SHIʼIPA 4
Jiisatta jünneetse
«Nüchiaanüle paala wanee wayuu, niʼitaain sukuwaʼipa tü naainjeekalü amüin.» (Proverbios 20:18, TNM)
Choʼujaasü nneerü wamüin wapüshuaʼa süpüla waapüin sümüin wapüshi tü choʼujaakat sümüin (Proverbios 30:8). Müsüleʼe tia süka eein «tü saaʼinmajakalü anain waya tü nneetkat» (Eclesiastés 7:12, TNM). Eesü kapüleere wamüin waashajaain süchiki maʼletsein wapüshi, nnojotpejeʼe wooʼulaainjatüin sumojujaain wakuwaʼipa sümaa waʼwayuuse sutuma (Éfeso 4:32). Piʼitaainjatü paaʼin sünain puʼwayuuse otta müinjatia shia sutuma jee jüneeküinjatü kasain jiyaʼlajaainjatüin süka jünneetse.
1 JAASHAJAAJIRAA SÜCHIKI TÜ JIYAʼLAJÜINJATKAT
TÜ SÜMAKAT TÜ WIWÜLIAKAT: «Acheküsü jülüjain paaʼin palajana sünain jerainjatüin sujuittakat aaʼu tü miichikat, suulia sajaʼlajaʼalaain pünneetse süpülapünaa kettaain shia» (Lucas 14:28). Choʼujaasü jaashajaajiraain palajana süchiki kasain jaainjüinjatüin süka jünneetse (Amós 3:3). Jiyaawatüinjatü saaʼu kasain jiyaʼlajüinjatüin otta jeʼrain tü nneerü jaapaainjatkat süpüla (Proverbios 31:16). Jaʼitashii kanneetsein jia süpüla jiyaʼlajüin wanee kasa, nnojotpejeʼe jimiʼijaainjatüin aka tü jünneetsekat. Anasü mojuyaarale jia, shia jaapaa tü nneerü jümaʼanakat (Proverbios 21:5; 22:7).
TÜ EEKAT SÜPÜLA PAAINJÜIN:
-
Süpütaale nneerü jüpüla sajaʼlajaayamüin tü kashikat, jüneeküinjatü kasain jaainjüinjatüin süka
-
Masetaainre shia, paliʼrüinjatü jutuma tü kasa jiyaʼlajakat. Eesüjaʼa süpüla jüʼlakajaain suulia jiyaʼlajaʼalüin eküülü jaʼyumusü
2 PÜKÜJA TÜ SHIIMAINKAT OTTA NNOJO PIMEEJIRAAIN PAAʼIN
TÜ SÜMAKAT TÜ WIWÜLIAKAT: «Loteesü watüma sukuaippa tü waaʼinrakat, [...] nuʼupala chi Maleiwakai, otta suʼupala tü wayuukolüirua süpüshua» (2 Corinto 8:21). Püküja sümüin puʼwayuuse jeʼrain nneerü pükanajaka otta jeʼrain tü piyaʼlajaakalü aka.
Paashajaa sümaa puʼwayuuse süpülapünaa paainjüin wanee kasa choʼujaaka apüla nneerü pümüin (Proverbios 13:10). Anajiraweechi pia sümaa puʼwayuuse paashajaale süchiki tia. Sünneetse puʼwayuuse wanaa pümaa tü nneerü pükanajakat, nnojotsü pünneetsein neʼe pümüiwaʼa (1 Timoteo 5:8).
TÜ EEKAT SÜPÜLA PAAINJÜIN:
-
Paashajaajiraa sümaa puʼwayuuse süchiki jeʼrainjatüin nneerü jaapaaka waneʼewai jukua sümaa nnojoluin jüsakirakuʼu jümüin süchiirua
-
Nnojoishi neʼe aashajaainjachin pia sümaa puʼwayuuse süchiki nneerü maʼletsepa jia
Eesüjaʼa kamalainjeerüle pümüin aashajeʼeraa tüü
SUSOUTAKA EʼIPAJEE TÜ BIBLIAKAT
¿Asetaajeetche wanneetse waaʼinrüle tü sümakat tü Bibliakat?
Nnojotsü talatüin naaʼin wanee wayuu sutuma wainmain nneerü nümaʼana. Eesü pienchisü kasa suluʼu tü Bibliakat paaʼinrajatka süpüla süsetaain pünneetse.
