E moanaki te botaki ae kinaaki ngkai bwa Ana Tia Kakoaua Iehova ni banen te ka-19 n tienture. N te tai anne, ao a a moana rinanoan raoi te Baibara te kurubu ae uarereke ae kaainaki irouia Taan Reirei n te Baibara aika maeka i rarikini Pittsburgh, i Pennsylvania, n te United States. A kabotaui aia koaua Aaro ma ana reirei raoi te Baibara. A a moana boreetiani baike a reiakin ni booki, beeba ni kaongora, ao n te maekatin ae aranaki ngkai bwa Te Taua-n-Tantani​—Ae Tataekina Ana Tautaeka n Uea Iehova.

Temanna mai buakoia Taan Reirei n te Baibara aika raoiroi nanoia aikai bon te mwaane ae arana Charles Taze Russell. E ngae ngke e riki bwa te tia kairiri Russell ni karaoan te reirei n te Baibara, ao ngaia naba are e moan tararuaa korean Te Taua-N-Tantani n taai akekei, ma e bon aki katea te Aro ae boou. Tian Russell ao Taan Reirei n te Baibara ake tabeman riki, n aron ae a ataaki iai ngkoa, bwa a na boutokai ana reirei Iesu Kristo ao ni kakairi n ana waaki te ekaretia ni Kristian are n te moan tienture. Kioina ngkai Iesu bon te tia Katea te Aro ni Kristian, ti a kakoauaa naba ae boni ngaia ae e katea ara Aro.​—I-Korote 1:​18-20.