Nachdem sich Jesus de Aposchtel zeigt het, wett de Petrus glii drufabe uf em Galiläische Meer go fische. De Thomas, de Jakobus, de Johannes und anderi Jünger göhnd mit ihm mit. Si fisched di ganzi Nacht dure, fanged aber kei einzige Fisch.

Am nöchschte Morge früeh gsehnd si en Maa am Ufer stah. Er rüeft zum Boot übere: «Hend ihr öppis gfange?» Si rüefed zrugg: «Nei!» De Maa seit: «Lönd eues Netz uf de rechte Siite vom Boot is Wasser abe.» Wo si das eso mached, fanged si eso vil Fisch, dass si s Netz nüm möged is Boot inezieh. De Johannes merkt denn, dass es Jesus isch und seit: «Es isch de Herr!» De Petrus gumpet sofort is Wasser und schwimmt a s Land. Di andere Jünger fahred im Boot hindenache.

Wo si am Strand achömmed, gsehnd si es Füür mit Fisch und Brot druf. Jesus seit ihne, si sölled no es paar vo de Fisch bringe, wo si grad gfange hend. Denn seit er: «Chömmed cho Zmorge esse!»

Nach em Zmorge fragt Jesus de Petrus: «Hesch du mich lieber als s Fische?» De Petrus git zur Antwort: «Ja, Herr, du weisch, dass ich dich gern ha.» Da seit Jesus: «Tue mini Lämmli füettere.» Jesus fragt nomal: «Petrus, hesch du mich gern?» De Petrus seit: «Herr, du weisch, dass ich dich gern ha.» Jesus seit: «Tue mini Schäfli hüete.» Jesus fragt de Petrus no es dritts Mal. De Petrus wird denn sehr truurig und seit: «Herr, du weisch alles. Du weisch, dass ich dich gern ha.» Jesus seit: «Tue mini Schäfli füettere.» Und er seit denn no: «Bliib min Nachfolger.»