DE TÓDALAS oracións cristiás, moitos consideran que a máis repetida é o nosopai, unha oración que ensinou Xesús. E, con todo, tamén é das menos comprendidas. Millóns de persoas repítena de corrido día tras día, mesmo varias veces ó día, sen pensar no que implica. Pero Xesús nunca quixo que se fixese así. Por que o sabemos?

Porque, xusto antes de ensinala, el mesmo dixo: “Cando vos poñades a rezar non sexades lareteiros [ou: “non usedes vas repeticións”, Reina-Valera, 1960]” (Mateo 6:7). E Xesús non se ía contradicir xusto despois ensinando unha oración que tivese que memorizarse e repetirse palabra por palabra, non cres? O que Xesús quería era ensinar cales debían ser os temas prioritarios ó orar. Así pois, analicemos en detalle ese modelo de oración que aparece en Mateo 6:9-13.

Para empezar, Xesús lémbralles ós seus discípulos que as oracións deben dirixirse unicamente ó seu Pai, Xehová. Pero por que di despois que o seu nome precisa ser santificado?

Porque, xa dende o principio da historia, o nome de Deus foi obxecto de calumnias. O seu inimigo, Satanás, dixo que Xehová é un mentireiro e un egoísta, e que non ten dereito a gobernar as súas criaturas (Xéneses 3:1-6). Os que se puxeron do seu lado ensinan que Deus é insensible, cruel e vingativo ou mesmo negan que crease tódalas cousas. Algúns ata quitaron o nome de Deus da Biblia e prohibiron usalo.

Con todo, as Escrituras prometen que Deus acabará con esa inxustiza (Ezequiel 39:7). E cando o faga, tamén se encargará de tódalas túas necesidades e problemas. Como o fará? Xesús explícao xusto despois.

Hoxe, os mestres relixiosos non se poñen de acordo sobre que é o Reino de Deus. Non pasaba o mesmo en tempos de Xesús. O pobo xudeu coñecía ben as antigas profecías que falaban dun Mesías, un Salvador escollido por Deus, que dirixiría un goberno que cambiaría o mundo (Isaías 9:5, 6 [9:6, 7, TNM]; Daniel 2:44). Ese goberno divino santificará o nome de Xehová sacando á luz as mentiras satánicas, derrotando o Demo e poñendo fin a tódalas súas obras. Entre outras cousas, acabará coa guerra, a enfermidade, a fame e mesmo coa morte (Salmo 46:10 [46:9, TNM]; 72:12-16; Isaías 25:8; 33:24). De modo que cada vez que lle pedimos a Deus que veña o seu Reino, estámoslle a pedir que se cumpran estas promesas.

Estas palabras garanten que a vontade de Deus se cumprirá na Terra igual que xa se cumpre nos ceos, onde vive Deus. Alí, nada pode impedir que se faga a vontade de Deus. De feito, Xesús xa derrotou a Satanás e o seu exército no ceo e botounos á terra (Apocalipse 12:9-12). Esta terceira petición, igual que as anteriores, lémbranos a importancia de concentrarnos na vontade de Deus, e non na nosa. Ó fin e ó cabo, nada beneficia tanto toda a creación como que se faga a Súa vontade. Mesmo Xesús, malia ser perfecto, dixo: “Que non se faga a miña vontade, senón a túa” (Lucas 22:42).

Xesús tamén indicou que algunhas das nosas peticións poden ser máis persoais. Como vemos, non hai nada de malo en orar para que Deus nos axude a satisfacer as nosas necesidades diarias. De feito, ó facelo, estamos a recoñecer que é Xehová quen “a todos dá vida e alento” (Feitos 17:25). A Biblia compárao a un pai cariñoso que desfruta de darlles ós seus fillos o que precisan. Pero, coma un bo Pai, nunca lles dará algo que poña en perigo o seu benestar, por moito que llo pidan.

Que débeda temos con Xehová? E por que necesitamos que nola perdoe? Aínda que moitos neguen a súa existencia ou minimicen a súa gravidade, a Biblia explica que o pecado é a orixe dos nosos peores problemas, entre eles a morte. E como nacemos pecadores, cometemos erros que ofenden a Deus. Así pois, se queremos vivir eternamente, é imprescindible que Deus nos perdoe esta débeda (Romanos 3:23; 5:12; 6:23). Pero a Biblia tamén nos lembra que Xehová é bo e está disposto a perdoarnos (Salmo 86:5).

Os seres humanos necesitamos urxente e desesperadamente a protección divina. Quizais moitos se neguen a crer na existencia do “Malo”, é dicir, de Satanás. Non obstante, para Xesús era moi real; de feito, chamouno “o príncipe deste mundo” (Xoán 12:31; 16:11). Non contento con corromper e manexar ó seu antollo este mundo, o Demo tamén quere corrompernos a nós e así impedir que cultivemos unha estreita relación co noso Pai, Xehová (1 Pedro 5:8). Pero non temos razóns para terlle medo, pois Deus é moitísimo máis forte e desexa protexer a quen o ama.

Por suposto, hai moitos outros temas sobre os que podemos orarlle a Deus. En 1 Xoán 5:14 di: “estamos certos de que nos escoita, se o que lle pedimos está conforme coa súa vontade” Noutras palabras, podemos contarlle a Deus tódalas nosas preocupacións, sabendo que nunca as considerará de pouca importancia (1 Pedro 5:7).

E que se pode dicir do momento e o lugar para orar? Di a Palabra de Deus algo sobre iso? Responderemos esta pregunta no seguinte artigo.