I bungiaki i Paddington ae aonon London i Engiran ae rangi ni mwaiti kaaina. I maeka ma tinau ao karimoau teniman aika aine. E kikitanira tamara ibukin ana kangaanga ma te manging.

Ngke I uarereke ao e reireinai tinau bwa N na tataro ni katoa tairiki. Iai au Baibara ae uarereke ae kanoana tii Taian Areru, ao I a karaoi eeia bwa I aonga ni kona n anenei. I aki kona ni mwaninga te kibuntaeka teuana are I warekia n te taina n au boki ae tiaki bokin te Aro ae kangai: “E na roko te bong ae e nang toki iai te maiu n te aonnaba.” A kairai taeka aikai bwa N na aki mamatu n te tairiki ibukin iangoan taai aika a na roko. I iango ni kangai: ‘E na boni bae ni bati riki ae kantaningaaki ni maiura, e aera ngkai I mena ikai?’ I aki kani mate!

I a rangi ni kan ataa taekan te bwainikawai. I kataia n taetae ma maate, I kawari taiani ruanimate ma raoraou n te reirei, ao ti matakuakini birim aika kakamaaku. Ti iangoia bwa a uaia ni kaunga ao ni kakamaaku naba.

Ngke ai tibwa tebwina au ririki ao e a bure naba maiuu. I a moko n te baakee, ao I a waekoa n tautoronaki n tangirana. Imwina riki ao I a manga bwaati ni moko n te mwaruana. Bon 11 au ririki ngke I reireinai n nima te kamanging. E ngae ngke e aki rin irou nimakina ma I taatangira angina. I taatangira naba te katangitang ao te mwaie. I kaakaei botaki ni kukurei ao taabo n takaakaro ngkana I kona. I aki toki n iraa ni birinako man au auti n te bong ao ni manga iraa n oki imwain ae ota. I namakina te kua n te bong are imwina ao I a aki rereirei. Ngkana I a manga reirei ao I aki toki n nima te kamanging n aoan te reirei.

A rangi ni buakaka au bwi n au kabanea n ririki n te reirei. E a tibwa ataia tinau ae e a rangi ni bure maiuu, ai ngaia are e a bwara nanona ao e a un. Imwini kauntaekara ao I a birinako mani mwengara. I nanon tabeua te tai ao I maeka moa ma raou te mwaane ae arana Tony, ae kaain te Aro ae te Rastafarian. E kakaraoi mwakuri ni kakeru ao kaboonakoan taian drug ao e rangi ni kinaaki bwa te aomata ae rangi n tabare ibukin arona aika rangi n iowawa. I waekoa ni bikoukou ao I a bungia natira te mwaane ngke ai 16 au ririki.

I moani kaitiboo ma kaain Ana Tia Kakoaua Iehova ngke I maeka n te auti teuana ae a mena iai aine ma natiia, aika akea buuia. I anganaki iai au ruu teuana iroun te tautaeka. Iai uoman aine aika taani Kakoaua ake a aki toki ni kawariia aine ake tabeman ake iai naba natiia. N te bong teuana ao I a ira aia maroro bwa I kani kaotia ae a kairua taani Kakoaua. Ma a kaekai au titiraki aika bati ma te taotaonakinnano ao n te aro ae mataata man te Baibara. I rangi ni kaungaaki man aroia ni bwaina te akoi ao te nimamannei. Ngaia are I a kariaia bwa a na reirei ma ngai n te Baibara.

I waekoa n reiakina te bwai teuana man te Baibara are e a bitaki iai maiuu. Mangke I uarereke ao I rarawa ni mate. Ma ngkai I a kunea ana reirei Iesu ae taekan te mangauti! (Ioane 5:28, 29) I reiakinna naba bwa e boni mumutiakinai te Atua. (1 Betero 5:7) E ringaki riki nanou n taeka ake n Ieremia 29:11, ae kangai: “‘Bwa I ataa te bwai ae N na karaoia nakoimi,’ bon ana taeka Iehova, ‘N na anganingkami te rau ao tiaki te kabuanibwai, bwa e aonga n reke iroumi te bwai ae raoiroi nakon taai aika a na roko, ao te kantaninga.’” I a kakoauaa ae I kona ni karekea kantaningaan te maiu n aki toki n te Bwaretaiti n te aonnaba.—Taian Areru 37:29.

A kaotiota nakoiu te tangira ni koaua Ana Tia Kakoaua Iehova. Ngke I moani kaea teuana aia botaki ao I noria bwa e kaotiotaki iai te akoi bwa a rangi ni momoaaomata kaaina ni kabane! (Ioane 13:34, 35) E bon rangi ni kaokoro anne ma aroni butimwaeau n te Aro are I nanako iai. A butimwaeai raoi taani Kakoaua n aki ongei baike I rinanona. A kukurei ni kawarai, a tabeakinai, ao a kakauongo raoi irou, ao a anganai naba ibuobuoki aika bati. I namakinna ae kangaa I a kaaina naba te utu ae bubura ae tatangira aei.

I a ataia man au reirei n te Baibara bwa I riai ni karaoi bitaki nakoni maiuu ni kaboraoia ma ana kaetieti te Atua ibukin te aroaro ni maiu ae riai. E aki bebete irou katokan te moko n te baakee. I noria naba bwa iai katangitang tabeua ake a kauekea riki irou kani mokonakin te mwaruana, ngaia are I a bita te katangitang ae I ongongora. Ibukina bwa I a aki kani manging, I a katoki irakini botaki ni kukurei ao taabo n takaakaro are I kona ni manga kaririaki iai bwa N na koro ni manging. Ao I a kakaaeia raoraou aika boou aika raraoi maiuia ake a na buokai ni maiuu ae boou.—Taeka N Rabakau 13:20.

N te tai anne ao e a reirei naba n te Baibara Tony ma Ana Tia Kakoaua Iehova. E kakoauaa naba Tony bwa bon te koaua te baere e reiakinna, kioina ngke a kaekaaki ana titiraki man te Baibara irouia taani Kakoaua. E karaoi bitaki aika bubura ni maiuna n arona ni kitania kaain ana kaeng aika iowawa, e katoki karaoani mwakuri n iowawa, ao e katoka naba te moko n te mwaruana. Ibukina bwa ti kani kakukureia raoi Iehova, ti a nora naba riaini bitakin aroaroni maiura aika aki riai ao ni karekea te tabo ae kamwengaraoi ibukin natira. Ti mare n 1982.

I uringa te tai are I kakaaei iai kaongora ao rongorongoia aomata ake a a tia n tokanikai ni karaoi bitaki ake I kani karaoi naba, n taiani maekatin aika te Taua-n-Tantani ao te Awake! * I rangi ni kaungaaki n aia katoto! I namakinna ae I kakorakoraaki bwa N na teimatoa ni kataa are I konaa ao n aki bwarannano. I aki toki n tataro nakon Iehova bwa e na aki kaaka taekau. I riki ma Tony bwa Ana Tia Kakoaua Iehova ngke ti bwabetitoaki n Turai 1982.

E kamanoa maiuu karikirakean te iraorao ma Iehova ae te Atua. I a tia naba ma Tony n namakina ana boutoka Iehova i nanon taai ni kangaanga. Ti a reiakina onimakinan te Atua rinanoni kangaanga, ao ti namakinna bwa E aki toki ni buokira ni kateimatoa ara utu.—Taian Areru 55:22.

I rangi ni kimwareirei ni buoka natira te mwaane ao te aine bwa a na ataa Iehova n arou naba. I a manga namakina naba te aeka ni kimwareirei anne ngkai I noriia natiia natiu n ikawairake naba i nanon ataakin te Atua.

E a toki ngkai aki mamatuu n te tairiki ibukin raraomaeakinan taai aika a na roko ke te mate. I rangi n tabetabe ma Tony ni kakawari aia ekaretia aika kakaokoro Ana Tia Kakoaua Iehova ni katoa wiki ao ni kaungaia. Ti iriia naba n reireinia tabemwaang bwa ngkana a onimakina Iesu, ao e kona naba n reke irouia te maiu ae aki toki.