Tü nüshajalakat Mateo 24:1-51
-
AYAAWATÜNAKA AKAJEE YAAICHIPAIN CRISTO (1-51)
-
Atkaajiraweerü wayuu, aijeerü jamü, akutkujaajeerü mma (7)
-
Aküjüneerü tü pütchi anakat maʼin (14)
-
«Eʼreerü maʼin wayuu müliaa» (21, 22)
-
Shiyaawase yaaichipain chi Süchonkai Wayuu (30)
-
Tü wunuʼu kanüliakat higuera (32-34)
-
Maʼakaapuʼu sülatüin wanee kasa nükalioʼu Noé (37-39)
-
Eejüinjatü saaʼin wayuu waneepia (42-44)
-
Chi achepchiee oonookai otta chi achepchiee mojulaashikai (45-51)
-
24 Nujuʼitapa Jesús suluʼujee tü aʼwaajüleekat, arütkaashii na nikirajüinkana nünainmüin süpüla neeʼiyatajatüin nümüin anain maʼin shiyolojo tü aʼwaajüleekat sümaʼaleeya tü süsepükat.
2 Nümakalaka Jesús namüin: «¿Ponusü maʼin jaaʼin türa jiʼrakat?, shiimain sünain sujuʼttinneerüin, osolojuneerü süpüshuaʼa türa ipakat».
3 Wanaa sümaa joyotuin Jesús eekai tü wutai kanüliakat Olivos, narütkaaka na nikirajüinkana namüiwaʼa nünainmüin jee namakalaka nümüin: «Püma wamüin kasoʼuleerüin alatüin tü makat, kaseerüin wayaawatüin akajee yaaichipain pia* otta sülüʼülaain sükalia süpüla sajaʼttajatüin tü kasa alatakat sainküin mma».*
4 Nusoutakalaka Jesús namüin: «Eeja jaaʼin suulia shimeejüin jia wayuu.
5 Eejeena na wayuu ‹tayaʼaya Cristo› makana otta wainmeena na wayuu nemeejakana.
6 Aapeena jia süchiki atkawaa suluʼu mma pejepünaa jünain jee suluʼu mma wattapünaa. Nnojotsü ainkuuinjatüin jaaʼin süka sülatüinjatüinña makalü aka saaʼin tia. Nnojotpejeʼe antamaateerüin tü kaʼi sajaʼlajaainjatkalü oʼu tü kasa alatakat sainküin mma.
7 »Atkaajiraajeerü wayuu suluʼujeejatü wanee pueulo sümaa waneʼeya, atkaajiraajeerü wayuu suluʼujeejatü wanee mma sümaa waneʼeya, aijeerü jamü otta akutkujaajeerü mma sainküinpünaa mmakat.
8 Suʼttiapejeʼe neʼe müliaa tia makat.
9 »Mülieena maʼin jia atumawaa. Oʼutuneena aaʼin jia otta süʼürüleena jia wayuu maʼleekalia saaʼujee tekirajanain jia.
10 Wainmeena na wayuu eemiajaakana anoula, eejeena na aapakana shikii wayuu, eejeena na üttajiraakana aaʼin.
11 Wainmeena na wayuu emeejünakana natuma na nünüikimaajanayaakana Maleiwa.
12 Maalinjiraajeerü wayuu jooutpa maʼin tü mojulawaakat.
13 Chi wayuu achechetkai naaʼin nieechi oʼttaaka sajaʼttapa tü kasa alatakat sainküin mma.*
14 Aküjüneerü sainküin mma tü pütchi anakat maʼin* süchiki nuluwataainjachin Maleiwa süpüla saapüinjatüin shia wayuu maʼleekalia. Kettaapa tia, anteerü sükalia süpüla sajaʼlajaainjatüin tü kasa alatakat sainküin mma.
15 »Jiʼrapa eere nuʼwaajünüin Maleiwa tü kasa kashüülasü jee ajaʼttirakat wanee kasa, tü nüküjakalü achiki Daniel chi nünüikimaajachikai Maleiwa (anasü niyaawatüle saaʼu tia chi wayuu aashajeʼerakai shia),
16 anashii naʼluwataale saaʼumüin tü uuchikat na wayuu chakana Judea.
17 Chi wayuu yalakai saaʼu nipia, anashi nnojoire nikeroluin suluʼumüin tü nipiakat sünain asaapünawaa wanee kasa eekai nümaʼanain
18 otta chi chakai yüüjapaʼa, anashi nnojoire nüsaapünaain saajuna nüsheʼin.
19 Aluʼutaʼaleeshiijaʼa maʼin na jieyuu ipuonnuukana otta na atujeʼerakana wanaa maʼin sümaa tia kaʼikat.
20 Juʼuraaja maʼin süpüla nnojoluinjanain juʼluwataain juyapoʼu jee sükalioʼu eemerawaa.
21 Eʼreerü maʼin wayuu müliaa. Nnojotsü eeirüin wanee müliaa makalü aka saaʼin tia soʼujee sukumajünüin wayuu sünainmüinreʼeya maaʼutpünaa otta nnojoleerü eein süchikuaʼa wanee müliaa makalü aka saaʼin tia.
22 Nnojorülejeʼe saawaleʼennüin tia müliaakat, ajaʼtteerü wayuu süpüshuaʼa. Aawaleʼenneetpejeʼe shia naaʼujee na aneekuushikana.
23 »Junoujaʼalayaai sünüiki eekai sümüin jümüin ‹Anii Cristo, ichaa chayaan›.
24 Eejeena na wayuu cristokana naashin otta eejeena na nünüikimaajanayaakana Maleiwa. Naaʼinreerü kasa pülasü ponuinjatka saaʼin wayuu shiiʼiree nemeejeein shia, jaʼitakajaʼa na aneekuushikana ooʼulaküneena aaʼin natuma.
25 Taapirüinnapa jia süchiki tü kasa alatajatkat.
26 Sümüle wayuu jümüin nüchiki Cristo ‹ichaasa nia isashiipaʼa›, nnojo juʼunuin chamüin otta sümüle jümüin ‹isaasa nia paülüʼü›, nnojo junoujain tia.
27 Maʼaka sümachetaain shiyaa juya wüinpüjee sümaa sünakaleeinña wopumüin, akaweeria neʼe sukuwaʼipa yaapa chi Süchonkai Wayuu.*
28 Eere outuin wanee kasa, arütkajeerü tü warulapaikat sünainmüin.
29 »Mayaasü sülatüin tia müliaakat, ekuujeechi chi kaʼikai, ekuujeeriaʼaya tü kashikat. Ojunuwaajeerü tü shüliwalakat otta meerü sülianajaanakai aaʼin tü sirumatuʼukat.
30 Shiʼnneetkalaka chaa sirumatuʼu shiyaawase yaaichipain chi Süchonkai Wayuu otta tü wayuu sainküinjeejatkat mmakat, süsheʼejeerü suʼluuwain saalinjee tia. Shiʼreechi chi Süchonkai Wayuu sünain antaa saaʼu siruma sümaa pülasheechin nia otta kojuteechin nia atumawaa.
31 Nüjüteenakalaka na aapiee nümaʼanajeejanakana wanaapünaa maʼin sümaa shiʼyalajinnüin tü konneetakat. Noutkajeʼereenaka na aneekuushi chajanakana palaamüin, wüinpümüin, uuchumüin, wopumüin jee eejeere suʼttuin tü sirumatuʼukat sünainmüinreʼeya wane saʼata.
32 »Jülüjataa jaaʼin sukuwaʼipa tü wunuʼu kanüliakat higuera. Wanaa sümaa yotuin tü sütünakat jee sujuʼinuwaain tü süpanakat, jiyaawata aaʼu sülüʼülüin joutaleʼu.
33 Akaʼaya jiʼrapa süpüshuaʼaleʼeya tü taküjaitpakat jümüin, jütüjaajeerü aaʼu nülüʼülüin maʼin chi Süchonkai Wayuu.
34 Tamüshii paala jia, eejeena na wayuu eekana maaʼulu yaa sülataleepa süpüshuaʼa tü taküjaitpakalü achiki jümüin.
35 Jaʼitasü nnojoluin tü sirumatuʼukat jee tü mmakat, ayateeria tü tanüikikat süpüla kaʼikat süpüshuaʼa.
36 »Matüjaaju aaʼu tü kaʼi jee tü oora sülatüinjatkalü oʼu tia, nnojotsü natüjaain aaʼu tia na aapiee chajanakana iipünaa, jaʼitakajeʼe tayakai,* nnojotsü tatüjaain aaʼu. Niaʼala neʼe atüjaaka saaʼu chi Tashikai.
37 Maʼakaapuʼu sülatüin wanee kasa nükalioʼu Noé, meeria neʼe sukuwaʼipa yaapa chi Süchonkai Wayuu.
38 Jamüsüjaʼa nükalioʼu Noé süpülapünaa süʼitüin tü Juya Miyoʼukat maʼin, ekaasü wayuu, asaasü shia jee kaʼwayuuseyaa müsü. Ekeroto müshijaʼa Noé suluʼumüin tü anuwa miyoʼukat.
39 Nnojoliipejeʼe jaa müin naya wayuukana, süʼitakalaka tü Juya Miyoʼukat maʼin, wuleʼereeka naya. Akaweeria neʼe sukuwaʼipa wayuu yaapa chi Süchonkai Wayuu.
40 Eejeena piamashii wayuu yüüjapaʼa, amaaneechi wanee jee apütüneechi chi wane.
41 Eejeena piamashii jieyuu sünain ayüüjawaa, amaaneerü wanee jee apütüneerü tü wane.
42 Müsüjeseʼe eejüinjatüin maʼin jaaʼin waneepia süka nnojoluin jütüjaain saaʼu tü kaʼi nünteechikalü oʼu chi Jüseñotsekai.
43 »Jülüjataa jaaʼin tüü, nütüjaalejeʼe saaʼu wanee wayuu jalapüshinjachin nüntüin saʼwai wanee kaʼruwarai, matunkuinsaije nia suulia nikeroluin chi kaʼruwaraikai suluʼumüin nipia.
44 Akaainjanaʼaya jiakana eejüinjatü maʼin jaaʼin süka nünta nümeechin chi Süchonkai Wayuu.
45 »¿Jaraiche maʼin chi achepchiee oonookai jee kekiikai maʼin eʼitaanakai nutuma chi nülaamainkai süpüla naapajatüin neküin na wane achepchieekana choʼujaapa shia namüin?
46 Anataʼaleeshijaʼa maʼin chia achepchieekai ayatüle naaʼinrüin tia nüpüla chi nülaamainkai.
47 Shiimain tü tamakat jümüin, eʼitaaneechi nia süpüla sülaülajanain süpüshuaʼa nuwashirüin chi nülaamainkai.
48 »Akaajaʼa wayuutaale mojulaashi chi achepchieekai jee nümataarale suluʼu naaʼin ‹Koulainshi maʼin chi talaamainkai›,
49 niʼyaajataale na achepchieekana wanaa nümaa jee nüsaataale sümaa tü wayuu asünnüükat maʼin,
50 anta meechia nülaamain chia achepchieekai soʼu wanee kaʼi jee soʼu wanee oora nnojotka nütüjaain aaʼu,
51 mülieechi maʼin nia nutuma chi nülaamainkai otta niʼitaajeechi nia naʼaka na wayuu piamakana oʼupünaa, eere niʼyalajeechin jee kepisaneerüin tü naikat.
Noota
^ «Parousía» maluʼulu tia suluʼu griego. Pünaʼla tü pütchikat «Eewaa» suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
^ «Sajaʼttaleepa» maluʼulu tia suluʼu griego. Eesü shiale saashajaain achiki outaleepaʼaya wanee wayuu.
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
^ Jee niale «chi Nüchonkai Maleiwa».
