Sainküin mmakat aisü maʼin walatshi sümaa jaʼin maʼin chi kaʼikai otta wanee saʼata tü mmakat alanaʼaleesia sünain alin maʼin jemiai otta shiʼitüin maʼin tü juyakat. Anuu waneirua kasa aküjünaka süchiki tia:

•   «Sünainjee noʼttuin na wayuukana sünain emeriija naʼayüla chi kaʼikai, naküjain süchiki sükooʼomüinraain tü walatshikat, alanaʼaleepejeʼe shia soʼu tü kashikat juunioʼu» (Oficina Nacional de Administración Oceánica y Atmosférica, Departamento de Comercio de Estados Unidos, juulioʼu 13, 2023).

•   «Aisü maʼin walatshi chaa Italia, España, Francia, Alemania otta Polonia. Meeria neʼe chaa islas de Sicilia otta Cerdeña alinjatü maʼin walatshi, eejeerü maʼaka 48 ºC [118 ºF] naaʼayula chi kaʼikai. Nnojotpuʼusü maajüin tia chaa Europa» (Agencia Espacial Europea, juulioʼu 13, 2023).

•   «Sutuma jaʼin maʼin chi kaʼikai, aʼiteerü maʼin tü juyakat otta kaʼülieerü maʼin shia. Wainma meeria tü mma süsetakalü aluʼu wüin» (Stefan Uhlenbrook, chi oʼunirakai sukuwaʼipa Sección de Hidrología, Recursos Hídricos otta Criosfera de la Organización Meteorológica Mundial, juulioʼu 17, 2023).

 ¿Shapaasüche paaʼin sutuma süküjünüin maʼin süchiki jaʼinjachin maʼin chi kaʼikai, alinjatüin maʼin jemiai otta shiʼitüinjatüin maʼin tü juyakat? Anuu tü sümakat tü Bibliakat süchiki tia.

 Ekeraajüsü shia. Sutuma alin maʼin walatshi, jaʼin maʼin chi kaʼikai otta shiʼitüin maʼin tü juyakat, ekeraajüsü tü sümatüjütkalia tü Bibliakat süchiki tü alatüinjatkat maaʼutpünaa. Nüküjain Jesús shiʼreerüin «wayuu kasa mmoleetka eema shia» (Lucas 21:11). Wainma na wayuu ayoʼujaakana aaʼin sutuma jaʼin maʼin chi kaʼikai otta sajaʼttinneerüin tü mmakat sutuma wayuu saaʼin namüin.

 Kepieerü wayuu suluʼu. Nukumajüin Maleiwa tü mmakat süpüla kepiain wayuu waneepia suluʼu, nnojoleerü nuuʼulaain najaʼttirüin shia na wayuukana (Salmo 115:16; Eclesiastés 1:4). Nüküjatüjülia najaʼttirüinjana «na wayuu amojujakana tü mmakat» (Apocalipsis 11:18).

 Süküjain tü Bibliakat naaʼinmajeerüin Maleiwa tü mmakat suulia sajaʼttinnüin.

•   «Niimaleʼereerü [Maleiwa] tü joutaikat; jimateerü nutuma tü sümünakat palaa» (Salmo 107:29). Pülashi maʼin chi Maleiwakai müsüjeseʼe eein süpüla niimaleʼerüin tü joutaikat, tü palaakat jee waneirua kasa. Eesü süpüla nunoutuin tü kasa mojukat sutuma jaʼin maʼin chi kaʼikai, sutuma tü juyakat jee tü müliakalü atuma saaʼin wayuu maaʼulu.

•   «Paaʼinmajüin tü mmakat süpüla piʼitaainjatüin wainma kasa saaʼu jee süpüla anashaatain maʼin shia putuma» (Salmo 65:9). Paʼaraiiseerü nutuma Maleiwa tü mmakat.

 Pütüjeere sooʼomüin süchiki tü sümakat tü Bibliakat süchiki tia, paashajeʼera tü pütchikat «¿Quién salvará el planeta?».