YOMARA, ani tache bhav, Marcelo ani Hiver, Guatemala-chea eka lhan ganvant ravtat. Sogleant poilim, Yomara-n Sakxeam sangata Bible obheas suru kelo. Ani tea uprant tache bhavui xikonk lagle. Punn ek oddchonn asli. Tankam tigankui dixtti poddonaslem ani tankam braille bhasui vachunk kollonasli. Tea pasot, tancho Bible obheas ghetalo to bhav tanche pasot peregraf ani Bible-antlim versam vachtalo.

Toxench, mittingek hajir zaunk pasun tankam sompem naslem. Karonn tanchea ghora thaun, lagxilʼlem Raj-ghor 40 minttam pois aslem, ani ti ekttinch provas korunk xokonaslim. Tor bhav-bhoinnamnim tankam soglea mittingenk vhoronk manddavoll keli. Ani tankam sobheche modle mittingek vidʼdheartheache bhag mellonk lagle tednam, te tonddpatt korunk bhav-bhoinnamnim tankam modot keli.

May 2019-ant, tim ravtalim teach ganvant mittingo zaunk lagleo. Tednam mhunnosor, niemit pioneer seva korpi ek zoddpem thoim ailem. Hea zoddpeak braille bhas vachunk ani borounk ienaslem. Tori astana, tannim tea tigui bhav-bhoinnank modot korunk nichov kelo. Tea pasot, dusreank braille bhas koxi xikounk zata tem zannam zaunk, tannim library-nt vochon braille bhaxe vixim pustokam haddlim.

Thoddeach mhoineam bhitor, him tigui bhav-bhoinnam braille bhas sompeponnim vachunk xiklim. Oxem kelolean, Jehova sangata tanchi ixttagot anikui ghott zali. a Aiz tim tigaim niemit pioneer seva kortat, ani Marcelo sobhecho sevok zaun asa. Tim dor disa urben Jehovachi seva kortat. Ani tanchi urba polloun, herankui urba melltta.

Sobhentlea bhav-bhoinnamnim tankam mogan tenko dilʼlea pasot, Yomara, Marcelo ani Hiver khub upkari asat. Yomara sangta: “Jehovachea Sakxeank hanv poilech pavtti mellʼllem tednam thaun aiz meren, hanvem khoro Kristi mog onubhovla.” Toxench, Marcelo sangta: “Amkam sobhent ekdom borim ixttam asat, ani mogan ani ekvottan jietolea sonvsarbhor aslolea familicho ami bhag zaun asat.” Yomara ani tache bhav, Jehova hi prithum ek Sobit Bag kortolo tea vellak axeun ravleant.—St. 37:10, 11; Iz. 35:5.