Palajatka karaloʼuta nüshajalaka Pedro 1:1-25
1 Karaloʼutakat tüü, tashajala tayakai Pedro, aluwataaushi taya nutuma Jesucristo. Tashajüin jümüin karaloʼutakat tüü jia anoujashii chakana sainküin tü mmakat Ponto, Galacia, Capadocia, Asia jee Bitinia, jümüinjatü jia makana aka saaʼin wayuu nnojoliika noumainpaʼajeʼewaliin jee aneekuushikana
2 wanaapünaa sümaa nütüjaain saaʼu chi Washikai Maleiwa müinjatüinña sukuwaʼipa. Wuleitpa jukuwaʼipa nutuma sükajee tü nüpülainkat, naaʼinrüin tia süpüla joonooinjanain sümaa nünüiki jee sütülittinneetka jaaʼu tü nüshakat Jesucristo.
Kasataalejeseʼe sükooʼomüinraain tü nümaneekat Maleiwa jümüin jee jimatüin jaaʼin nutuma.
3 Kasataalejeseʼe nuʼwaajünüin chi Maleiwakai, chi Nüshikai chi Señotkai Jesucristo. Sutuma kamaneein maʼin nia, müshii joʼuukai waaʼin wachikuaʼa sümaa ayatüin waʼatapajüin tü kasa anasü weʼreetkat nutuma Maleiwa. Waʼatapeeriaʼaya tia, jama nüsoʼireʼennüichipain aaʼin Jesucristo süchikijee outaa.
4 Müshii joʼuukai waaʼin wachikuaʼa nutuma, naapeetkalaka wamüin tü kasa anasü nüküjatüjütkalia achiki wamüin, tia matüjainsat ajaʼttaa, wulesü shia otta eejeerü shia süpüla kaʼikat süpüshuaʼa. Keraaitpa sukuwaʼipa jüpüla chayaa iipünaa.
5 Aaʼinmajünüshii jia nutuma chi Maleiwakai sükajee tü nüpülainkat süka kanoulain maʼin jia. Sütüjaajeerü aaʼu wayuu juʼtteʼenneenain sajaʼttapa tü kasa alatakat sainküin mma.*
6 Talatüshiijeseʼe maʼin jia mayaainjeʼe shapaain jaaʼin motsomüin sutuma sülatüin wainma kasa jümüin.
7 Alatüsü tia süpüla sütüjaanüin aaʼu shiimain tü junoulakat soʼunnaa suuʼulakünüin jaaʼin, juʼwaajünakalaka suluʼujee tia jee kojutukalaka jia sutuma wayuu wanaa sümaa tü kaʼi niiʼiyalaajeetkalü oʼu Jesucristo. Mülejeʼeya sukuwaʼipa tü junoulakat, kojutuleejeeria maʼin shia suulia tü ooro atüjakalü ajaʼttaa, eerejeʼe sülatinnüin saʼakapünaa siki.
8 Mayaainjeʼe nnojolin jiʼrüichin Cristo, aishi nia jüpüla, mayaainjeʼe nnojolin jiʼrüin nia maaʼulu kanoulashii jia nünain jee alanaʼaleesia sünain talatüin maʼin jaaʼin.
9 Juunteenaka juʼtteʼennüin süka kanoulain maʼin jia.
10 Na nünüikimaajana Maleiwa aküjatüjüliikana süchiki kamaneeinjachin Maleiwa jümüin, nekirajaa achiiruat jee nachajaain maʼin sukuwaʼipa süpüla natüjaainjanain saaʼu nuʼtteʼerüinjatüin Maleiwa wayuu.
11 Nüküjatüjülia Maleiwa sükajee tü nüpülainkat* niʼrüinjachin nümüliala Cristo jee kojutuinjachin nia atumawaa. Ayatüsiaʼaya nekirajaain achiirua tia na nünüikimaajanakana Maleiwa sükajee tü nüpülainkat süchiki joujainjatüin jee kasainjatüin alatüin soʼu tia.
12 Nashajüin na nünüikimaajanakana Maleiwa süchiki tü kasa jümüinjatkat. Tü namakat na nünüikimaajanakana Maleiwa shiaʼaya neʼe tü pütchi anakat maʼin* aküjünakat jümüin sükajee tü nüpülainkat Maleiwa, tü chejeejatkat iipünaajee. Akaataajaʼa neʼe na aapieekana, natüjawee aaʼu maʼin tia.
13 Anakajaʼa yapale jia* süpüla jaaʼinrüinjatüin tü eʼitaanakat jüpüleerua sümaa laülaain jaaʼin. Jaʼatapaja maʼin kamaneeinjachin jümüin chi Maleiwakai soʼu tü kaʼi niiʼiyalaainjachikalü oʼu Jesucristo.
14 Oonooinnapa jia sümaa nünüiki Maleiwa sutuma nüchonniin jia, juuʼulaa suulia jaaʼinrüin tü kasa mojusü jaaʼinrapuʼukat nnojoliiwaʼaya junoujain nünain Maleiwa.
15 Shia anaka aluʼu wulere jukuwaʼipa sünain kasa süpüshuaʼa maʼaka wulein nukuwaʼipa Maleiwa, chi kaneekajalakai jia,
16 jama müin sünüiki tü Karaloʼuta Nüchikimaajatkat Maleiwa: «Wuleinjatü jukuwaʼipa süka wulein takuwaʼipa».
17 Juchuntapa nümüin chi Washikai, chi kasalajanakai atuma saainjala wayuu sümaa nnojoluin kojutaʼatain shia nutuma, anakajaʼa kojutule nia jümüin sümaʼainruʼu motsoʼopünaain jümaa saaʼu tü mmakat.
18 Oʼtteʼennüshii jia suulia tü nakuwaʼipapuʼukat jüpüleerua na jutuushinuukana, nnojoliipejeʼe jia oʼtteʼennüin süka wanee kasa atüjaka ajaʼttaa maʼaka saaʼin tü oorokot jee tü pülaatakat.
19 Oʼtteʼennüshii jia sükajee tü nüshakat Cristo, kojutusü maʼin tia ishakat, müsü nüsha maʼaka saaʼin nüsha wanee anneerü mamojulakai jee anasü maʼin tia ishakat.
20 Shiimainña nüneekünatüjülin süpülapünaa shiʼitaanüin shikii wayuu,* eeʼiyalaapejeʼe nia maaʼulu yaa jiyaaluʼu.
21 Anoujashii jia nünain Maleiwa nükajee Cristo, niaʼaya Maleiwa asoʼireʼeraka naaʼin süchikijee outaa, kojutukalaka nia nutuma. Junoujainnaka nünain Maleiwa jee jaʼatapajüin jiʼrüinjanain kasa anasü nutuma.
22 Saaʼujee wuleitpain jukuwaʼipa sünainjee joonooin sümaa tü pütchi shiimainkat jee saaʼujee aijiraainnapain jia maʼaka alin wanee wayuu nüpüla nuwala sümaa nnojoluin piamain nuʼupünaa, anakajaʼa aijiraale jia süka süpüshuaʼa jaaʼin.
23 Müshii joʼuukai jaaʼin jüchikuaʼa, nnojoliipejeʼe jia joʼuuin jüchikuaʼa sünainjee wanee waüyee atüjakalü ajaʼttaa, müshii joʼuukai jaaʼin jüchikuaʼa sünainjee wanee waüyee matüjainka outaa. Müshii joʼuukai jaaʼin jüchikuaʼa sutuma nünüiki chi Maleiwa matüjainkai outaa, chi eekai waneepia.
24 «Napüshuaʼa na wayuukana müshii aka saaʼin mojuui jee tü naʼanasiainkat müsü aka saaʼin süsii mojuui, ojulujaasü tü mojuuikat, ojutuu müsia tü süsiikat.
25 Aluʼuinjaʼa tü nünüikikat Jehová* eejeerü shia süpüla kaʼikat süpüshuaʼa». Tia «nünüikikat» shiaʼaya neʼe tü pütchi anakat maʼin, tü aküjünakalü achiki jümüin.
Noota
^ Pünaʼla tia suluʼu tü kanüliakat «Jamaluʼulu pütchikat».
^ Jee shiale «tü nüpülain eekat naleʼeruʼu».
^ Pünaʼla tia suluʼu tü kanüliakat «Jamaluʼulu pütchikat».
^ Jee shiale «yapale jutuma tü jülüjakat jaaʼin».
^ Shia soʼujeʼereeya kachooin Adán sümüin Eva.
^ Pünaʼla tia suluʼu tü kanüliakat «Sooʼomüin pütchi A5».
