Gɛ laa nɛɛ ə́ lɛɛ ə́ kaa nua woo mu a lowai lɔpee ? — Lowai taɠaa gɛ la walaai. Gbaɠala ə kɛ yɛ́ yɛ́ ma Zesu ə lɛɛ gaa nua da Zehova di woo mu ? — Ŋɔ kɔɔmaa a pɛli kpɔnmaa tɛɛ ə́ pɔ ə́ lɛɛ ə́ kaa nua woo mu ɓɛlowai gɛ laa ho nɛɛ li la. Gu yili hukulaa kaa.

Gɛɛ Zesu ho pa lɔi mɛi, ə kɛ yələkɔlɔn ɉu da nan Zehova. Kɛlɛɛ nua di kɛ lɔi mɛi diɛ ɓo a Zesu kaa nua. Di laa ɓaa kɛ Zozɛfu da Mali. Pələi di tɛɛ la diɛ kɛ a Zesu kaa nua ə́ gɔlɔn ? —

Zehova ə Zesu ŋɔ yɛnɛɛ həɠə yələkɔlɔn ɉu ə dɛɛ Mali kwəi ə gɛ di Zesu kaa lɔi mɛi ə lɛɛ ə yɛnɛɛ kɛ lɔi mɛi. Yili ə kɛ a kpalo mɛni ! Zesu ə kɛnɛ Mali kwəi yɛ pələi lon dalaɠaa da kɛnɛ la di lee ni kwəi. Ŋalən mɛinaan tɛɛ pulu, di Zesu kaa. Pələ ɓə Mali da ɉilɛ Zozɛfu di kɛ la a Zesu kaa nua lɔi mɛi.

Ɓɛlowai Zesu ə kwəlan 12 hɔlɔɓo la, ə mɛni ta kɛ yii ə nɛ pələi nan Zehova wɛli kaa la ma. Yili ə kɛ ɓɛlowai Zesu da di yəi bɛlɛn nua di hiɛ kweaa ta kulɔ la Zolosalɛmu Paakə hɛli pu mɛni ɓa. Pənəi di mo diɛ pa di pɔɔli, Zesu ə pili Zozɛfu da Mali di yəi. Ɓɛi Zesu ə kɛ laa ə́ naa kɔlɔn ? —

Zozɛfu da Mali di yali di pulu kpɔ ɉaɉa də li Zolosalɛmu Zesu kwɛlii. Liihɛlɛn ə kɛ diɛ maahɔlɔɓo di ho kɛi Zesu kaa. Kɛlɛɛ holo haaɓa tɛɛ pulu, di Zesu kaa Yálá hwɛli pɛlɛ mu ! Mɛnii Zesu ə kɛ la Yálá hwɛli pɛlɛ mu ə́ gɔlɔn ? — Maahɔlɔɓo a pɛli kɛ nan Zehova maa mɛni kɔlɔn ɉii laa. Zehova wɛli ə kɛ ma, ə lɛɛ ə kɛ bɔ ə yili liiɓa kɛ pələ kɔlɔn. Ə ma kɛ ɓɛlowai Zesu ə kɛnɛ la, ə lɛɛ ə kɛ́ a hulɔnu, ho ta kɛ kulɔ li Zehova woo mu. Zesu ho ta kɛ kulɔ nwoo mu laa kɛ li, ə ma kɛ ɓɛlowai gɛ laa ho kɛ nɛɛ li la, yili mukulaa ɓaa maanɛɛ kɛ ə mɔnɔ mɛɛ. Zesu ə lɛɛ Zozɛfu da Mali diɛ kpɛli di woo mu ? — Ee, Biblə a mo yɛ ə gɛ tii.

Kili ləkɛɛ ɓə ya pɛli ɉɔlɔɓoi Zesu túwɔ́ pələ hu ? — Maanɛɛ ə́ lɛɛ ə́ kaa nua woo mu ə ma kɛ gɛ laa ho nɛɛ li. Ə́ kaa pai yili kɛi ? —