Bible Devachea preronnan boroilolo. To Hebrev, Aramaik ani Grik bhaxent boroil’lo. Punn ‘soglea raxttrantlea lokank’ Devachea utrantlean modot zaunk tem zaitea bhasamnim bhaxantor korop gorjechem asa. (Matev 24:14) Matev tem Prokasovnni poriant soglim mellon 27 pustokam asat ani tim Kristi Xokachea poilea xekddeant boroilʼlim. Devachea preronnan boroilʼlea hea pustokank “Grik Bhaxent Boroilʼlim Pustokam” mhunnttat, karonn tim Grik bhaxent boroilʼlim.

Bible—Novo Sonvsar Bhaxantor—Matev tem Prokasovnni sogleant poilim Inglez bhaxent 1950-ant bhair kaddlo. Hem bhaxantor eka famad Grik ttexttacher adarit asa zaka Westcott ani Hort Grik ttextt mhunnttat. Hem ttextt hatan boroilʼlea sogleant adlea Grik kopincher adarit asa. Novo Sonvsar Bhaxantor-ant hea Grik ttexttachem visvaxiponni bhaxantor kelam. Konkani bhaxent hem bhaxantor Inglez 2013 edition-acher adarit asa. Inglez bhaxen bhaxantor kortana zoxem Grik ttextt visvaxiponnim bhaxantor korcho proitn kela, tosoch Konkani bhaxent bhaxantor kortana-i proitn kela.

Bible—Novo Sonvsar Bhaxantor—Matev tem Prokasovnni hantunt Devachem nanv 237 pavtti asa. Devachem nanv povitr korop hem sogleant chodd mhotvachem zaun asa. Toxench, taronn mellonk lokamnim Devak hea nanvan ulo marop gorjechem asa. He mhotvache mudʼde ugddas dovrun hea bhaxantorant Devachem nanv tem asonk zai aslem tea soglea zageancher porot ghatlam.—Matev 6:9; Romkarank 10:13.

Hea bhaxantorak Novo Sonvsar Bhaxantor hem nanv dilam karonn Devan soglea munxakulla pasot ek novo sonvsar haddttolo mhunn utor dilam, zoim nitivontponn astolem. (2 Pedru 3:13) Hachem bhaxantor kelam tim, Bible dila tea Devacho khub mog kortat. Devachim chintnam ani tannem sanglolim utram zata title bore bhaxen ani sarkim, lokam thaim pavounk apunn Deva mukhar zobabdar asat mhunn tim manun ghetat. Hem bhaxantor vachtolea soglea khaltea kallzachea lokank, mhunnche, “sotachem khorem ginean” axetoleank, hem bhaxantor moladik zaunchem mhunn ami magtat.—1 Timotak 2:4.