16
Mesias Ieta
Jehovah Nazaretachea Jezuk adim thaun bhasail’lo Mesias mhonn vollokh korun dita
BHASAIL’LEA Mesiasak vollkhun gheunk Jehovah lokank mozot kortolo kai? Hoi. Bibleache Hebrev boroupam somplea uprant, sumar 400 vorsam uprant Devan hem koxem kelem tem polloiat. Galileachea uttorek Nazaret xarant ek Maria nanvachi tornatti ostorek ojeapanchi bhett zata. Gabriel nanvacho ek devdut tichexim ieun tika sangta ki ti ankvar asonui Dev aplea Povitr Atmeache xokte udexim tichea thaun ek putak zolmank haddtolo. Ho put adim thaun bhasail’lo Raza zavun sasnnak razvott choloitolo! Ho ballok khud Devacho put zatolo, zachem jivit bodlun Devan sorgar thaun Mariachea kusveant ghatlem.
Marien lhanvikaien hem Devachem bhov vortem ani manachem dennem man’nun ghetlem. Tika Juze nanvachea thovoia lagim lognachem utor zall’lem, Devan ek dutt dhaddun Mariachea gorbest-ponnachem karann khatri kelea uprant to tichexim logn zalo. Punn Mesias Bethlehemant zolmotolo hea bhakita vixim kitem? (Mika 5:2) Tem lhan xar Nazareta thaun sumar 140 kilometer pois aslem.
Ek Romi odhikarean lokgonnti korunk hukum ghatlo. Aplem nanv lavun diunk lokank zolmachea ganvant vochunk poddlem. Ghoddiek Juze ani Maria mullachi Bethlehem ganvchim zavunk puro, dekhun Juze aplea gorbest potinnink gheun Bethlehemant gelo. (Luk 2:3) Marian ballkak gotteant zolom diun khavnnent dovorlo. Uprant Devan dutanchi ek urponz dhaddun kheddea ganvant aslolea gonvllianchea zomeank sanglem ki nikttoch zolmol’lo ballok bhasail’lo Mesias vo Krist zavun asa.
Uprant heramnim Jezu bhasail’lo Mesias mhonn govai dili. Izaias provadean adinch kolloilolem ki ek monis Mesiasachea mhotvachea kamachi vatt toear korunk ietolo. (Izaias 40:3) To zavun aslo Juanv Baptist. Jezuk polletokoch tannem mhollem: “Polleiat, ho Devacho Menddro, sonvsarachem pap kaddta to!” Juanvache xis rokddech Jezuche pattlavdar zale. Tanchea modlea eklean mhollem “Amkam Mesias (mhonnge Krist) mell’la.”—Juanv 1:29, 36, 41.
Hea bhair anikui govaiki asli. Jedna Juanvan Jezuk bautizm dilo tedna, Jehovah khud sorgar thaun uloilo. Povitr Atmea udexim, tannem Jezu Mesias mhonn nemlo ani mhollem “Ho Mhozo Put, soglle opurbaiecho; Tacher asa Mhojem dhadosponn.” (Matev 3:16, 17) Zaite kalla thaun bhasail’lo Mesias ailo!
Hem kedna ghoddlem? Danielan bhakit kel’lim 483 vorsam somplea uprant, justuch 29 C.E. ghoddun ailem. Hoi, Jezu Mesias vo Krist mhonn ho ek mozbut puraveancho bhag zavun asa. Sonvsaracher astana, Mesias koslo sondhex porgott korcho aslo?
