu, ao Bauro, aika mwaane ake anga ngaiia ibukini karaoan nanon te Atua. Ngkana ko  katoatai n ukeuke n reirei i bon iroum n te Baibara, ko na aki tii buokaki iai n nanomwaaka i aani bitaki aika riki ni maium, ma ko na atai naba baika bati aika ko kona n tibwai ibukini kaungaaia tabemwaang n am ekaretia ae boou.

2. Tai kabotaua am ekaretia are mai mwaina ma ae boou. (TeMin. 7:10) E riai Jules ni kaangaraoia ma te katei ae rangi ni kaokoro ngke e mwaing mai Benin nakon te United States. E ururing teuaei ni kangai, “I riai n taekina rongorongoni maiuu nakoia aomata nako ake I kaitiboo ma ngaiia.” Ibukina bwa e kaokoro aei ma arona ngkoa, e a moanna ni kakararoaia kaain te ekaretia. Ma imwini kinaakia riki taari n te onimaki, e a bita ana iango. E taku teuaei: “I a ataia ae e ngae ngke ti mena n taabo aika kakaokoro n te aonnaba ma bon titeboo aroia aomata nako. E tii kaokoro aroia n taetae ao ni karaoi bwaai. E kakawaki bwa ko na tangira te aomata ma aroarona nako.” Ngaia are tai kabotaua am ekaretia are mai mwaina ma ae boou. E taku temanna te tari te aine ae te bwaiania ae Anne-Lise: “I mwaing ibukina bwa I kan reiakini baika boou, ao tiaki ibukina bwa I kantaningai bwaai ni kabane ake n au ekaretia are mai mwaina, bwa a na riki naba n au ekaretia ae boou.”

A riai naba unimwaane n te ekaretia n rarawa ni kabotaua aia ekaretia are mai mwaina ma ae boou. Tiaki nanona bwa e kairua te bae a karaoia taari n am ekaretia ae boou, tii ibukina bwa e kaokoro ma are e kakaraoaki n am ekaretia are mai mwaina. Ma ko wanawana ngkana ko kaotako moa bwa tera aron am ekaretia ae boou, imwain ae ko anga am reirei n ibuobuoki. (TeMin. 3:1, 7b) E raoiroi riki kairaia taari man am katoto ae raoiroi nakoni kairoroaia bwa a na karaoa are ko iangoia.—2Kor. 1:24.

3. Katabetabeko n am ekaretia ae boou. (IBir. 1:27) E kainnanoaki te tai ao te kakorakora ae bati n te mwaing, ma e kakawaki bwa ko na kaakaei bobotaki n te ekaretia ngkana ko kona, n te moantai are ko roko iai. Bwa ngkana a aki nonoriko kaain am ekaretia ae boou, a na kangaa n ataa te bae a na boutokaiko iai? E ururing ni kangai Lucinda are e mwaing ma natina aine aika uoman nakon te kaawa ae bubura i Aberika Maiaki: “I kauringaki bwa N na karekea kinaakia kaain au ekaretia ae boou, n toa ma ngaiia n te mwakuri ni minita, ao n anganga au kaeka n taiani bobotaki n taromauri. Ti kukurei naba n anga mwengara bwa e na kakaraoaki iai te kurubu ibukin te uarongorongo.”

‘Te uaia ni kakorakora’ n te mwakuri ni minita ma taari n te onimaki n am ekaretia ae boou, bon te anga ae raoiroi ibukini karekean “te onimaki ae reke man te rongorongo ae raoiroi.” E kaungaaki Anne-Lise are taekinaki mai mwaina, irouia unimwaane bwa e na kataia n uarongorongo ma taari nako. Tera mwina? E taku neiei, “I waekoa n ataia ae bon aei te anga ae tamaroa ae I a rena iai ma kaain te ekaretia.” Irarikina naba, te anganano n te mwakuri n aron te kaitiaki ao kateimatoaan raoiroin te Tabo n Taromauri, e na oti iai bwa ko iangoa te ekaretia aei bwa am ekaretia. Ngkana ko katabetabeko, ao ane ko na waekoa ni butimwaeaki ao n namakinna ae bon aei am utu ae boou n te onimaki.

 4. Karekeia raoraom aika boou. (2Kor. 6:11-13) Kaotan tabeakinan temanna bon te anga ae tamaroa ibukini karekeaia raoraom, ngaia are karekea am tai imwain ao imwini bobotaki n taromauri ni kawariia tabemwaang ao ni kinaia riki. Kabanea am konaa n ururingi araia. A na kani kinako riki aomata ao n riki bwa raoraom aika boou, ngkana ko ururingi araia ao ko bwaina te akoi ao ni kai kawaraki.

N oneani mwin are ko na raraomaeakina tangirakim irouia taari, kariaia bwa a na kinako raoi moa. Karaoa are taekinna Lucinda, “E a reke ara iraorao ae kaan ngkai ibukina bwa ti biririmoa ni kaoia tabemwaang nakoni mwengara.”

“KAM NA IMWANEMWANE I MARENAMI”

E kona ni kateinang irouia tabeman te rinnako n te Tabo n Taromauri ae a aki kinaia kaaina. Ngaia are tera ae ko na karaoia ibukia aika boou? E kaungaira te abotoro Bauro ni kangai, “Kam na imwanemwane i marenami n aron naba te Kristo ngkai e mwaneingkami.” (IRom 15:7) A kona unimwaane ni kakairi irouni Kristo ao ni buokiia aika boou bwa a na namakinna ae a butimwaeaki raoi. (Nora te bwaoki ae “ Tera ae E na Kanakoraoa Mwaingim.”) Ma a kona naba kaain te ekaretia ni kabane ao ataei naba n ibuobuoki ni butimwaeia aika boou.

Butimwaeaia tabemwaang e kona n nanona akoaia iruwa ma e irekereke naba ma te mwakuri n ibuobuoki ae manena. N te katoto, e karekea ana tai temanna te tari te aine ni kaneweaba te tari te aine ae boou n te kaawa ao ni kabwarabwarai nakoina aroni kabonganaani baao ni mwamwananga. E anaaki nanon te tari te aine ae boou aei ao e buokaki iai ni kaangaraoia.

TE ANGA AE E REKE IAI TE TAI N RIKIRAKE

I nanon ikawairaken te man ae te rokati ao e kakanakoa kunna iraua te tai imwain ae e a kona ni kiba ni baina. N aron anne, ngkana ko a mwaing nakon te ekaretia ae boou, ko riai ni kanakoi raraomam aika totokoiko mani karaoan am beku ibukin  Iehova. E kamatoaa ni kangai Nicolas ao Céline, “Te mwaing bon te kataneiai ae raoiroi. Ti kaungaaki bwa ti na karikirakei aroaro aika boou man arora ni kangaraoira nakoia aomata aika boou ao taabo aika kakaokoro.” E taekina aroni kakabwaiaaia ana utu Jean-Charles are taekinaki mai moa ni kangai: “A a rikirake riki natira n ikawai n te onimaki ao ni kaan riki ma Iehova n ara ekaretia ae boou. Imwin tii tabeua te namwakaina, ao e a anganaki ana reirei natira are te aine ibukin te taromauri are i nanon te wiki, ao natira are te mwaane e a riki bwa tia uarongorongo ae tuai bwabetitoaki.”

Tera ae ko kona ni karaoia ngkana ko a aki kona ni mwaing nakon te tabo ae kainnanoaki riki iai te ibuobuoki ibukini baika ko rinanoi? Ko kona ni maiuakini reirei n ibuobuoki tabeua ake a taekinaki n te kaongora aei. Ngkai ko onimakina Iehova, teimatoa ni katabetabeko ni baika karaoaki n te ekaretia, n arom ni karaoi am babaire n toa ma tabemwaang n te mwakuri ni minita, ao ni karekeia raoraom aika boou ke ni kakorakoraa am reitaki ma naake ko a kamani kinaia. Ko kona ni buokiia aika a boou ke aika a kainnanoa riki te ibuobuoki n aanga aika manena? Ngkai a kanikinaeaki Kristian ni koaua n te tangira, akea te nanououa bwa karaoan anne e na karikirakea ikawaim n te onimaki. (Ioa. 13:35) Ko kona ni kakoauaa ae “e kukurei te Atua n aeka ni karea akanne.”—Ebera 13:16.

A bati Kristian aika a nakoraoi maiuia imwini mwaingia nakon te ekaretia ae boou n aki ongei kangaanga, ao e kona naba n riki anne nakoim! E taku Anne-Lise, “Te mwaing nakon te ekaretia ae boou I buokaki iai bwa N na kamwaawawa nanou.” E a kakoauaa ngkai Kazumi ae “ko kona n nora ana boutoka Iehova n aanga aika ko tuai n nori mai mwaina” ngkana ko mwaing nakon te ekaretia ae boou. Ao tera aron Jules? E taku teuaei: “I buokaki ni karekeaia raoraou aika boou bwa N na namakinna ae I mwaneaki raoi. I a namakinna ngkai bwa I a kaan riki ma kaain te ekaretia ao e na boni kangaanga irou bwa N na manga mwaing mai iai.”