EKIRAJAAYA 7
¿Paapüirü süchiki Nuluwataaya Maleiwa?
1. ¿Kasa wayuu tü Nuluwataayakat Maleiwa?
¿Jamüshi anaka maʼin Jesuu süpüla aluwatawaa? (MARCOS 1:40-42)
Shia wanee aluwataaya chasü sirumatuʼu, sajaʼttireerü naluwataaya na wayuukana otta saainjireerü tü nüchekakat Maleiwa yaa saaʼu tü Mmakat maʼaka saainjünüin chaa sirumatuʼu. Paaʼinweena na wayuukana saaʼu tü Mmakat sutuma Aluwataayakat tia. ¡Anakatche maʼin tia pütchikat! Püleeja Daniel 2:44; Mateo 6:9, 10, TNM otta 24:14.
Maʼaka niʼitaanüin wanee wayuu süpüla aluwatawaa, niʼitaain Jeʼwaa chi Nüchonkai süpüla Nuluwataain waaʼu. Püleeja Alateetkat Mapeena 11:15.
Pünaja tü videokot ¿Kasa wayu tü Nuluwataayakat Maleiwa?
2. ¿Jamüshi anaka maʼin Jesuu süpüla aluwatawaa?
Anashi maʼin Jesuu süpüla aluwatawaa süka anamiain nia otta lotuin sukuwaʼipa tü kasa naainjakat (Mateo 11:28-30). Nükaaliinjeena waya nuluwataapa saaʼu tü Mmakat. Oʼunüshi sirumatuʼumüin süsoʼiraapa naaʼin, naʼatapajaka nikialuʼu Maleiwa süpüla nuluwataain (Hebreokana 10:12, 13). Nuluwataaka Jesuu nutuma Maleiwa. Püleeja Mateo 28:18.
3. ¿Aluwataajeechi Jesuu namaa waneeinnua wayuu?
Saashin tü Wiwüliakat, eejeena waneeinnua wayuu aluwataaka nümaa Jesuu. Saashin tü karalouktakat Daniel 7:27, naya na wayuu wulekana akuwaʼipa. Na wulekana akuwaʼipa palajana nutuma Maleiwa, naya na nikirajüinkana Jesuu. Maaʼulu, ayatayüiya Jeʼwaa aneeküin wayuu tooloyuu otta jieyuu süpüla naʼakain naya na wulekana akuwaʼipa. Chainjana sirumatuʼu süsoʼiraapa naaʼin. Püleeja Juan 14:1-3 otta 1 Corinto 15:42-44, TNM.
¿Jeʼrashii naya? Süküjüin tü Wiwüliakat jeʼrashiin naya otta nanülia nutuma Jesuu, «palitchon anneerü» (Lucas 12:32, TNM). Aluwataainjana nümaa Jesuu 144.000 wayuu. Püleeja Alateetkat Mapeena 14:1.
4. ¿Kasa naainjaka Jesuu wanaa sümaa nuluwataain?
Aluwataashi Jesuu soʼu tü juyakat 1914. Tü naaʼinrakat palajana shia nujutüin Satanaa namaa na yolujaakana yaa saaʼumüin tü mmakat. * Sutuma jashichin maʼin chi Yolujaakai, aainjüshi maʼin kasa mojusü sainküin tü Mmakat (Alateetkat Mapeena 12:7-10, 12). Eʼrüsü maʼin müliaa wayuu soʼujeʼereʼeya tia. Tü kasa mojusü alatakat maaʼulu maʼaka saaʼin tü ayuuliikat, tü atkawaakat, tü jamükat otta sukutkujaain mma, shiiʼiyatüin nülüʼülüin Jesuu süpüla Aluwatawaa saaʼu Mmaka. Püleeja Lucas 21:7, 10, 11, 31.
5. ¿Kasa eeka maaʼulu sutuma Nuluwataaya Maleiwa? ¿Kaseerü eeka mapeena sutuma?
«Watta maʼi saalii» wayuu anoujaka sainküin tü Mmakat süka süküjünüin maʼin süchiki Nuluwataaya Maleiwa. Aluwataaichipa Jesuu naaʼu jee oʼttaweena naya sajaʼttapa tü kasa mojusükat sutuma Nuluwataaya Maleiwa. Jaa müinjana waya nümüin Jesuu aneere wakuwaʼipa. Püleeja Alateetkat Mapeena 7:9, 14, 16, 17.
Nikeraajeerü Maleiwa tü nüchekakat wapüleerua suʼunnaa tü miitkat juya. Paʼaraiiseerü tü Mmakat. Süchikijee, nüleʼejireerü Jesuu tü Aluwataayakat nümüin chi Nüshikai (1 Corinto 15:24-26, TNM). ¿Pücheküin püküjüin sümüin wayuu süchiki Nuluwataaya Maleiwa? Püleeja Salmo 37:10, 11, 29.
^ püt. 6 Süpüla pütüjüin sooʼomüin süchiki tü alatakat soʼu tü juyakat 1914, püleeja tü karalouktakat ¿Kasa shikirajaka maʼin tü Wiwüliakat? Süpana 215-218.
