SONGIT Izraelitkaranchea sonskruticho ek mhotvacho bhag aslo. Bible-ant zaite pavtti, lok songitachim sadhonam vazoitale ani gitam gaitale tea vixim sanglolem asa. Khorem mhunnttlear Bible-antlim zaitim pustokam, zoxem Stotram, Gitantlem Git ani Vilap, him gitam zaun asat. Toxench Music in Biblical Life hea pustokantlean, Izraelitkaram tanchea dispottʼttea jivitant zaiteo vostu kortana songit uzar kortalim mhunn kolltta.

Sodanchea jivitant. Izraelitkaram songit vazoun ani gitam gaun aplim bhavnam dakhoun ditalim. (Iz. 30:29) Toxench, eka novea razak makhtana, soinik zhuz jikhlea uprant, porbo monoitana ani oslea her khuxalkaiechea vellar, bailo dholkaxi vazoun khuxalkaien gitam gaitalim ani nachtalim. (Fudd. 11:34; 1 Sam. 18:6, 7; 1 Raz. 1:39, 40) Tea bhair, konnui mortalo tednam dukh korunk pasun tim gitam gaitalim. (2 It. 35:25) Hantuntlean, Izraelitkaram songitacho khub mog kortalim mhunn kolltta.

Razvaddeant. Izraelachea razank songitam aikonk khub borem distalem. Raza Saulu kinori vazounk Davidak aplea razvaddeant apoitalo. (1 Sam. 16:18, 23) Uprant David raza zalo tednam, tannem svota songitachim sadhonam ani sobit gitam toiar kelim. Toxench, Jehovachea mondirant pasun tannem gavpeanchi manddavoll keli. (2 It. 7:6; Am. 6:5) Tea bhair Raza Solomonachea razvaddeant gaunk, dadle toxench bailo asleo.—Up. 2:8.

Jehovachi bhokti korunk. Mhotvachem mhunnttlear, Izraelitkaram Jehovachi bhokti korunk songitam uzar kortalim. Khorem mhunnttlear, Jeruzalemantlea Devmondirant 4,000 songitkar asle. (1 It. 23:5) Te kansallim, sitaram, kinoreo ani turtureo vazoitale. (2 It. 5:12) Punn songitam vazoun Jehovachi bhokti korunk fokot hech kola aslole songitkar nasle. Zaitim Izraelitkaram, Jeruzalemant porbo monounk voitana gitam gaitalim. Hea gitank Choddttechim Gitam mhunnttale. (St. 120-134) Tea bhair, Judevanchea boroupant sanglam ki Izrael lok dor vorsa Paskachi porob monoitalim tednam thoddim Stotram gaitalim. a

Aiz pasun songitam Devachea lokank khub mhotvachim asat. (Jak. 5:13) Jehovachi vakhannʼnni korunk ami gitam gaitat. (Ef. 5:19) Toxench gitam gailolean amcho ekvott vaddtta. (Kol. 3:16) Tea bhair, ami gitam gaitat, songitam vazoitat vo tim aikotat tednam, amkam urba melltta ani amche tras sosunk modot zata. (D.I. 16:25) Khorem mhunnttlear, songitam vorvim amkam Jehovacher kitlo bhavarth asa ani ami tacho kitlo mog kortat tem dakhounk ek ekdom bori sondhi asa.