E kaotaki ni buakanakia I-Aikubita iroun te Atua bwa e aki ribai buaka ni kabane. N taai riki tabeua, e kariaia ana aomata ake tibun Iteraera bwa a na buaka. N te katoto, e tuangia bwa a na buakania tibuni Kanaan ake a rangi ni buakaka. (Te Tua-Kaua 9:5; 20:17, 18) E kaira Uean Iteraera are Tawita bwa e na buakania kaaini Biritia aika karitei. E boutokaaki naba Tawita iroun te Atua ni bairean te buaka ike e a tokanikai iai.—2 Tamuera 5:17-25.

A kaotaki n rongorongon te Baibara akanne bwa e kariaia te buaka te Atua ibukini kamaiuaia ana aomata ao ni kamanoa te taromauri ae koaua, ngkana a rotakibuaka tibun Iteraera n aeka ni mwakuri aika buakaka ao ni karawawata. Ma ti na nori baika tenua aika kakawaki ibukin te buaka ae kairaki iroun te Atua.

1. TII TE ATUA N RINEIA BWA ANTAI AE E NA BUAKA. E tuangia tibun Iteraera te Atua n te taina ni kangai: “E aki riai ba kam na taon n te bo ni buaka aei.” Bukin tera? E na boni buaka te Atua ibukia. (2 Rongorongo 20:17; 32:7, 8, BG) E karaoa aei n taai aika bati, n aron are taekinaki mai moa n te kaongora aei. N tabetai, e tuangia ana aomata ake tibun Iteraera rimoa bwa a na irii buaka ake e kukurei iai aika irekereke ma kamanoan ao kawakinan te Aba ni Berita.—Te Tua-Kaua 7:1, 2; Iotua 10:40.

2. TII TE ATUA N RINEIA BWA N NINGAI TAIN TE BUAKA. A taotaon nanoia ana toro te Atua ma kantaningaan te tai are e baireia bwa a na buakana te karawawata ao te buakaka are a otabwaniniaki  iai. A aki riai ni buaka i bon ibukia ni karokoa te tai are e baireia. Ngkana a buaka, a a kabuaa iai akoaia mairoun Iehova. Ni koauana, e kaotaki n te Baibara bwa ngkana a buaka n akea a na kariaia te Atua ao n angiin te tai a karawawataaki iai. *

3. E AKI KUKUREI TE ATUA NI MATEIA AOMATA AIKA BUAKAKA. Iehova ae te Atua boni Koburaken te maiu ao te tia Karikiia aomata. (Taian Areru 36:9) Mangaia are e bon aki kukurei ni maten te aomata. Ma e kananokawaki bwa iai aomata aika kakaraoi mwakuri aika buakaka ao n tiringia tabeman. (Taian Areru 37:12, 14) Ibukini katokan te buakaka anne, e a tia te Atua n namata te tai are e na kaaitaraia iai aomata aika buakaka akanne. Ma i nanon ririki aika bati ake e kariaia iai tibun Iteraera bwa a na buaka, e teimatoa n “nanoanga” ao n “iremwe n un” nakoia ake a karawawataia tibun Iteraera. (Taian Areru 86:15, BK) N te katoto, e tuangia tibun Iteraera imwain ae a buakana te kaawa bwa a na “kataia moa ni karekea te raoi” bwa e aonga n reke aia tai aomata ni bitii aia iango ao ni katoka te buaka. (Te Tua-Kaua 20:10-13, BK) E kaotia iai Iehova bwa e “aki kukurei ni maten te aomata ae buakaka; ma [E] tangira te aomata ae buakaka ba e na rairaki mani kawaina ma ni maiu.”—Etekiera 33:11, 14-16, BG. *

Ti noria mani baike a tia n taekinaki bwa e boni kariaia te buaka te Atua i aan te tua n taai ake rimoa ibukini katokan ribuaka ao karawawata n aekaia nako. Ma bon tii te Atua ae e na rineia bwa n ningai tain te buaka ao antai ae e na buaka ma tiaki aomata. E koaua bwa e korakora nanon Iehova ni kani buaka n te aro ae iowawa ao n tiritiri? Boni kaitaraan raoi anne. E bon ribaa te tiritiri. (Taian Areru 11:5) E koaua bwa e bita ana iango te Atua ibukin te buaka ngke e moana ana mwakuri ni minita Natina are Iesu Kristo n te moan tienture?