Apocalipsis 14:1-20
-
Chi Anneetchonkai namaa 144.000 wayuu (1-5)
-
Apünüinshii aapiee aküjakana pütchi (6-12)
-
Wanee aapiee waawatakai sirumatuʼupünaa sümaajachi pütchi anaka maʼin (6, 7)
-
-
Talatüinjana na eekai outuin maaʼulujee yaa naʼakajee na nikirajüinkana Cristo (13)
-
Ashannüsü tü aʼttiee sainküinpünaakat tü mmakat (14-20)
14 Teʼraka chi Anneetchonkai shaʼwatüin saaʼu tü wutai kanüliakat Sion, eejana 144.000 wayuu nümaa ashajünakana eʼipoʼunain nünülia chi Anneetchonkai jee nünülia chi Nüshikai.
2 Taapakalaka shiʼira wanee kasa ojuʼitaka chaa sirumatuʼujee, mataasü aka saaʼin suʼlotuin wüin eekai miyoʼuin maʼin jee müsü aka shipisana sütürüla juya eekai emetuluin maʼin. Tü taapakat müsü aka neeʼirain wayuu eeʼirajülii aʼyalajirakana tü kanüliakalü arpa.
3 Eeʼirajüshii naya sümülatuʼu tü einasee süpülajatkalü aluwatawaa jee namülatuʼu na pienchishiikana aapiee otta namülatuʼu na laülaashiikana, müsü jeketükai saaʼin tü jayeechi neeʼirajakat. Nnojotsü jaralüin atüjain eeʼirajaa tia jayeechikat, nayaʼala neʼe atüjaka eeʼirajaa shia na 144.000 wayuuinnua ayaʼlajuushikana naʼakajee na wayuu kepiakana saaʼu tü mmakat.
4 Nnojoishii naya sünainpünaain jieyuu, nnojoishii naya aʼluwajiraain nakuwaʼipa sümaa wayuu. Naya wayuukana oʼunushii naya nümaa chi Anneetchonkai, jaʼitashi jalapünaain nia napüleerua. Müshii nayaʼlajünakai aaʼin saʼakajee wayuu süpüla müinjanain naya maʼaka saaʼin tü palajatkat süchon aʼttiee aapünakat nümüin Maleiwa jee nümüin chi Anneetchonkai.
5 Nnojoishii naya emeejüin wayuu jee nnojotsü eein wanee kasa mojukat sünain nakuwaʼipa.
6 Teʼraka wane aapieʼeya waawatakai sirumatuʼupünaa sümaajachi nia pütchi anaka maʼin nüküjainjatka namüin na kepiakana saaʼu tü mmakat, nüküjainjatü shia sümüin wayuu saʼakajeejatü eʼirukuukat süpüshuaʼa, wayuu naatayaa maka anüiki, sainküinjeejatü pueulo süpüshuaʼa jee sainküinjeejatü tü mmakat.
7 Emetutsü nünüiki sünain maa: «Kojutu jümüin Maleiwa jee juʼwaaja nia, jama süntüitpain tü oora süsalainjatkalü oʼu saainjala wayuu nutuma. Anakajaʼa juʼwaajüle chi kakumalakai tü sirumatuʼukat, tü mmakat, tü palaakat jee müsia eejeere süparalüin wüin».
8 Nüntakalaka wane aapieʼeya sünain müin nünüiki mayaa: «¡Akanajuuitpan! ¡Shia akanajuuka Babilonia tü Kojutukalü Atumawaa! Müshii süsiʼrakai naaʼin wiino na wayuu kepiakana sainküinpünaa tü mmakat, saaʼinrüin tia süka suʼluwajiraweein maʼin sukuwaʼipa* namaa».
9 Eekalaka joo wane aapiee nüchikumüin chi wane, emetutsü nünüiki sünain maa: «Eere wanee wayuu aʼwaajakai tü wüchii wünaʼapüjatkat sümaa tü shiyaakuakat jee shiʼitaanüle sejeetse sünain niʼipoʼu jee sünain najapü,
10 aashichijaweechi chi Maleiwakai nooʼomüin, meechi nüsiʼnnakai aaʼin tü wiino jashüʼükat maʼin alaʼaluushikat suluʼu tü iita sümaajatkat jashiee, mülieechi nia atumawaa saʼaka siki jee saʼaka azufre noʼupala na aapiee aneekuushikana jee nuʼupala chi Anneetchonkai.
11 Kaiteerü neʼe waneepia sümüsain tü müliakalü atuma nia. Nnojoleena eemeraain soʼukai jee saʼwai na wayuu aʼwaajakana tü wüchii wünaʼapüjatkat jee na aʼwaajakana tü shiyaakuakat, namaʼaleeya na wayuu eʼitaanakana anain sünülia.
12 Müsüjeseʼe choʼujaain nachecherüinjatüin naaʼin na aneekuushikana, na oonookana sümaa tü nuluwataakalü anain Maleiwa jee na ichekana anoula nünain Jesús».
13 Taapakalaka wanee pütchi sirumatuʼujee sünain maa: «Anuu tü püshajüinjatkat: ‹Anakuwaʼipalii na eekai outuin maaʼulujee yaa naʼakajee na nikirajüinkana chi Señotkai,* anakajaʼa neemeraale suulia tü naʼyataakalü maʼin anain süka nnojoleerüin motuin naaʼin Maleiwa tü kasa naainjakat,* shia nümaka tia chi Maleiwakai sükajee tü nüpülainkat›».
14 Teʼraka wanee siruma kasuusü, eejachi wanee müshi aka saaʼin süchon wayuu joyotuin saaʼu tü sirumakat, eejatü saaʼu nikii wanee kotse aainjuushi süka ooro otta eejatü najapuluʼu wanee chajaruuta ashannaka aka aʼttiee.
15 Teʼraka joo wane aapieʼeya ojuʼitaakai suluʼujee tü aʼwaajüleekat Maleiwa,* emetutkalaka nünüiki sünain maa nümüin chi joyotushikai saaʼu tü sirumakat: «Piʼyataa süka türa chajaruutakat jee püshana tü aʼttieekat süka, jama keraaitpain sükalia süpüla ashannaa, keraaitpa sükalia süpüla süshannajatüin süpüshuaʼa tü aʼttiee sainküinpünaakat tü mmakat».
16 Niasaʼa chi joyotushikai saaʼu tü sirumakat, niʼitaain tü chajaruutakat wanaapünaa sümaa tü mmakat süpüla nüshanüinjatüin tü aʼttiee eekat sainküinpünaa tü mmakat.
17 Teʼraka joo wane aapieʼeya ojuʼitaakai suluʼujee tü aʼwaajüleekat Maleiwa chakat sirumatuʼu, eejatiaʼaya najapuluʼu chi aapieekai wanee chajaruuta kasasü maʼin ashannaka aka aʼttiee.
18 Nujuʼitakalaka joo wane aapieʼeya wanaapünaa maʼin sümaa tü aʼajüleekat wanee kasa nümüin Maleiwa, chia aapieekai nia chi aaʼinmajakai tü sikoʼukat. Emetutsü maʼin nünüiki sünain maa nümüin chi kajapuluʼushikai tü chajaruuta kasakat maʼin süpülajatka ashanaa aʼttiee: «Piʼyataa süka türa chajaruuta kasakat maʼin, pukotchojo süchon tü uuwoʼulia eekat sainküinpünaa tü mmakat, jama jakütüitpain shia».
19 Niʼitaaka chi aapieekai tü chajaruutakat wanaapünaa sümaa tü mmakat, nüshottakalaka tü uuwoʼulia eekat sainküinpünaa tü mmakat, nujutuinjeseʼe shia eere süchüüjünüin tü uuwakat, miyoʼu maʼin tia, shiyaawase shia jashichin maʼin chi Maleiwakai.
20 Süchüüjünaka tü uuwakat anooipaʼa sünain tü pueulokot, süparatkalaka isha eere süchüüjünüin tü uuwakat, miyoʼu maʼin shia. Antaleesia tü ishakat eepünaale shiʼitaanüin sujuleenase ama sünain otta eesü maʼaka 296 kiloometüro seeruluin tia.*
Noota
^ Pünaʼla tia suluʼu tü kanüliakat «Jamaluʼulu pütchikat».
^ Jee nayale «na paaʼinwakana nümaa chi Señotkai».
^ «Namaasü tü kasa naaʼinrapuʼukat» maluʼulu tia suluʼu griego.
^ «Tü Kuatta Wulekat maʼin suluʼu tü aʼwaajüleekat» maluʼulu tia.
^ «1.600 estadio» maluʼulu tia suluʼu griego. 185 metro wanee estadio. Pünaʼla tia suluʼu tü kanüliakat «Sooʼomüin pütchi B14».
