Chiiruaajatka karaloʼuta nümüinjatka Timoteo 1:1-18
1 Karaloʼutakat tüü, tashajala tayakai Pablo, aneekünüshi taya nutuma Maleiwa süpüla taluwataaushinjachin nutuma Cristo Jesús, pansaasü tia wanaapünaa sümaa tü pütchi nüküjatüjütkalia Maleiwa süchiki kateerüin noʼu na wayuu oushikajaakana süchiirua nukuwaʼipa Cristo Jesús.
2 Karaloʼutakat tüü pümüinjatü piakai Timoteo, müshi pia maʼaka naaʼin wanee tachon aikai tapüla:
Kasataalejeseʼe kamaneein pümüin chi Washikai Maleiwa jee nümülialaain naaʼin paalin jee jimatüin paaʼin nutuma jee nutuma Cristo Jesús chi Waseñotsekai.
3 Taapüin analuʼutkat nümüin Maleiwa (nia taʼyataaka amüin maʼaka naʼyataapuʼuin na tatuushinuukana nümüin jee wulesü taaʼin).* Sotowaishi pia taaʼin waneepia toʼuraajawaipa nümüin Maleiwa saʼwai jee soʼukai.
4 Teʼree amüinchi pia saaʼujee sotuin taaʼin piʼyalajüinkain, teʼrülejeʼeya pia talateechi taya.
5 Sotusü taaʼin lotuin sukuwaʼipa punoula, shia anoujaka püpüleerua Loida tü poushukat jee müsia Eunice tü piikat. Tatüjaa aaʼu müin punoula maʼaka nanoula.
6 Soto paaʼin tü kasa naapakat Maleiwa pümüin soʼu teʼitaain tajapü paaʼu. Tia naapakat Maleiwa pümüin, müinjatü puchuwajaakai saaʼin maʼaka naaʼin wanee wayuu awaʼwajakai siki süpüla chuwatüinjatüin maʼin shia.
7 Nnojoishii mmoluin waya, jama naapüin wamüin Maleiwa tü nüpülainkat, naapüin shia wamüin süpüla katchinjatüin waaʼin, alinjatüin wayuu wapüla jee laülaainjatüin waaʼin.
8 Müshijeseʼe nnojolinjachin pia japülin sünain aküjaa pütchi nüchiki chi Waseñotsekai jee nnojoishi japülinjachin pia taka, püreesashi taya saaʼujee toushikajaain süchiirua nukuwaʼipa. Shia anaka aluʼu pücheküle süchiki müliainjachin pia saaʼujee püküjain tü pütchi anakat maʼin* sümaa punoujain sünain pükaalinjüneechin nutuma Maleiwa sükajee tü nüpülainkat.
9 Nuʼtteʼerüin waya jee nüneeküin waya süpüla wuleinjatüin wakuwaʼipa, nnojoliipejeʼe nüneeküin waya saaʼujee tü kasa waaʼinrakat, shia süka nüchekalain shia jee saaʼujee kamaneein maʼin nia. Kakaliaichi kamaneein nia wamüin nükajee Cristo Jesús.
10 Atüjaanüitpapejeʼe maʼin saaʼu tia sükajee niiʼiyalaain Cristo Jesús, chi Oʼtteʼerakai waya. Najaʼttirüin tü outaakat jee nüküjain wamüin sükajee tü pütchi anakat maʼin tü waaʼinrajatkat süpüla katüinjatüin woʼu jee süpüla nnojoluinjatüin ittüin weʼiruku.
11 Aneekuushi taya süpüla taküjainjachin tü pütchi anakat maʼin, süpüla taluwataaushinjachin jee süpüla tekirajüinjachin sünain tia pütchikat.
12 Müshijeseʼe müliain taya sünainjee tia, nnojoipejeʼe taya japülin, jama teʼraajüin chi Maleiwa tanoujakai anain jee tatüjaa aaʼu naaʼinmajeerüin tü kasa tapütakat najapuluʼu, meeria sukuwaʼipa tia süsalaleepa saainjala wayuu nutuma.
13 Ayataʼaya püshatüin sukuwaʼipa tü pütchi anasü paapakat tatuma saaʼujee kanoulain pia jee alin püpüla wayuu, tü eekat sünainjee paaʼinwain pia nümaa Cristo Jesús.
14 Paaʼinmaja tü korolo kojutusü eʼitaanakat pajapuluʼu, puunteerü tia sükajee tü nüpülainkat Maleiwa, tü anuu jooluʼu eein waaʼu.
15 Paapüirüjaʼa süchiki nakatalaain toulia na wayuu chajanakana Asia jee akatalaashi toulia Figelo nümaa Hermógenes.
16 Kasataalejeseʼe namüliajünüin nutuma chi Señotkai* na nipialujunakana Onesíforo, jama nükatsüinrawalin taaʼin Onesíforo jee nnojoishi japülin nia taka saaʼujee püreesain taya.
17 Jamüshijaʼa soʼu chajachin nia Roma, nüchajaa achikichi maʼin taya nüntaleepaʼaya tanain.
18 Kasataalejeseʼe nümüliajünüin aaʼin Onesíforo nutuma chi Señotkai Jehová* soʼu tü kaʼi kasalajaneetkalü oʼu saainjala wayuu nutuma. Pütüjaa aaʼu süpüshuaʼa tü naainjakat tapüleerua soʼu chajachin taya Éfeso.
Noota
^ Pünaʼla tü pütchikat «Conciencia» suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
^ «Nia Jehová saashajaaka achiki».
^ Pünaʼla tia suluʼu tü kanüliakat «Sooʼomüin pütchi A5».
