Juanvak dilʼli Prokasovnni 7:1-17
7 Tea uprant hanvem char devdutank, prithumechea char konnxeancher ube aslole polloile. Prithumecher, doriacher vo khoinchea-i zhaddacher varo marina zaunk te prithumechea charui vareank ghott dhorun asle.
2 Ani hanvem udente thaun anik ek devdut voir sorta to polloilo. Tachea lagim jivea Devacho xikʼko aslo. Prithumecho ani doriacho nas korunk odhikar dilʼlo tea char devdutank tannem mottʼttea avazan ulo marlo,
3 ani oxem mhunnttlem: “Ami Devachea chakranchea koplar xikʼko marinant tea meren, prithumek, doriak vo zhaddank luksonn korinakat.”
4 Ani xikʼko marloleancho ankddo 1,44,000 mhunn hanvem aikolem. Tankam Izraelachea putanchea dor eka kulla thaun ghetlole:
5 Juda kullantlea 12,000-ancher xikʼko marlo;Ruben kullantlea 12,000-ancher;Gad kullantlea 12,000-ancher;
6 Asher kullantlea 12,000-ancher;Naftali kullantlea 12,000-ancher;Manase kullantlea 12,000-ancher;
7 Simeon kullantlea 12,000-ancher;Levi kullantlea 12,000-ancher;Isakar kullantlea 12,000-ancher;
8 Zebulun kullantlea 12,000-ancher;Juze kullantlea 12,000-ancher;Benjamin kullantlea 12,000-ancher xikʼko marlo.
9 Polloiat! Tea uprant hanvem lokancho ek vhoddlo zomo polloilo, zo khoinchoch munis mezunk xokonaslo. Ho zomo soglea raxttram thaun, kullam thaun, zatim thaun ani bhaxe thaun aslo. Te dhove kopdde ghalun, xinvasona mukhar ani Menddrea mukhar ube asle. Tanchea hatamnim khazurachea zhaddacheo chuddtteo asleo.
10 Ani te mottʼttea avazan porot-porot oxem mhunnttale: “Amchea taronna pasot, xinvasonar boslolea Devache ani toxench Menddreache ami upkar attoitat.”
11 Ani sogle devdut, je xinvasonachea ani vhoddilanchea ani char jivea pranneanchea bhonvtonnim ube asle tannim xinvasona mukhar dimi ghalun Devachi bhokti keli,
12 ani oxem mhunnttlem: “Amen! Amchea Devachi sodanch vakhannʼnni ani mhoima zaum, ami tachech upkar attoum, ani toxench zannvai, man, xokti ani boll sodam-sodankal tachench asom. Amen.”
13 Hem polloun eka vhoddilan mhaka vicharlem: “Dhove kopdde ghalun asat te konn ani te khoim thaun aileat?”
14 Tednam rokddench hanvem taka mhunnttlem: “Mhojea somia, he konn te tum zannam.” Tannem mhaka mhunnttlem: “Te vhodd sonkoxtta thaun bhair sorlole lok. Tannim aple kopdde Menddreachea rogtan dhuvun dhove keleat.
15 Teach pasot te Devachea xinvasona mukhar asat. Te dis ani rat tachea mondirant tachi povitr seva kortat. Xinvasonar boslolo asa to tancher aplo tombu posraitolo.
16 Te kednanch bhukelʼle vo tanelʼle aschenant. Toxench tankam suriachem koddok vot vo hulop lagchona.
17 Karonn xinvasona lagim* asa to Menddro, gonvllea bhaxen tankam jivitachea udkachea zhori lagim vhortolo. Ani Dev tanchea dolleantlim soglim dukam pusun kaddttolo.”
Footnotes
^ Vo “modem.”
