INDONESIA-NT, Sangir Besar hea lhan zunvear amcheo tin Kristi bhoinno ravtat. Thoincho lok tankam, tim dusreank Bible xikonk modot kortat mhunn vollkhota. Punn thoddea vorsam fattim, tim thoinchea doria deger ek vegllem kam kortalim. Tem koslem?

Poilim, tim tigaim doriant voitalim ani vhoddle fator ubarun deger haddttalim. Tantuntle thodde fator football-a itle vhoddle astale. Uprant tim lakddachea stool-ar boson, moddttel gheun tanche barik kuddke kortalim. Tim tea fatranche, kombiechea tantia poros lhan kuddke kortalim. Ani magir, te plastic-achea baldeamnim bhorun, tim ravtalim thoim gheun voitalim. Thoim vochonk tankam panvdde choddonk poddttale. Uprant te kuddke kelʼle fator truck-ancher ghalunk lagon, tim te vhoddlea potiamnim bhortalim. He fatranche kuddke rosto korpachea kamant uzar zatale.

Tanchea modlea eke bhoinnichem nanv, Hulda zaun asa. Tichea poristhitik lagon, her donui bhoinnam poros ti chodd vell hem kam korunk pavtali. Ani hem kam korun mellttale te sogle poixe ti ghor cholounk uzar kortali. Punn atam ti anikui thodde poixe zoddunk sodhtali. Kiteak? JW Library^® app uzar korunk tika tab gheunk zai aslo. Tea app-ant aslolea video ani prokaxonam vorvim, porgottnnechem kam anik bore toren korunk, toxench Bible-acho obheas korun to anik bore toren somzonk tika modot zatoli mhunn ti zannam asli.

Dhedd mhoinea pasot dor sokallim, anikui don voram tinnem fator foddpachem kam kelem. Ani oxem korun tika je poixe mellʼlle, tea poixeamnim ti tab gheunk pavli.

Hulda sangta: “Fator foddun hanv ekdom thoktalem, ani mhojem ang khub dukhtalem. Punn hanvem ghetlolo tab uzar korun hanv anik bore toren porgottnni korunk, ani mittinge pasot anikui sompeponnim toiari korunk pavlem tem polloun, hanv mhoje sogle dukh-tras visorlem.” Toxench ti sangta ki tab ghetlolean, videoconference-a udexim sobhentlea bhav-bhoinnam sangata mittingek ani porgottnnek hajir zaunk tika modot zali. Tor Hulda-k tichea vavrachem foll mellʼllem mhunn ami tichea pasot khub khuxal!