1. Devak zai tea ritin tachi bhokti kelear amkam kitem mellttolem?

JEHOVA Devak amchi kallji asa ani to amkam mogan vatt dakhoita. Taka zai tea ritin ami tachi bhokti keli zalear, amkam jivitant khuxalkai mellttoli, ani ami zaite tras pois korunk xoktolim. Titlench nhoi, amkam tachim besanvam ani tacho adarui mellttolo. (Izaias 48:17) Hozaramnim dhorm, Deva vixim sot xikoitat mhunn davo kortat. Punn, Dev konn ani tachi bhokti koxi korchi hea vixim tanchi xikounn veg-veglli asa.

2. Devak kosli bhokti manvota tem amkam koxem kollttolem, hem somzaunk ek udharonn diat.

² Devachi bhokti koxi korunk zai hem amkam koxem kollttolem? Tem somzonk, ami sogle dhorm kitem xikoitat tem zannam zaunchi goroz na. Devak kosli bhokti manvota tem kollttolem zalear, hea vixim Bible khorench kitem xikoita hem zannam zavop gorjechem. Hem somzonk ek udharonn gheum-ia. Zaitea desamnim, khotte poixe vaddot asat. Tumkam khotti nott vollkhonk sanglem zalear, tumi kitem kortolim? Tumi sogleo khotteo notti koxeo distat tem  topastolim? Na, tumi toxem korchimnant. Punn, khori nott koxi dista tem tumi polloitolim. Ek pavtt, khori nott koxi dista tem koll’llem mhunnttoch, tumkam khotti nott vollkhonk sompem zatolem. Teach bhaxen, khoro dhorm koso asonk zai, hem ami zannam zalim zalear, amkam khotte dhorm vollkhonk modot zatoli.

3. Devak manvolole zaunk ami kitem korunk zai?

³ Jehovak manvota tea toren ami tachi bhokti korop mhotvachem. Sogle dhorm Devak manvotat mhunn zaite lok patietat. Punn Bible toxem xikoina. Eka munxan, apunn Kristanv mhunnttlench mhunn zaina. Jezu sangta, “Mhaka ‘Somia Somia!’ mhonnun konn Sorgarajeant bhitor sortolim mhonn nant, punn sorgar astea Mhojea Bapachi khuxi kortat tinch sorgarajeant bhitor sortolim.” Devak manvololim zaunk, ami tachi khuxi kitem ti zannam zaun, tea pormonnem cholonk zai. Devachi khuxi korinant tankam, Jezun ‘khotteponn korpi’ mhunnttleat. (Matev 7:21-23) Khottea nottam sarko, khottea dhormankui kainch valor na. Ani oslea dhormank lagon amchem vaittui zaunk pavta.

4. Jezun sanglolea don darvontteancho orth kitem, ani te darvontte amkam khoim pavoitat?

⁴ Jehova Dev sonvsarant aslolea soglea lokank sasnak jieunchi sondhi dita. Hem jivit mellttolem zalear ami Devak manvota tea toren tachi bhokti korunk zai ani jieunk zai. Punn khubxe lok oxem korinant. Taka lagon Jezun mhunnttlem, “Oxir darvontteantlean bhitor sorat, kiteak ghorttannak pavoita to darvontto rund ani to marog viskoll, ani tantlean veta to lok puskoll. Jivitak pavoita to darvontto kitlo mhonn oxir ani to marog kitlo mhonn kotthin! Ani bhov thoddeank to mellta.”  (Matev 7:13, 14) Khoro dhorm sasnachea jivitak pavoita, ani khotto dhorm nisonnttonak pavoita. Jehova Devak khoincheach munxacho nas zal’lo naka ani taka lagon soglea munxank to aplea vixim xikonk sondhi dita. (2 Pedru 3:9) Ami jea ritin Devachi bhokti kortat, tachea voilean amkam, ek tor jivit mellttolem, na tor ami mornnak sampoddttolim.

5. Khoro dhorm pallttat tea lokank ami koxim vollkhotolim?

⁵ Jivitak pavoita toslo ‘darvontto’ ami koxim sodhtolim? Khoro dhorm khoincho tem ami, to dhorm pallttolea lokam voilean vollkhonk xoktat. Jezun mhunnttlem, “Tanchim follam polleun tumi tankam vollkhun kaddtoleat.” Karonn “borem zhadd borim follam dita.” (Matev 7:16, 17) Hacho orth, khoro dhorm pallttolea lokanchi patienni ani vagnnuk polloun ami tankam vollkhonk pavtolim. Tanchea-i lagim chuki ghoddttat hem khorem, punn te sogle Devachi khuxi korunk sodanch vavurtat. Oslea lokank vollkhonk, ami tanchea vixim sov vostu polloum-ia.

6, 7. Devache sevok apli patienni Bible-acher kiteak dovortat, ani Jezun amkam koslem udharonn dovorlam?

⁶ Devachea sevokanchi xikounn ani patienni Bible-acher adarit asa. Bible sangta, “Sogllem Povitr Pustok Devachea preronnan boroilam; xikovnn diunk, chuki kaddun dakhounk, lokank nittaier haddunk, tankam Devak man’ta toslea jivitache vatter fuddem vhorunk, tem upkarta.” (2 Timotak 3:16, 17) Apostl Paulun aplea sangati Kristanvank sanglem, “Amche koddsun tumi Devacho nirop ghetlo tedna,  mon’xachem utor koxem to tumi manun ghetlo na, punn Devachem utor koxem.” (1 Tesalonikekarank 2:13) Haka lagon, khoro dhorm pallttole lok jem patietat ani kortat tem soglem, munxanchea zannvaiecher ani chali-ritincher adarit na, punn Devachea utracher tharlolem asa.

⁷ Jezu Kristan amkam ek borem udharonn dovorlam. Sonvsarant aslo tednam, tannem Devachem utor uzar korun, lokank xikoile. Aplea sorginchea Bapa lagim magnnem kortana tannem, “Tujem utor sot” mhunn sanglem. (Juanv 17:17) Jezu Devachea utracher patietalo dekhun tannem xikoilem titlem-i, Bible-acher adarit aslem. Khubxea pavtt tannem, “oxem boroil’lem asa” mhunn sanglem. (Matev 4:4, 7, 10) Ani uprant, tantunt boroilolem asa tem vachlem. Toxench, aizui Devache sevok aplea monantlem xikoinant, punn Bible Devachem utor mhunn patieun, tantunt boroilam tench xikoitat.

8. Jehovache sevok tachi bhokti koxi kortat?

⁸ Khoro dhorm pallttat te lok fokot Jehovachi bhokti kortat ani tachem nanv sogleank kolloitat. Jezun mhunnttlem, “Sorvespora tujea Devak tum bhoztoloi ani Tachi ekleachich seva-bhokti kortoloi.” (Matev 4:10) Taka lagon, Devache sevok Jehova Devachich bhokti kortat. Devachem nanv kitem ani taka kosle gunn asat hea vixim te lokank kolloitat. Stotr 117:1 sangta, “Somest lokamno, Devak vakhannant! Sorvoi porzamno, Yahvek nanvaddat!” Jezun lokank Devachi vollokh diun, ami-i toxench korchem mhunn amkam ek udharonn dovorlem. Deva lagim magnnem kortana tannem mhunnttlem, “Sonvsarantle kaddun Tunvem  mhaka dileai team mon’xank Hanvem Tujem nanv kollit kelem.” (Juanv 17:6, Povitr Pustok—Novo Korar) Toxench, aiz Devache sevok, lokank tachea ud’dhexa vixim ani taka aslolea gunnam vixim xikoitat.

9, 10. Khore Kristanv koxe toren eka-mekak mog dakhoitat?

⁹ Devache sevok eka-mekacho khoro mog kortat. Jezun mhunnttlem, “Ekamekacho mog korxat zalear, hache voilean tumi Mhoje xis mhonn sogllea mon’xank kollttolem.” (Juanv 13:35) Adlea Kristanvam modem, Jezun sanglolo tosoch mog aslo. Devan xikoilolea porim, ami khoro mog kortat zalear, ami zat, des, gorib, girest hem polloi-nastana, khorim bhav-bhoinnam koxim ekvottan jietolim. (Koloskarank 3:14 vachat.) Oslo mog khottea dhormanchea lokam modem disona. Oxem ami kiteak mhunnonk zata? Karonn tanchea modem bhed-bhav asta, ani taka lagon te eka-mekacho jiv porian kaddttat. Khore Kristanv zhuzant bhag ghenant vo aplea Kristi bhavancho vo herancho jiv kaddinant. Bible sangta, ‘Devachim bhurgim ani devcharachim bhurgim hacheruch vollkhum-ietat: jim konn Devache khuxe pormannem jienant vo aplea bhav-bhoinnincho mog korinant, tim Devachim nhoi. Ekamekacho ami mog korcho. Kaina sarkim ami zaum noie: to Noxtteacho put aslo dekhun, aplea bhavacho tannem jiv kaddlo.’—1 Juanv 3:10-12; 4:20, 21.

¹⁰ Khoro mog mhunnttlear dusreancho jiv kaddop na, itlench nhoi. Khore Kristanv kosloch svarth dori-nastana aplo vell, apli sokot ani her vosto dusreank modot korunk ani urba diunk uzar kortat. (Hebrevank 10:24, 25) Sonkoxttanchea vellar te eka-mekachea  adarak pavtat ani dusream thaim promannikponnan vagtat. Bible-antlo sol’lo aplea jivitant apnnaun, ‘soglleank borem korunk’ te vavurtat.—Galasiekarank 6:10.

11. Jezu udexim Devan amchi soddvonn keli mhunn patievop kiteak gorjechem?

¹¹ Jezu udexim Devan amkam salvar kelim mhunn khore Kristanv patietat. Bible sangta, “Ani dusrea konnachech vorvim soddvonn mellunk xokona, kiteak amkam soddvonn diunk xokta toslem anink dusrem nanv mollba khala Devan mon’xank diunk na!” (Itihas 4:12) Ami odheai 5-ant xiklolea pormonnem, visvaxi munxank soddvonn diunchea pasot Jezun aplo jiv dilo. (Matev 20:28) Sonvsaracher Raj cholounk Devan Jezuk Raza nemla. Ami Jezu Kristak khaltim ravon, tachi xikounn amchea jivitant apnnailoli Devak zai. Tednanch, amkam sasnachem jivit mellttolem. Bible mhunntta, “Putacher bhavarth dovortat tanche sovem Sasnnik Jivit asa; Putak khaltim zaunk kobul nant tim Jivit bhogunk pavchim nant.”—Juanv 3:36.

12. Devache sevok sonvsarachea vad-vivadant bhag ghenant hacho orth kitem?

¹² Khore Kristanv sonvsarachea vad-vivadant bhag ghenant. Jezun, Romachea somraz Pilata mukhar, ubo aslo tednam mhunnttlem, “Mhojem raj hea sonvsarantlem nhoi.” (Juanv 18:36) Jezuche xis khoinchea-i desache vo raxttrache zaum, te Devachea sorginchea razvottkek khalte ravtat. Ani tea pasot, te sonvsarachea rajkaronnant kosloch bhag ghenant. Punn her lok tantunt bhag ghetat, razkarbhar choloitat vo mot ghaltat tednam, te modem poddonant. Devache sevok rajkaronnant bhag ghenant, punn  sorkarachea kaideank man ditat. Oxem kiteak? Karonn Devachem utor Bible tankam, “sorkari odhikareank khaltim ravchim” mhunn sangta. (Romkarank 13:1) Munxanche kaide Devachea kaideam add ietat tednam, Devache sevok apostlam bhaxen “Mon’xanchi adnia nhoi, punn Devachi adnia” pallttat.—Itihas 5:29; Marku 12:17.

13. Devachem Raj kitem kortolem mhunn Devache sevok mantat, ani taka lagon te kitem kortat?

¹³ Munxam pasot fokot Devachem Raj boreponn haddunk xokta mhunn Jezuche pattlavdar porgott kortat. Jezun mhunnttlem, “sotachi sakxi sogllea porzank mellche khatir hem Sorginchea Rajeachem Xubhvortoman ak’khea sonvsarant porgott zatolem. Ani tea uprant xevott ietolo.” (Matev 24:14) Sonvsarantlea razkarbhareamnim, kitlo-i proitn kelear pasun tanchean munxanche koxtt soddounk zainant. Fokot Devachem Raj, munxam pasot boreponn haddttolem mhunn Devache sevok patietat ani urben dusreank tea vixim porgott’ttat. (Stotr 146:3) Sonvsarant astana, Jezun tea Rajea pasot magonk xikoilem. “Tujem Raj [amkam] ieum, Tuji khuxi sorgar zata toxi sonvsarant zaum.” (Matev 6:10) Bible kolloita ki fuddarak Devachem Raj “sogllea adlea rajeancho churo kortolem ani tankam gilltolem, punn tem apunnuch sodankal togtolem.”—Daniel 2:44; Prokasovnni 16:14; 19:19-21.

14. Khoinchea dhormancho lok khoro dhorm palltta oxem tumkam dista?

¹⁴ Ami xikleant tem monant dovrun, tumchean tumkanch vicharunk zata. Khoinchea dhormachi xikounn Bible-acher adarit asa? Khoincho dhorm  lokank Devachem nanv kolloita? Khoinchea dhormant, lok eka-mekacho khoro mog korta, ani Jezu soddvonnddar mhunn bhavarth dovorta? Khoinchea dhormache lok hea sonvsarachea vad-vivadant poddonant ani fokot Devachem Raj munxanche koxtt soddoitolem mhunn porgott’ttat? Bariksannen topaslear, fokot Jehovache Sakxi hem soglem kortat mhunn dison ieta.—Izaias 43:10-12 vachat.

15. Ami fokot Dev asa mhunn manlearuch puro kai, vo anik kitem korop gorjechem asa?

¹⁵ Dev asa hench manlear puro nhoi. Bible dakhoita ki Devchar pasun Dev asa mhunn mantat. (Jakob 2:19) Punn te Devachi khuxi ani taka manvota tem korinant. Devak manvolole zaunk ami tachi khuxi korop chodd gorjechem. Taka lagon, ami khotto dhorm soddun Devak manta tem korunk zai.

16. Khotte bhoktent ami bhag gheunk zata kai?

¹⁶ Izaiasachea utrancho ugddas korun apostl Paul amkam khotte bhokte thaun pois ravonk sangta. Dev mhunntta, “tanche modlim bhair sorat ani mekllim ravat; koslech mhelle vostuk hat lavum nakat, tedna Hanv tumkam vengent ghetolom.” (2 Korintkarank 6:17; Izaias 52:11) Haka lagon, khore Kristanv khotte bhoktent kosloch bhag ghenant.

17, 18. ‘Vorixtt Babilon’ mhunnttlear kitem, ani thoisorlim bhair sorop kiteak gorjechem asa?

¹⁷ Sonvsarantlea soglea khottea dhormank Bible-ant, “Vorixtt Babilon” mhunnttlam. * (Prokasovnni 17:5,  Povitr Pustok—Novo Korar) Hem nanv amkam adlea Babilon xaracho ugddas korun dita. Noahachea kallar ailolea buddtte uprant, hea xarant khottea dhormachi survat zali. Aichea khottea dhormancheo xikounneo ani chali-riti, Babilon xara thaun ghetleat. Ek udharonn mhunnttlear, trindadechi xikounn. Zaitea dhormant aiz, trindad hi mukhel xikounn zaun asa. Punn Bible amkam xikoita ki Jehova ekloch khoro Dev ani Jezu Krist tacho put mhunn. (Juanv 17:3) Babilonache lok, munis melea uprant tacho otmo jivo urta ani sasnache vollvolle sosta, hem-ui patietale. Aizui zaite dhorm, munxak morona toslo otmo asa ani taka ifernant khub tras bhogche poddtta mhunn xikoitat.

¹⁸ Adlea Babilonachi xikounn sonvsarbhor aslolea khottea dhormant posorlea. Ani hea karonnak lagon, atanchem ‘Vorixtt Babilon’ mhunnttlear, sonvsarbhor aslolea khottea dhormanchem songotton oxem mhunnonk zata. Hea soglea khottea dhormancho okosmat nas zatolo mhunn Devan adinch sangon dovorlam. Tor khottea dhormancheo sogleo khotteo xikounneo ani chali-riti soddun divop khub mhotvachem oxem tumkam disona? Jehova Devak, ami zata titlea begin ‘thoisorlim bhair sorlolim’ zai.—Prokasovnni 18:4, 8 vachat.

19. Jehovachi seva korit ravlim zalear tumkam kitem mellttolem?

¹⁹ Tumi khottea dhormantlim bhair sortat tem polloun, tumchim soirim vo xezari ghoddie tumche lagim uloupachem bond korit. Punn ugddas dovrat, Jehovachi seva kortana tumkam zaitim besanvam mellttolim. Jezucho pattlav korunk xisamnim khub-kitem sanddun dilem. Punn tankam Jezuchea  xisam modem zaitea bhav-bhoinnancho mog favo zalo. Toxench tumkam-i khorea Kristanvam modem, eka-mekacho khoro mog kortat toslim zaitim bhav-bhoinnam favo zatolim. Tumi sonvsarbhor aslolea Devachea songottnneche bhag zatole. Titlench nhoi, fuddarak tumkam “ieta tea kallant Sasnnik Jivit” mellttolem. (Marku 10:28-30 vachat.) Thoddea tempan ghoddie, tumchim soirim vo xezari dekhun tumi kitem patietat tem zannam zaunk sodhit. Ani tumchea sangata Jehova Devachi bhokti korunk fuddem sorot.

20. Khorea dhorma pormonnem choltat tankam kitem favo zatolem?

²⁰ Bible xikoita ki Dev beginuch hea sonvsarantlem vaittponn kaddun uddoitolo ani tacher apli razvottki choloitolo. Tednam soglem Devak zai toxench zatolem. (2 Pedru 3:9, 13) Khorench, tumkam ek boro fuddar favo zatolo. Novea sonvsarant fokot ekuch dhorm astolo ani sogle lok Devak manvota tea ritin tachi seva kortole. Tor khorea Kristanvam sangata Devachi bhokti korop kitlem gorjechem nhoi!