Karaloʼuta namüinjatka na Hebreokana 11:1-40
11 Kanourale pia shiimainjeerü pümüin piʼreerüin tü kasa paʼatapakat, shiimainjeerü pümüin tü kasa punoujakalü anain jaʼitasü nnojoluin piʼrüin shia.
2 Aküjünüsü namüin na watuushinuukana anain nakuwaʼipa noʼuluʼu Maleiwa sutuma kanoulain naya.
3 Sutuma kanoulain waya wayaawata aaʼu süikaleʼennüin shikii tü kasa eekat maaʼulu* süka nümajalain shia Maleiwa otta tü kasa weʼrakat sünainjeejatü tü kasa nnojotkat weʼrüin.
4 Sutuma kanoulain maʼin Abel nüsülajüin nümüin Maleiwa wanee kasa alanaʼaleekat maʼin ojutu suulialeʼeya tü nüsülajakat Caín nümüin Maleiwa. Süküjünakalaka nümüin lotuin nukuwaʼipa noʼuluʼu Maleiwa, jama talatüin naaʼin Maleiwa sümaa tü nüsülajalakat. Mayaainjeʼe outuin Abel ayatayüliʼiya waya atüjain nünainjee, jama wayuuin kanoulashi maʼin nia.
5 Sutuma kanoulain Enoc amaanüshi nia nutuma Maleiwa suulia niʼrüin outaa, nnojoikalaka süntüin nünain wayuu, jama nümaanüin* nutuma Maleiwa. Shiasaʼa süpülapünaa nümaanüin aküjünüsü nümüin talatüin naaʼin Maleiwa nümaa.
6 Nnojoleerü anain wakuwaʼipa noʼuluʼu Maleiwa manourale waya, jamüshijaʼa chi wayuu eekai nürütkaain nünainmüin Maleiwa, nunoujainjatü anain shiimain eein chi Maleiwakai otta naapüin kasa anasü namüin na wayuu achajaakana maʼin nüchiki.
7 Sutuma kanoulain Noé kojutushi Maleiwa nümüin wanaa sümaa süküjünüin nümüin süchiki tü kasa alatajatkat süpülapünaa sülatüin, nukumajakalaka wanee anuwa noʼttaainjatka akajee na nüpüshikana. Sutuma kanoulain Noé atüjaana aaʼulu keraain na wayuukana süpüla najaʼttinnajanain, lotokoloko nukuwaʼipa Noé naashin Maleiwa sutuma kanoulain nia.
8 Sutuma kanoulain Abrahán oonooshi nia sümaa tü münakat nümüin, nuʼunakalaka suluʼumüin wanee mma aapünajatka nümüin. Oʼunushi nia mayaainjeʼe nnojoluin nütüjaain saaʼu jalainjachin noʼotuin.
9 Sutuma kanoulain Abrahán müshi nia maʼaka naaʼin wanee wayuu eekai wattajeʼewalin mayaainjeʼe sulujachin nia tü mma aapünajatkat nümüin. Kepiashi nia nümaa Isaac otta müshia Jacob suluʼu miichi aainjuushikat süka loona, aküjünüsiaʼaya namüin naya wayuukana saapünajatüin namüin tia mmakat maʼaka saapünajatüin nümüin Abrahán.
10 Naʼatapajüin Abrahán niʼrüinjatüin tü pueulo shiimainsükalüjaʼaya ashaʼwaleʼennüin asaʼa, nia Maleiwa akumajaka sukuwaʼipa jee nia ashaʼwaleʼeraka shia.
11 Sutuma kanoulain Sara kachonsü shia mayaainjeʼe laülaairüin shia,* jama sütüjaain saaʼu nikeraajeerüin nünüiki* chi aküjakai sümüin kachoinjatüin shia.
12 Wattaitkalaka saalii nüchooin chi wayuu makai outakai naaʼin paala, watta naalii na nüchooinkana maʼaka wattain saalii tü shüliwalakat jee mayaawajuusalii naya süka wattain naalii maʼaka saaʼin tü jasai sotpünaakat palaa.
13 Outushii naya wayuukana sümaa ayatüinña ichein nanoula mayaainjeʼe nnojoluin neʼrüin shikeraajüin tü kasa aküjünakalü achiki namüin paala. Mapajeʼe neʼrakai saaʼin wattajee otta talatüsü naaʼin sutuma tia, naküjainjeseʼe suʼupala wayuu nnojoliin noumainpaʼajanain naya otta motsoʼopünaain neʼe namaa saaʼu tü mmakat.
14 Atüjaana aaʼu sünainjee tü namakat naya wayuukana nachajaain maʼin süchiki eeinjanale naya.
15 Jülüjakuʼu sümülejeʼeya naaʼin naya wayuukana tü mma noʼunakalü aluʼujee paala, aleʼejüshiije naya suluʼumüin.
16 Nachajaakalaka anainjatüin maʼin eeinjanale naya, shiaʼaya nachajaaka tü kasa iipünaajeejatkat. Müshijeseʼe nnojolin japülin Maleiwa naka jee nnojoishi japülin nia saaʼu naküjain Namaleiwasein nia, jama yapaitpain nutuma wanee pueulo napüla naya wayuukana.
17 Sutuma kanoulain Abrahán ooʼulaküna aaʼinchi nia nutuma Maleiwa, müshi naapakaijaʼa nikii Isaac. Mayaainjeʼe talatüin naaʼin Abrahán wanaa sümaa süpansaajünüin nümüin tü pütchikat, nuuʼulaküin naapüin nikii chi waneeshikai nüchon süpüla outajachin nia.
18 Naaʼinrüin tia mayaainjeʼe «nieechi kalüinka atuma pia Isaac» nümünüin amüin.
19 Nunouja anainrü Abrahán eein süpüla nüsoʼireʼennüin aaʼin chi nüchonkai nutuma Maleiwa, müshijeseʼe müin niiteʼennakai aaʼin nümüin süchikijee outaa, shiyaawase tia tü kasa alatajatkat mapeena.
20 Sutuma kanoulain Isaac nuchuntuin nümüin Maleiwa anakuwaʼipalinjachin Jacob otta müshia Esaú, nüküjainjeseʼe namüin tü kasa alatajatkat mapeena.
21 Nülüʼülapa Jacob süpüla outaa nuchuntuin nümüin Maleiwa anakuwaʼipaliinjanain na nüchonniikana José, naaʼinrüin tia süka kanoulain maʼin nia. Nüsapainkaka nia sünain aʼwaajaa Maleiwa sümaa nüpüjiain tü nuwaraaratsekat.
22 Sutuma kanoulain José nüküjain namüin na nüikeyuukana Israel nojuʼitajanain* Egiptojee jee nüküjain namüin tü naaʼinrajatkat süka niipüse, naaʼinrüin tia nülüʼülapa süpüla outaa.
23 Sutuma kanoulain na wayuu kachooinkana Moisés, nounjuluin nia apünüinpa kashi nia, jama anachoin nia noʼuluʼu, nnojoliikalaka naya mmoluin seema jamajaa sünainjee nnojoluin naaʼinrüin tü nuluwataakalü anain chi aluwataashikai.
24 Sutuma kanoulain Moisés niyouta achikit miyoʼupa nia niʼraajünüinjachin suluʼu süchooin nia tü nüchonkot Faraón.
25 Anashiikalaka nümüin müliainjachin nia atumawaa wanaa namaa na nüpüshikana Maleiwa suulialeʼeya talatüin naaʼin motsomüin neʼe sünain aaʼinraa kasa mojusü.
26 Alanaʼaleesia maʼin sujutu nümüin tü müliaa niʼrakat süka nüneekünüin* nutuma Maleiwa suulialeʼeya süwashirüin tü mmakalü Egipto, jama jülüjain naaʼin waneepia niʼreechin kasa anasü suluʼujee tia.
27 Sutuma kanoulain Moisés oʼunushi nia Egiptojee sümaa nnojolin nia mmoluin seema tü eekat süpüla naaʼinrüin chi aluwataashikai nüka. Nnojotsü ashapajaain naaʼin soʼunnaa niʼrüin müliaa, jama müin niʼrakaijaʼaya naaʼin chi Maleiwakai mayaainjeʼe meʼrujuin nia.
28 Sutuma kanoulain Moisés ekaashi nia soʼunnaa tü Pascuakat jee nütülittiraka süsha mürüt sotpünaa soʼu nepia na nüpüshikana Maleiwa suulia jamajüin nutuma chi aapiee nümaʼanajeejachikai Maleiwa na neʼirumakana.
29 Sutuma kanoulain na nüpüshikana Maleiwa alatüshii naya pasanainpünaa sünain tü palaa Ishosükat, müshiijaʼaya waraittakai naaʼin sooʼopünaa mma eekai josoin. Shimiralapejeʼe neʼe palaa na egipciokana wanaa sümaa nalateein pasanainpünaa sünain.
30 Sutuma kanoulain na nüpüshikana Maleiwa naʼleeyalüin süsepü Jericó soʼunnaa akaratshi kaʼi, sujuttakalaka süsepü tia pueulokot.
31 Sutuma kanoulain Rahab, tü wayuu maaʼinsatkat, nnojotsü outuin shia wanaa namaa na wayuu nnojoliikana oonooin sümaa nünüiki Maleiwa, jama kamaneein shia namüin na wayuu ajütünakana sünain anajaa saaʼu tia mmakat.
32 ¿Choʼujaasüche taküjain jümüin nachiki nooʼomüin naya wayuukana? Kamaʼajeechi taya taküjale jümüin nüchiki Gedeón, Barac, Sansón, Jefté, David, Samuel otta nachiki na wane nünüikimaajanakana Maleiwa.
33 Sutuma kanoulain naya nakanajüin na wayuu aluwataakana saaʼu mma, eesü lotoo akuwaʼipaa natuma, aküjüna achikit namüin neʼreenain kasa anasü, müsü nasürülakai saaʼin saanükü león suulia jamajüin naya sutuma,
34 nnojoishii jotuin naya sutuma siki, isajüshii naya suulia oʼutunaa aaʼin süka chajaruuta, katchinsü naaʼin mayaainjeʼe maʼlain naaʼin paalajee, yalayalashii naya sünain atkawaa otta neipirüin surulaat eekai sushutuin naaʼu.
35 Eeshii na jieyuu asoʼiraakana aaʼin apüshi süchikijee outaa, eepejeʼe na wayuu oonookana waneepia nümüin Maleiwa mayaainjeʼe müliain maʼin naya atumawaa outaleepaʼaya naya, naaʼinrüin tia süpüla anainjatüin maʼin nakuwaʼipa nasoʼiraapa aaʼin.
36 Eeshii na meeʼerapalakana, na aʼyaajünakana, eeshiʼiya joo na kapükana atumawaa kaleena jee püreesakana atumawaa.
37 Eeshii na eʼinaʼannakana süka ipa, na ooʼulakünakana aaʼin, na achonoojunakana, na oʼutunakana aaʼin süka chajaruuta, eeshii na waraittakana sümaa kasheʼin naya süta anneerü otta kaaʼulouta, eʼrüshii maʼin naya choʼujawaa, wainma kasa mojusü neʼraka jee müliashii maʼin naya atumawaa.
38 Anamia maʼin naya wayuukana, nnojoliika naya anain süpüla saʼakaa wayuu. Waraittüshii naya isashiipaʼapünaa, uuchoʼupünaa, suluʼupünaa koʼushii otta suluʼupünaa ipa.
39 Mayaainjeʼe süküjünüin namüin napüshuaʼa naya wayuukana anain nakuwaʼipa noʼuluʼu Maleiwa sutuma kanoulain naya, nnojotsü neʼrüin ekeraajüin tü kasa aküjünakalü achiki paala namüin,
40 jama keraatüjülüinña nutuma Maleiwa weʼrüinjanain kasa anasü. Nnojotkalaka süpüla sülaʼajaanüin naainjala naya wayuukana wapüleerua.
Noota
^ Jee shiale «sistemas de cosas». Pünaʼla tia suluʼu tü kanüliakat «Jamaluʼulu pütchikat».
^ «Alateʼennüshi» maluʼulu tia suluʼu griego. Shia aküjüneeka achiki jamüin nukuwaʼipa Enoc wanaa sümaa outuin nia. Eeshijaʼa nümaanüle nutuma Maleiwa jee nuuʼulaale outuin nia süka anaka akuwaʼipa suulia müliain nia atumawaa nuʼutunajachipa aaʼin natuma na nüʼünüükana.
^ «Isairü süchiki kachonwaa» maluʼulu tia.
^ Jee shiale «waneepieechin».
^ Tü pütchi griego ashajünakat yaʼayaa shiaʼaya neʼe tü ashajünakalü aka suluʼu griego sünülia tü karaloʼutakat Éxodo.
^ «Cristo» maluʼulu tia suluʼu griego.
