E korea ae kangai te abotoro Ioane ni kaineti ma ana rongorongo ibukini maiun Iesu: “E anga te kaotioti aei teuare noria, ao e boni koaua ana kaotioti, ao e ataia bwa e bon taekini baika koaua, bwa kam aonga ni kakoauaa naba.”—Ioane 19:35.

 Teuana bukina ae ti na onimakin iai rongorongo ake n te Euangkerio ake a koreaki irouni Mataio, Mareko, Ruka, ao Ioane, bwa a koreaki n te tai are a teimatoa iai ni maiu naake a kakoaua n rikini baike a karakinaki iai. Ni kaineti ma booki tabeua, ao a taku bwa e moantaai ni koreaki te Euangkerio ae Mataio bwa wanua te ririki imwini mateni Kristo tao n 41 C.E. A bati taan rabakau ake a taekinna bwa e koreaki rimwi riki, ma angia a taku bwa a bane bokin nako te Koroboki ni Kristian ae Tabu n te Taetae ni Kuriiti ni koreaki n te moan tienture C.E.

 Aomata ake a nora Iesu ngke e maiu n te aonnaba, a nora matena, ao mangautina, a kona n neneri rongorongo aika n te Euangkerio. A kona naba ni kai kaotaraei baika a aki eti ngkana iai. E taku Professor F. F. Bruce: “Teuana te bae korakora n aia uarongorongo moan abotoro bon te aki nanokokoraki nakon aia atatai taan ongora. A aki tii kangai, ‘Taani kakoaua ngaira ni baikai,’ ma a kangai naba, ‘N aron are kam ataia’ (Mwakuri 2:22).”