Palajatka karaloʼuta namüinjatka na chajanakana Corinto 11:1-34
11 Jüshata takuwaʼipa maʼaka tashatüin nukuwaʼipa Cristo.
2 Taküjeein jümüin anain maʼin tü jaainjakat süka sotuin taya jaaʼin jee juʼunirüin jukuwaʼipa wanaapünaa maʼin sümaa tü tekirajakalü anain jia.
3 Anasü jütüjaale saaʼu niain Cristo chi nikiipüʼükai wanee wayuu, akaʼaya chi shikiipüʼükai wanee jierü nia chi toolokoi jee chi nikiipüʼükai Cristo nia Maleiwa.
4 Koʼoyoole nikii wanee wayuu wanaa sümaa nuʼuraajüin jee wanaa sümaa nüküjain süchiki tü kasa nüküjatüjütkalia Maleiwa, japüishi chi nikiipüʼükai nutuma.
5 Mekiaalajale wanee wayuu wanaa sümaa suʼuraajüin jee wanaa sümaa süküjain tü nüküjatüjütkalia Maleiwa, japüishi chi shikiipüʼükai sutuma. Müsü aka soojuushikai aaʼin shikii.
6 Nnojorüle kekiaalajain wanee wayuu, mocholochoinjatü tü suʼwalakat. Japüire shia sutuma mocholochoin tü suʼwalakat jee sutuma soojirüin tü shikiikat, anasüjaʼamata kekiaalajale shia.
7 Nnojotsü koʼoyooinjatüin nikii wanee wayuu, jama müin nukuwaʼipa maʼaka nukuwaʼipa Maleiwa jee kojutushi chi Maleiwakai nutuma jee müsia tü jietkat kojutushi chi toolokoi sutuma.
8 Chi toolokoi nnojoishi sünainjeejachin tü jietkat, aluʼu shiainjaʼa tü jietkat nünainjeejatüin chi toolokoi.
9 Jamüshijaʼa chi toolokoi nnojoishi nukumajüin nia Maleiwa sünainjee tü jietkat, shia akumajünaka tü jietkat nünainjee chi toolokoi.
10 Saaʼujee tia jee naaʼujee na aapieekana kekiaalajainjatü wanee jierü shiyaawase jüüjüüin shia nümüin chi shikiipüʼükai.
11 Naʼaka na oushikajaakana süchiirua nukuwaʼipa chi Señotkai, choʼujaashi chi toolokoi sümüin tü jietkat. Akaʼaya joo tü jietkat, choʼujaasü nümüin chi toolokoi.
12 Jamüsüjaʼa tü jietkat nünainjeejatü chi toolokoi. Akaataʼaya joo chi toolokoi, eweetüshi sünainjee tü jietkat. Niapejeʼe kakumalain Maleiwa kasa süpüshuaʼa.
13 Nnaweerüjaʼa jünüiki süchiki tüü: ¿anasüche suʼuraajüle wanee jierü nümüin Maleiwa suʼupala wayuu sümaa mekiaalajain shia?
14 Nnojoishi akumajuushin wanee wayuu toolo süpüla miyoʼuinjatüin nuʼwala, mojuteeisa nia müle tü nuʼwalakat.
15 Eekajasaʼa tü jietkat kojutusü atumawaa saaʼujee miyoʼuin tü suʼwalakat, jama nukumajüin Maleiwa shia sümaa miyoʼuin suʼwala.
16 Eere wanee wayuu aaʼayajiraweekai süchiirua tia, anakajaʼa nütüjaale saaʼu nnojoliin noʼunuin na anoujashiikana nünain Maleiwa süchiirua wanee akuwaʼipaa naatajatü suulia tia. Akaʼaya wayakana nnojoishii oʼunuin waya süchiirua wanee akuwaʼipaa naatajatü.
17 Tü taluwataakalü anain jia nnojotsü sükajeejatüin taküjeein jümüin anain tü kasa jaaʼinrakat. Mojuleesia maʼin tü kasa jaaʼinrakat juutkajaapa, nnojotsü anain.
18 Taapa achikichii mojujiraain jia juutkajaapa. Nnojotsü alawaain saaʼin tamüin süpüshuaʼa tü aküjünakat jüchiki.
19 Shiimain sümaa jükatajiraweenain. Suluʼujee tia atüjaaneena aaʼu jaraliin na wayuu talatakana amaa Maleiwa.
20 Nnojotsü anain tü jaaʼinrakat juutkajaapa sünain tü Ekawaa Aipaʼajatkat nutuma chi Señotkai.
21 Jamüshiijaʼa jia ekatüjülii süpülapünaa jiküin tia eküütkat, eekalaka chira eekai jamüsirüin jaʼaka otta eeshi chira eekai epeʼrüin.
22 ¿Nnojoishiikai kepiain jia süpüla jiküinjanain jee süpüla jüsüin wanee kasa? ¿Mojututaaka neʼe jümüin na anoujashiikana nünain Maleiwa? ¿Jaapülijeetaaka neʼe na wayuu nnojoliikana kasain nantüin anain? ¿Jamüsüche paala tanüiki jümüin? ¿Taküjainjatche jümüin anain tü jaaʼinrakat? Nnojotsü anain tü jaaʼinrakat.
23 Tü tekirajakalü anain jia shia tü nümakat tamüin chi Señotkai. Soʼu tü ai saapünajatkalü oʼu nikii chi Señotkai Jesús, naapaain wanee pan.
24 Nuʼuraajakalaka nümüin Maleiwa palajana jee süchikijee tia nüshaletaka tü pankat sümaa nümüin: «Tüü, shiyaawase teʼiruku, tü anuu joo taapajiraainjatüin jaaʼu. Ayataʼaya jaaʼinrüin tüü süpüla sotuinjachin taya jaaʼin».
25 Kettaapa neküin naapaaka wanee iita kaluʼusü wiino jee nümakalaka: «Asüüshikat tüü, shia süikaleʼeria tü pütchi apansaajünakat, tü oʼtteetkalü amülapeena tasha jüpüleerua, ayataʼaya jaaʼinrüin tüü süpüla sotuinjachin taya jaaʼin jüsawaipa tü asüüshikat».
26 Jikawaipa tü pankat jee jüsawaipa asüüshikat tüü ayatüshiʼiya jia aküjain süchiki outuin chi Señotkai. Jaaʼinrajatü tia nüleʼejaleepaʼaya.
27 Chi wayuu ekakai tü pankat jee asakai tü asüüshi nümaʼanajeejatkat chi Señotkai sümaa mojutuyaain shia nümüin, müsüjaʼaya mojutuyaakai saaʼin nümüin niʼiruku jee nüsha chi Señotkai.
28 Nüsakireʼerajatü naaʼin wanee wayuu palajana analejeʼeya tü kasa naaʼinrakat, nikeetkalaka tü pankat jee nüseetkalaka tü wiinokot.
29 Eere wanee wayuu mojutukai amüin tü nikakat jee tü nüsakat sümaa nnojolin nüküjain shiyaawasein tia niʼiruku chi Señotkai, nikataale jee nüsataale, kasalajaneerü nümüin tia.
30 Müshiijeseʼe wattain naalii wayuu jaʼakajee eekai müin sümatchinjaakai naaʼin, müshii ayuuikai naaʼin jee müshii outakai naaʼin.
31 Wasakireʼerülejeʼeya waaʼin sünain anale tü kasa waaʼinrakat, nnojoleena waya süsalain atumawaa.
32 Nüchiaain waya Jehová* sükajee süsalain waya tü kasa waainjakat. Tia suuliajatü süsalain waya atumawaa wanaa namaa na manoujainsaliikana.
33 Tawalayuu, juutkajaapa sünain tü Ekawaa Aipaʼajatkat nutuma chi Señotkai, shia anaka aluʼu kottiraale jia sünain ekawaa.
34 Jamüsirüle wanee wayuu shia anaka aluʼu niküle nipialuʼujee suulia süsalajüin nia atumawaa nuutkajaapa namaa na nuwalayuukana. Tanouteerü akuwaʼipa waneirua kasa tantapa chaa jümaʼanamüin.
Noota
^ Pünaʼla tia suluʼu tü kanüliakat «Sooʼomüin pütchi A5».
