Todo parece indicar que Miguel, coñecido nalgunhas relixións como “San Miguel”, é o nome que recibe Xesús antes e despois da súa vida na Terra. a A Biblia explica que Miguel discutiu con Satanás despois da morte de Moisés e que axudou a un anxo a levarlle a mensaxe de Deus ó profeta Daniel (Daniel 10:13, 21; Xudas 9). Ó defender a autoridade de Deus e loitar contra os Seus inimigos, Miguel demostrou ser digno de levar ese nome, que significa “Quen é coma Deus?” (Daniel 12:1; Apocalipse 12:7).

 Por que podemos chegar á conclusión de que Xesús é o arcanxo Miguel? Vexamos tres razóns.

•   Miguel é o “arcanxo” (Xudas 9). O título “arcanxo” significa “xefe dos anxos” e só aparece dúas veces na Biblia. Nos dous casos a palabra está en singular. Iso significa que só hai un anxo que leva ese título. Nun deses textos dise que o resucitado Señor Xesús “descenderá do ceo cunha orde, con voz de arcanxo” (1 Tesalonicenses 4:16, TNM). Xesús ten voz de arcanxo porque el é o arcanxo Miguel.

•   Miguel está ó mando dun exército de anxos. “Miguel e os seus anxos combateron contra o dragón”, Satanás (Apocalipse 12:7; cursiva nosa). El ten moita autoridade nos ceos, por iso se lle chama “un dos xefes principais” e “o gran príncipe” (Daniel 10:13, 21; 12:1). Estes títulos identifican a Miguel como “o comandante en xefe dos exércitos de anxos”, como di David E. Aune, especialista no Novo Testamento.

   A Biblia só menciona outro nome para referirse a alguén que ten autoridade sobre o exército dos anxos. Describe o Señor Xesús “vindo do ceo cos anxos do seu poder, con labaradas de lume para lles da-lo castigo ós que non queren recoñecer a Deus” (2 Tesalonicenses 1:7, 8; Mateo 16:27). Xesús “subiu ó ceo e está á dereita de Deus, despois que se lle someteron os anxos, os poderes e as forzas” (1 Pedro 3:21, 22). Non tería moito sentido que Deus nomease a Xesús e a Miguel como comandantes rivais sobre os anxos. É máis razoable chegar á conclusión de que os dous nomes, Xesús e Miguel, se refiren á mesma persoa.

•   Miguel “alzarase” durante unha “época de angustia” sen precedentes (Daniel 12:1). No libro de Daniel, a expresión hebrea que se traduce “alzarase” ou “xurdirá” adoita referirse a un rei que inicia unha acción especial (Daniel 11:2-4, 21). Xesucristo, a quen se lle chama “Palabra de Deus”, iniciará unha acción especial como “Rei de reis” para acabar con tódolos inimigos de Deus e protexer o Seu pobo (Apocalipse 19:11-16). Vaino facer durante un tempo de “gran angustia, como non a houbo desde o principio do mundo” (Mateo 24:21, 42).