Karaloʼuta namüinjatka na chajanakana Roma 3:1-31
3 ¿Kasa alanaaka aluʼu nukuwaʼipa wanee judío suulia sukuwaʼipa wayuu naatajatü? ¿Kasa anaka aluʼu süchotoonüin süta nükorolo?*
2 Wainma tü kasa niʼrakat sünainjee tia. Nayayaain na judíokana aküjünüin amüin palajana tü nünüikikat Maleiwa.
3 Eeshii na judío nnojoliikana anoujain, ¿manoujainjeetche wayuu nünain Maleiwa suluʼujee neʼe tia?
4 Nnojottaa. Jaʼitakajeʼe süküjale saʼalain wayuu maʼleekalia, nüküjeerü Maleiwa tü shiimainkat waneepia maʼaka süküjünüin suluʼu tü Karaloʼuta Nüchikimaajatkat, tü makat mayaa: «Shiyaawateetka saaʼu wayuu püküjain waneepia tü shiimainkat otta lotuin pukuwaʼipa neʼipajee na wayuu mojukana anüiki pümüin».
5 Shiyaawata aaʼu wayuu lotuin maʼin nukuwaʼipa chi Maleiwakai sünainjee tü kasa mojukat watuma. ¿Nnojotsüche lotuin nukuwaʼipa Maleiwa sünainjee süsalain waya waainjala nutuma? Shia jülüjaka tia naaʼin waneinnua wayuu.
6 Lotusü maʼin nukuwaʼipa chi Maleiwakai, nnojorülejeʼeya lotuin nukuwaʼipa, ¿jamataalainjatka süpüla kasalajanain saainjala wayuu nutuma?
7 Shiyaawatülejeʼeya saaʼu wayuu lotuin maʼin nukuwaʼipa chi Maleiwakai jee suʼwaajülejeʼeya nia sünainjee tü alawaa taküjakat, ‹¿jamakaʼa kaainjaraika taya naashin Maleiwa?›, eeshii eekai namüin.
8 «Anashii waainjale kasa mojusü, eejeetka kasa anasü suluʼujee tia», ¿jamakaʼa nnojotka müin wanüiki maʼaka waküjain shia naashin waneinnua wayuu aküjakana alawaa wachiki? Nachajaala nooʼomüin naya wayuukana kasalajanainjatüin tia namüin.
9 ¿Kasakaʼa sülanaain aluʼu wakuwaʼipa waya judíokana suulia wayuu yalejee? Nnojotsü kasain sülanaain aluʼu. Kaainjalasü wayuu maʼleekalia, maʼaka waküjaitpain shia. Kaainjalashi chira eekai judíoin jee chira eekai griegoin.
10 Müsü sünüiki tü Karaloʼuta Nüchikimaajatkat Maleiwa: «Nnojoishi eein waneeshiaakaijeʼe wayuu eekai lotuin akuwaʼipa, yüüü.
11 Nnojoishi eein wanee wayuu ayaawatakai saaʼu sukuwaʼipa wanee kasa. Nnojoishi eein wanee wayuu achajaakai nüchiki Maleiwa.
12 Akayalaashii nuulia Maleiwa napüshuaʼa naya wayuukana, nnojoliinnapa kasain anain apüla naya, nnojoishi eein wanee eekai kamaneein naʼakajee».
13 «Müsü naanükü naya wayuukana maʼaka saaʼin wanee woowira eekai jutatüin, aküjashii naya naʼalain. Tü pütchi naküjakat naya wayuukana müsü aka saaʼin shiweneenain wanee wüi».
14 «Noʼulejüin wayuu süka nanüiki jee airuʼutsü nanüiki sümüin».
15 «Moulajüinsalii naya sünain oʼutaa saaʼin wayuu».
16 «Aaʼinrüshii naya kasa mojusü sümüin wayuu otta müliasü maʼin wayuu natuma.
17 Nnojotsü neʼraajüin naya wayuukana kasain wayu tü anajirawaakat sümaa wayuu».
18 «Mojutusai Maleiwa namüin».
19 Süpüshuaʼa tü Pütchi Aapünakat nümüin Moisés namüinjatü shia na wayuu oonookana sümaa tia pütchikat. Müsü sukuwaʼipa tia süpüla nnojoluinjatüin suunjulajüin wayuu süchiki saainjala, shiyaawatüneetka saaʼu kaainjalain wayuu maʼleekalia nuulia Maleiwa otta kasalajanainjatüin sümüin saainjala.
20 Nnojotkalaka lotuin nukuwaʼipa wanee wayuu noʼuluʼu Maleiwa sünainjee neʼe naaʼinrüin tü sümakat tü Pütchi Aapünakat nümüin Moisés. Wayaawatüin sünainjee tia pütchikat wayuuin kaainjaralii waya.
21 Watüjaa aaʼu lotuin nukuwaʼipa wanee wayuu noʼuluʼu Maleiwa, jaʼitashi nnojolin noonooin sümaa tü Pütchi Aapünakat nümüin Moisés maʼaka naküjatüjülüin shia na Nünüikimaajanakana Maleiwa jee maʼaka süküjünüin suluʼu tü Pütchi Aapünakat nümüin Moisés.
22 Lotusü nukuwaʼipa wanee wayuu noʼuluʼu Maleiwa kanoulale nia nünain Jesucristo. Nnojoishi eein wanee wayuu eekai alanaʼaleein akuwaʼipa noulia na waneinnua.
23 Kaainjalasü wayuu maʼleekalia müsüjeseʼe nnojoluin süpüla lotuin sukuwaʼipa maʼaka lotuin nukuwaʼipa Maleiwa.
24 Müshi nuwalaajakai aaʼin Cristo Jesús naainjala naya wayuukana süpüla nuʼtteʼerajanain naya suulia naainjala, lotuitkalaka nakuwaʼipa noʼuluʼu Maleiwa. Nnojoishi achekajüin Maleiwa namüin saaʼu tia süka kamaneein maʼin nia.
25 Müsü niiʼiyatakai aaʼin Maleiwakai wanee wopu wamüin süpüla anajiraainjanain waya nümaa sünainjee kanoulain waya sünain naapajiraain nikii* Jesús waaʼu. Nülaʼajaain Maleiwa saainjala wayuu sümaiwa paala. Nnojoliikalaka süsalain naainjala na wayuu nülaʼajaakana aainjala.
26 Wayaawata aaʼu lotuin maʼin nukuwaʼipa chi Maleiwakai süka lotuin nukuwaʼipa wanee wayuu noʼuluʼu sünainjee kanoulain nia nünain Jesús.
27 ¿Eesüchejeʼe wanee kasa waʼwaataainjatka aluʼu? Nnojotsü eein wanee kasa waʼwaataainjatka aluʼu. ¿Aʼwaataainjanache neʼe waya sünainjee waaʼinrüin tü sümakat tü Pütchi Aapünakat nümüin Moisés? ¿Aashin süküjünüin wamüin suluʼu tia pütchikat kanoulainjanain waya?
28 Wayaawatüin sünainjee tia shiain lotuin anainjee nukuwaʼipa wanee wayuu kanoulale nia, nnojotsü sünainjeejatüin neʼe naaʼinrüin tü sümakat tü Pütchi Aapünakat nümüin Moisés.
29 Chi Maleiwakai nnojoishi Namaleiwasein neʼe na judíokana, ¿aashin Sümaleiwasein nia wayuu maʼleekalia?
30 Waneeshia neʼe chi Maleiwakai, nüküjain lotuin nukuwaʼipa wanee wayuu sünainjee kanoulain nia, jaʼitashi niain wanee wayuu oʼyoteʼerakai süta nükorolo jee niale wanee wayuu nnojoikai oʼyoteʼerüin süta nükorolo.
31 ¿Wamalajeʼerüinche tü sümakat tü Pütchi Aapünakat nümüin Moisés sünainjee neʼe kanoulainnapain waya? Nnojo, kojutusü wamüin tia pütchikat.
Noota
^ Pünaʼla tü pütchikat «Circuncisión» suluʼu tü kanüliakat «Jamaluʼulu pütchikat».
^ «Nüsha» maluʼulu tia suluʼu griego.
