ƝAAKWƐLƐI 11

Pələi ya pɛli ə́ wɔ Biblə ɓoɔ dɔlɔ kulɔi la kpɔ a neelee

NWOO MƐN

Yaa ta kóló kɛnɛ ta kɔwɔtɔɔ, yii ə́ gaa yɛ́ ma gɛ laa ho kɛ nɛɛli ? Ə gɛ ə́ yee yɛ pɛli tɛɛi gólói tii ɓa ə́ kɛi gɛ a bɛlɛɛ-pɛlɛɛ. Bələ lɔ ɓə gaa la gwa gɔwɔtɔɔ guɔ Biblə ɓo. Ya pɛli kiɛ ə́ kpɔɔ maaləngɛi yɛ́ kɛ ma ‘ minɛ pələ ɓə ŋa gɔwɔtɔɔ la ? ’ Ɲaakwɛlɛi ŋɛi hu, gu kaa pai mɛni pɛlɛɛɠaa kaai yii ya pɛli gɛi ə gɛ yɛ́ ə́ wɔ Biblə ɓoɔ ɲaanɛɛ kulɔ da ə́ wɔ Biblə kalanŋaa.

1. Lə mɛni ɓa maanɛɛ guɔ Biblə ɓo kɛlɛ-kɛlɛ ?

Biblə kaa a ‘ Zehova ŋɔ tɔn-nwoo. ’ Nui a mo kɛlɛ-kɛlɛ, a kwəinɛɛ hɔlɔɓo ə lɛɛ yii lɔpee a gɛ ɉu a nɛɛ (Maatɛnɛ 1:1-3 ɓo). Gɔwɔtɔɔ yɛ́ mo a bɛlɛɛ-pɛlɛɛ holo kəlee. Ə́ kaa lɔ kɛi Biblə kɔlɔn ɉii, Biblə ɓo wɛli yɛ too yɛ́.

2. Ya tɛɛ ləi ə́i wɔ Biblə ɓoɔ dɔlɔ kulɔ kpɔ ə neelee ?

Ə gɛ yɛ́ pɛli ə́ wɔ Biblə ɓoɔ dɔlɔ kulɔi, ya kɛi mo, maanɛɛ ə́ tɔɔ yii ə́ kaa moi yɛ́ ə́ kiliŋahiɛ ma. Yili ɓa maanɛɛ guɔ Biblə ɓo ə lɛɛ ‘ guɔ gu kiliŋahiɛ ma ’ (Ɉosue 1:8). Ya kɛi Biblə ɓo, kɛɛmaalənŋaa kɛ ə́ kpɔwɔ ɓa, yɛ pələi yiiɠaa ŋɛi kaa la : Lə ɓə vɛlisɛɛɠaa ŋɛi da galan máá yɛ hwilɛn na Zehova Yálá ɓa ? Ŋa pɛli bɔ túwɔ́ ɓoi ləi ŋɔ yɛnɛɛ hu ? Ŋa pɛli kpɔnmaa tɛɛ la ləi nu takpɛliɠaa pɔ ?

3. Ya pɛli lowai hɔlɔɓoi ləi yii yaan yɛ́ pɛli Biblə ɓoi ?

Gɛ laa walaa ə́ yəi, yɛ́ pɛli lowai hɔlɔɓoi Biblə ɓo mɛni ɓa ? Yɛ́ tɔnɔ lɔ hwəi mɛnii tii a həli yɛ́. Kəlaa ya ‘ pɛli mɛniɠaa kulɔ ɉu kɛi, yii nɛlɛɛ, a wala kɛtii yii vialaɓoɔ ə́ gɛ ’ (Filipə 1:10). Ya pɛli yili kɛi tii a ɓɛlowai ya lowai ta həɠə la ɉu yɛ́ Biblə ɓo a holo kəlee. Nutaɠaa da lowai həɠə yələwalapɔ diɛ Biblə ɓo. Daɠaa diɛ Biblə ɓo holoŋa. Dakpɛliɠaa da lowai həɠə yələwilii diɛ Biblə ɓo diɛ təɠa li laai. Yáán lowai ləkɛɛ ɓə yaa gaa yɛ́ ma ɓɛliɛ kpɔ yɛ́ a neelee ?

Ə́ WƆ MƐNIKƆLƆNŊAA TA PƐLƐ MA

Gaa yii ya pɛli gɛi, ə gɛ yɛ́ pɛli ə́ wɔ Biblə ɓoɔ ɲaanɛɛ kulɔi. Ə lɛɛ gaa pələi ya pɛli ə́ wɔ Biblə kalanŋaa tɔwɔ pɛlii la, ə gɛ ə́ dɔlɔ kulɔ kpɔ a neelee.

Gwa pɛli gu mɛni kəlee kɛ, Biblə ɓoɔ wɛli ə too guɔ. Gwa pɛli gu yili kɛ pələ maakwɛli, yɛ pələi lɔ gwa kɔnɔn dakpɛli mɛɛ maakwɛli la yii yaan nwɛli ə too guɔ

4. Pələi ya pɛli ə́ wɔ Biblə ɓoɔ ɲaanɛɛ kulɔi la

Gwa gɔwɔtɔɔ guɔ Biblə ɓo, gɛ laa ho kiɛ pai kɛi a nɛɛ. Kəlaa ya pɛli ə́ nowai tii kɛ a lowai ɲaanɛɛ. Gɛ pələ kaa lɔ yɛ nu ya gɔwɔtɔɔ yɛ kɔnɔn ninɛ mii. Piɛrə dɔlɔɔ 2:2 ɓo, ə lɛɛ ka lono kɛ gɛɛmaalən ŋɛi mɛi :

Ə́ wɔ kili ɓa, ya gɔwɔtɔɔ yɛ́ Biblə ɓo holo kəlee, nwɛli kaa pai tooi yɛ́, ə lɛɛ ə́ kaa pai kɛi nowai tii maakpɔn ɉii a kwəinɛɛ ?

VIDIO kaa, ə lɛɛ ə́ gaa pələi muhəɠəninɛɠaa di gɔwɔtɔɔ diɛ Biblə ɓoɔ wɛlilakɛ la. Ə lɛɛ ka lono kɛ gɛɛmaalənŋaa ŋɛi mɛi.

VIDIO : Pələi muhəɠəninɛɠaa di Yálá Lawoo ɓoɔ wɛli too la diɛ kpinii diɛ (5:33)

Vidio hu, mɛni ləkɛɛɠaa ɓə kɛ gɛ laa ho kɛ nɛɛli muhəɠəninɛɠaa tii yəi ?
Lə ɓə kpɔnmaa tɛɛ di pɔ, Biblə ɓoɔ ŋɛi di gɔwɔtɔɔ, di ho dɔɔ ?
Lə ɓə di gɛ ə gɛ di wɔ Biblə ɓoɔ ɲaa yɛ nɛɛ ?

Mɛniɠaai da pɛli kpɔnmaa tɛɛ ə́ pɔ, ə́ Biblə ɓoɔ kɔwɔtɔɔ :

Bibləɠaai daa ɉu woo pɛɛn a teɲa, ə lɛɛ ɲaakaa laa nɛɛ, ya ɓə maanɛɛ ə́ ɉəɠə ɉu. Ya pɛli ə́ Traduction du monde nouveau ɓo akɛ gaa ə́ lawoo hu, awala kɛtii akɛ gaa híín-woo ta hu yii ya pɛli ɲaakaai.
Gɛɛnaaɠaai nwɛli kaa yɛ́ Biblə hu, ə́ wɔ Biblə ɓoɔ kɔwɔtɔɔ naa. Ya pɛli ə́ gɛ pələ taɠaa kaa ɓɛi ŋɛi gaa laa pɛɛn ni “ Biblə ɓoɔ kɔwɔtɔɔ. ”
Ɓɛi ya kpəlan naa, bɛɛn. Kóló kɛ, ɓɛi ŋɛi gaa laa pɛɛn ni “ Ɲɔ́ Biblə ɓoɔ ” yai gaa ɉɛɓɛi ŋɛi hu.
Kóló kɛ a JW Library^®. JW Library a kɛ ə́ wɔ telefɔni hu awala kɛtii yɛ ɓo ə́ wɔ hwaa kwɛli takpɛliɠaa hu, ya pɛli ə́ Biblə ɓo la, ɓɛi lɔpee ə́ kaa laa awala kɛtii ə́ nwoo mɛn.
Kóló kɛ a gɛɛnaa takpɛliɠaa ŋɛi ku wɔ Biblə Gɛɛnaa takpɛliɠaa tii, woo wala-walaɠaa mukulaaɠaa da hɔlɔɓo laa, tabloɠaa, ə ma kɛ karteɠaa. Yili kəlee a pɛli ə́ wɔ Biblə ɓoɔ ɲaanɛɛi.

5. Ə́ wɔ Biblə kalanŋaa tɔwɔ pɛli

Maatɛnɛ 119:34 ɓo, ə lɛɛ ka lono kɛ gɛɛmaalən ŋɛi mɛi :

Gɛɛ hó Biblə ɓo, awala kɛtii hó ə́ wɔ Biblə kalanŋaa tɔwɔ pɛli, lə mɛni ɓa mɛni lɛlɛɛ ɓa ə́ gbea nii Yálá hwɛli ?

Mɛni ləkɛɛɠaa ɓə ya pɛli gɛi yii yaan ka kɛi Biblə kalan yɛ́ pɛli dɔlɔ kulɔi kpɔ a neelee ? Ya kɛi ɉɛɓɛi ŋɛi ɲaakwɛlɛi ta tɔwɔ pɛli, mɛniɠaa ŋɛi kɛ :

Ya ɲaakwɛlɛi tɔnɔ həɠə, balagalafəɠaa ɉɛɓɛ kɔwɔtɔɔi gəlee ɓo ə lɛɛ la ɉu ə́ həli la ɓɛi bɛɛn laa “ ə́ wɔ mɛnikɔlɔnŋaa ta pɛlɛ ma. ”
Vɛlisɛɛɠaa kwɛli ə́ di ɓo ə lɛɛ ə́ gaa pələi vilɛnŋaa la giliŋahiɛɠaa ɓa diɛi balagalafəɠaa hu.
Woo tɛi-tɛiɠaa həɠə gɛɛmaalən mukulaaɠaa hu, ə́ mu laa. Yili kaa pai kpɔnmaa tɛɛ ə́ pɔ, nui a kɛ Biblə kalan ɉii yɛ́, ka yaa ka lono kɛ.

Ə́ kili kaa ɉu ?

Zehova ŋɔ Kəlaɠaa daa kóló kɛ a Biblə tamaa. Kəlaa yii kpɔ nwɛli kaa kuɔ ya ɓaa Traduction du monde nouveau maahɔlɔɓo ɉu woo pɛɛn a teɲa, ɲaakaa laa nɛɛ ə lɛɛ Yálá laa yɛ ɓə ɉu. Ɉɛɓɛi ŋɛi gwɛli yɛli ɓa gaa “ Zehova ŋɔ Kəlaɠaa di wɔ Biblə kaa mɔɔn a dee ? ”

NUTAƓAA DA KƐ KƐI MA : “ Biblə kalanŋaa kaa a mɛni yii gɛ laa walaa kpɔ kɛnɛ. Yili kɛ hwaŋa ho ɲə́i ə lɛɛ yili ŋɔ lowai ho ɲə́i. ”

Yáán, ya ə́ kiliŋahiɛ ləi ?

YII GU GALAN

Ə gɛ yɛ́ pɛli ə́ wɔ Biblə ɓoɔ dɔlɔ kulɔi kpɔ a neelee, lowai ta həɠə ɉu yɛ́ mo holo kəlee. Yálá hwɛli ə gɛ yii ə́ kaa moi yɛ́ pɛli ɲaakaai ə lɛɛ ə́i wɔ Biblə kalanŋaa tɔwɔ pɛli.