Karaloʼuta namüinjatka na chajanakana Filipos 2:1-30
-
Nnojotsü yaletüinjatüin naaʼin wanee anoujashi (1-4)
-
Nnojotsü yaletüin naaʼin Cristo jee aapünüsü nümüin wanee aʼyatawaa alanaʼaleeka maʼin (5-11)
-
«Ayataʼaya jiʼyataain süchiirua juʼtteʼennajanain» (12-18)
-
«Meena jia maʼaka saaʼin wanee luusa eekai chuwatüin» (15)
-
-
Ajütünüshi Timoteo nümaa Epafrodito nutuma Pablo (19-30)
2 Anakajaʼa jiʼyataale süchiirua jükatchinrüin naaʼin na waneinnua sümaa paaʼinwain jia nümaa Cristo. Jümüliaja naaʼin sümaa alin naya jüpüla. Aleewajiraa jia namaa sünain anoujaa, alinjana naya jüpüla jee amülialaainjatü jaaʼin naalin.
2 Talateechi maʼin taya jutuma jaaʼinrüle tia. Anajiraainjana jia, aijiraainjana jee paaʼinwajiraainjana jia sünain tü jaaʼinrakat sümaa tü jülüjakat jaaʼin.
3 Nnojo jaaʼinrüin wanee kasa sutuma juchunjiraain neʼe jee shiale sutuma yaletüin jaaʼin. Nnojoluinjatü yaletüin jaaʼin, kojutuinjana jutuma na waneinnua suulialeʼeya kojutuin neʼe jia jümüinjiraa.
4 Nnojotsü shiainjatüin neʼe kapülain jaaʼin tü jukuwaʼipakat, kapülainjatiaʼaya jaaʼin nakuwaʼipa na waneinnua.
5 Ayataʼaya wanaawain tü jülüjakat jaaʼin sümaa tü jülüjakat naaʼin Cristo Jesús,
6 mayaainjeʼe müin nukuwaʼipa maʼaka nukuwaʼipa Maleiwa, nnojotsü antapünaain suluʼu nikii laülaainjachin nia wanaa nümaa Maleiwa.
7 Nüpütüin süpüshuaʼa tü kasa eejatkat nümaʼana, anakalaka nümüin achepchieeinjachin nia jee müitpa nukuwaʼipa maʼaka sukuwaʼipa wayuu.
8 Wanaa sümaa wayuuin Cristo Jesús, nnojotsü yaletayaain nukuwaʼipa suʼupala wayuu, oonooshi nia sümaa nünüiki chi Nüshikai outaleepaʼaya nia. Outushiaʼaya nia soʼu nükachennüin sünain wanee wunuʼu.*
9 Suluʼujee tia, naapakalaka Maleiwa nümüin wanee aʼyatawaa alanaʼaleeka maʼin jee saaʼu kamaneein chi Maleiwakai nümüin, naapüin nümüin wanee laülawaa alanaʼaleeka maʼin suulia tü laülawaa aapünakat sümüin wayuu.
10 Naaʼinrüin Maleiwa tia süpüla süsapainkainjatüin wayuu süpüshuaʼa saaʼu nünülia Jesús, (nasapainkainjana na chakana sirumatuʼu, na yaakana mmapaʼa jee na chakana shiinaluʼu mma)*
11 süküjaiwa wayuu süpüshuaʼa niain Jesucristo chi Señotkai, chi aʼwaajünakai anainjee chi Washikai Maleiwa.
12 Tawalayuu aishiikana tapüla, ayataʼaya joonooin sümaa nünüiki Maleiwa, (nnojotsü neʼe jaaʼinrajatüin tia soʼu chain taya jümaa. Jaaʼinrajatü maʼin shia müinmaʼa yaa soʼu nnojolin chain taya jümaa). Ayataʼaya jiʼyataain süchiirua juʼtteʼennajanain sümaa kojutuin maʼin jümüin chi Maleiwakai.
13 Nia Maleiwa katchinka atuma jaaʼin süpüla talatüinjachin nia jutuma, niʼitaainjeseʼe suluʼu jaaʼin jaaʼinreein sümüin wanee kasa jee juuntuin jaaʼinrüin shia nutuma.
14 Ayataʼaya jaaʼinrüin kasa süpüshuaʼa sümaa nnojoliin jiʼyounnalaain jee sümaa nnojoliin jüʼülüjiraain
15 süpüla nüchooinjanain jia Maleiwa sümaa wulein jukuwaʼipa jee nnojoluin kasain jaainjalain. Nnojoleetkalaka yarüttüin tü jukuwaʼipakat, meena jia maʼaka saaʼin wanee luusa eekai chuwatüin naʼaka na wayuu mojulaashiikana jee aaʼinrakana kasa mojusü.
16 Jüchecheraa maʼin sünain tü pütchi katakalü atuma soʼu wayuu. Talateechikalaka taya soʼu nükalia Cristo sümaa tatüjaain saaʼu nnojoluin amülain neʼe tü taaʼinrakat jee tü taʼyataainkat jüpüleerua.
17 Jaʼitashi müin taya aka saaʼin tü asüüshi oʼyotunakat süpüla saapünüin nümüin Maleiwa. Eeshia taya akaalinjain sünain tü jaainjakat jee sünain tü jiʼyataainkat nümüin Maleiwa waneepia, müshijeseʼe talatüin taya jee anasü taaʼin jümaa jüpüshuaʼa.
18 Akaainjanaʼaya neʼe jia, talatüinjatü jaaʼin wanaa tamaa.
19 Shia taʼatapajaka nükaalinjain taya chi Señotkai Jesús süpüla tajütüin jümüin Timoteo, sükatchinraajeetka taaʼin taapapa jüchiki.
20 Nnojoishi eein wanee wayuu tamaa eekai müin aka naaʼin, kapülasü maʼin naaʼin tü jukuwaʼipakat.
21 Na wane wayuukana shia neʼe kapülaka naaʼin tü nakuwaʼipakat, nnojotsü jamajatüin namüin tü nüchekakat Jesucristo.
22 Jütüjaapejeʼe saaʼu anain maʼin nukuwaʼipa Timoteo, jama niʼyataajiraain maʼin tamaa sünain aküjaa tü pütchi anakat maʼin maʼaka naaʼin wanee jintüi aʼyataajiraakai nümaa nüshi.
23 Taluwataamaateechi nia chaa jümaʼanamüin tatüjaapa saaʼu tü aaʼinnajatkat taka.
24 Nüchekülejeʼeya chi Señotkai tapüleerua, chamaateechi taya jümaʼanamüin soʼu palit kaʼi.
25 Anashiipejeʼe saaʼin tamüin müinmaʼa yaa niale tajütüin jümaʼanamüin Epafrodito, tawalaichi nia sünain anoujaa, aʼyataajiraashi nia tamaa jee müshi nia maʼaka naaʼin wanee nusurulaatse Cristo. Nia chi jüjütakalinka tamaʼanamüin süpüla nükaalinjain taya sünain wanee kasa eekai choʼujaain tamüin.
26 Niʼreein maʼin jia jüpüshuaʼa jee mojusü maʼin naaʼin saalinjee jaapüin süchiki ayuulinkain nia.
27 Shiimainña maʼin mayein maʼin nia, outataaichijeʼe. Amülialaapejeʼe naaʼin Maleiwa naalin jee amülialaasia naaʼin Maleiwa taalin tayakai suulia joo mojuin maʼin taaʼin saalinjee pachiiruaʼalaain neʼe tü kasa alatakat tamüin.
28 Müshijeseʼe tajütamaatüin nia jümaʼanamüin, talateetkalaka jaaʼin jüchikuaʼa jiʼrapeena nia jee müshia tayakai talateeria taaʼin.
29 Talata jaaʼin nümaa nüntapa chaa jümaʼanamüin maʼaka talatüin jaaʼin namaa na wayuu oushikajaakana süchiirua nukuwaʼipa chi Señotkai. Kojutu jutuma waneepia na wayuu eekai müin aka nukuwaʼipa.
30 Outataaichijeʼe nia saaʼujee niʼyataain nümüin Cristo jee nnojoishi mmoluin nia seema outaa süka nükaalinjeein taya, jama nnojoliin yaajanain jia süpüla jiainjanain akaalinjain taya.
Noota
^ Shia tü akachennapuʼukalü anain wanee wayuu süpüla outajachin nia. Nuchuntuin Jesús tia pütchikat süpüla niyaawajeʼerüin shia sümaa tü müliaa niʼrakat wanee wayuu saaʼujee nikirajüin nia Jesús. Pünaʼla tia suluʼu tü kanüliakat «Jamaluʼulu pütchikat».
^ Naya aashajaanaka achiki na outushii asoʼireʼennajanakana aaʼin.
