YOMARA nè pá a vígà págbálà ea bà kọlà​—Marcelo nè Hiver​—beè tõó ene kà ńkem bon ea di Guatemala. Yomara Beè dààmà togó gè zọ̀ Gbò Neǹ Ditõ̀ò Jìhóvà noá Kpá Káí, vaá tṍó e tṍó téní, pá a vígà págbálà beè zọ̀ẹ no nágé. Sõò à íe tã̀àgã̀ ea beè dì. Táaa ọ̀và beè gbò gímá dẽe, vaá bà náa ólò láá bugi kpá gbò gímá dẽe. Boo béè vó, nen ea ólò noòmà va Kpá Káí ólò bugi gbò kiẽ́e e bà gé nó nè gbò dọ̀ Kpá Káí ea di m nèva.

Ge sí nònù beè dú dõòna kà nù ànà-ànà. Áá ọ̀và náa é láá tú 40 mínìt kyã̀àmà iná Kíndòm Họ́ọ̀l ea dì vá kuló. Sõò pá vígà beè olòó tú faà dààmà va siimá nònù kọ̀láá dee. Tṍó e táaa ọ̀và daamà togó gè ié nù gè naa gbẹá nònù èèlè nyíè zẹ̀ẹ̀ sè, pá vígà beè olòó tení boo nèva naa ní ea é gbẹ́a vá togó kọbé bà láá naa.

Ló May 2019, ba beè gbóó dààmà togó gè sẹlẹ nònù gbẹá ba bon. Tṍóá, ene kà dóm nèva e bà di boo sìtóm kọ̀ kpẹ̀a dénè tṍó a íná boná. Ba beè beeláfùl ge noomà va kọ bàá láá bugi vaá emí kpá gbò gímá dẽe, náa kal ló béè kọọ̀ baala náa beè láá olòó bugi àbèè ge emí. Ba beè kil kiẽ́e e bà ólò sẹlẹ kpá gè bugi gé nó bé e gbò gímá ólò bugi nu vaá emí nu naa, nè bé e bàé láá noomà dõòna gbò kọ bàá naa vó naa.

Sìgà ẽ́ aa ló tṍóá, táaa ọ̀và beè gbóó láá bugi kpá gbò gímá dẽe, vaá a beè nvèè bá nèva kọ bàá sìm kilsĩ́ mm̀ ba gè fã̀ Bàrì. a Kátogóí, Yomara, Marcelo, nè Hiver a dú gbò gyà deèsĩ́ tóm kọ̀ kpẹ̀a dénè tṍó. Marcelo a dú neǹ nvèè bá sìtóm. Dénè ọ̀và dì e bà gé tú agẹbá siimá tóm nè Jìhóvà buù sè. Ba sìà kpóó ló beè naa kọọ̀ pá vígà á ié bẹ̀à sã́ bùlà.

Nyíè táaa ọ̀và beè palàge ẹẹ ló bé e pá vígà nveè bá nèva naa. Yomara kọ́ọ̀, “Lọl túá tṍó e beè zọ̀ gbò Neǹ Ditõ̀ò Jìhóvà naaá nu, ba beè zogè kọọ̀ bà íèè kà kà vulà.” Marcelo kọ́ nágé kọọ̀, “È beè ié gbò lé kóò gbẹá bẹẹ bõ̀ònatõ̀ò, vaá dṹùnà pá tọ e bà vulà beeá ló bàlà booí.” Yomara nè pá a vígà gé élá bànà tṍó e Jìhóvà é tú boo kunukẽ̀í naamá páladaìs.​—Ps. 37:​10, 11; Àìz. 35:5.