1. ¿Kasa jülüjaka paaʼin süchiki nukuwaʼipa Jehová?

 ¿EEIRIA jülüjain paaʼin jamüin nukuwaʼipa Jehová? ¿Kasa jülüjajaaka paaʼin puʼuraajapa nümüin? Mayaainjeʼe meʼrujuin nia, eesü süpüla wayaawatüin saaʼu nukuwaʼipa sünainjee tü sümakat tü Bibliakat. Saashin tü Bibliakat, müshi Jehová maʼaka saaʼin nuwarala chi Kaʼikai süka anain wakuwaʼipa nutuma otta naaʼinmajüin waya maʼaka saaʼin wanee escudo najapuluʼuka wanee surulaat. Akaʼaya «chi Wamaleiwasekai müshi aka saaʼin wanee siki ajaʼttiraleeka wanee kasa» (Sal. 84:11; Heb. 12:29). Niʼrüinka Ezequiel jorottuin maʼin Jehová maʼaka saaʼin tü ipa kanüliakat zafiro otta niʼrüin nüʼütpünaa wanee kasüpolüin (Ezeq. 1:26-28). Eesüjaʼa ponule waaʼin sünainjee tü aküjünakat nüchiki Jehová jee eesüjaʼa süpüla mmoluin waaʼin.

2. ¿Jamüsü kapüleeka namüin waneinnua wayuu aleewain naya nümaa Maleiwa?

² Eesüjaʼa kapüleere wamüin wayaawatüin saaʼu alin waya nüpüla Jehová süka nnojoluin weʼrüin nia jee shiale sutuma tü alatakat wamüin, maʼaka saaʼin maalinre waya napüla na kachooinkana waya. Niyaawatapejeʼe saaʼu Jehová jamüin waaʼin jee jamüin wakuwaʼipa sutuma tü alatakat wamüin. Süpüla wayaawatüin saaʼu alin maʼin waya nüpüla Jehová, nüküjain wamüin suluʼu tü Bibliakat süchiki tü nukuwaʼipakat.

3. ¿Jamüsü anaka maʼin wekirajaale nüchiki Jehová otta süchiki aipüralin maʼin nia?

³ Anasü maʼin nukuwaʼipa Jehová süka aipüralin nia (1 Juan 4:8). Sünainjee süpüshuaʼa tü naaʼinrakat Jehová wayaawata aaʼulu alin maʼin wayuu nüpüla, jaʼitainna na mojutukana atuma nia, aishiʼiya naya nüpüla (Mat. 5:44, 45). Sünain ekirajaayakat tüü, wekirajaajeerü süchiki nukuwaʼipa Jehová otta süchiki  aipüralin nia. Weʼraajüle maʼin nukuwaʼipa Jehová, aijeechi maʼin nia wapüla.

AISHAATASHII WAYA NÜPÜLA JEHOVÁ

4. ¿Jamüsü paaʼin sutuma pütüjaain saaʼu aipüralin Jehová? (Piirakaa sümüin tü ayaakuaakat).

⁴ Aisü maʼin wayuu nüpüla Jehová (Sant. 5:11). Aküjünüsü suluʼu tü Bibliakat müin nukuwaʼipa Jehová maʼaka saaʼin wanee wayuu aika maʼin apüla süchon (Is. 66:12, 13). Jülüja waaʼin sukuwaʼipa wanee wayuu aika maʼin apüla süchon, saaʼinmajüin, shiyuujain jee süsepajüin nia. Niʼyalajüle chi joʼuukai jee aire wanee kasa nünain, awataamaatüsü süpüla sümülialüin naaʼin. Müsia neʼe nukuwaʼipa Jehová, nümülialeerü waaʼin mojule waaʼin. Müsü nünüiki wanee salmista nüchiki Jehová: «Wanaa sümaa shapaain maʼin taaʼin sutuma tü alatakat tamüin, pümülialüin taaʼin jee pütütüleʼerüin taaʼin» (Sal. 94:19).

5. ¿Kasa naaʼinraka Jehová süpüla wayaawatüin saaʼu waneepiain tü waalinkat nüpüla?

⁵ Waneepiasü saalin wayuu nüpüla Jehová (Sal. 103:8). Mayaainjeʼe mojuwalin wanee kasa watuma, ayatüshii alin waya nüpüla. Kojuyatua mojuin naaʼin Jehová natuma na israelitakana. Müsü nünüiki Jehová namüin nayaawajaapa suulia naainjala: «Anasü maʼin pukuwaʼipa toʼuluʼu, kojutushi pia tamüin otta aishi maʼin pia tapüla» (Is. 43:4, 5). Müsia nukuwaʼipa Jehová wamaa, aishii waya nüpüla süka matüjain aʼwanajawaa tü nukuwaʼipakat. Wayaawajaale suulia waainjala jee wachuntamaatüle kaalinwaa nümüin, ayateenaʼaya alin waya nüpüla. Moteerü naaʼin tü waainjalakat (Is. 55:7). Motopa naaʼin Jehová tü waainjalakat müsü süsamalaajeetkai waaʼin nutuma (Aluw. 3:19).

6. ¿Kasa watüjaka sünainjee Zacarías 2:8 süchiki nukuwaʼipa Jehová?

⁶ (Paashajeʼera Zacarías 2:8). Müsü wakuwaʼipa nümüin Jehová maʼaka saaʼin tü noʼukot. Jamüsüjaʼa tü woʼukot, choʼujaasü wamüin jee nnojotsü jamajeein shia. Müshi nümakai aaʼin Jehová mayaa: «Saainjünüle kasa mojusü jümüin, müsü saainjünakai tamüin». Süka alin waya nüpüla Jehová, aisü nümüin tü wamülialakat otta nükaalinjeein waya. Müshiijeseʼe eein süpüla wamüin: «Paaʼinmaja taya maʼaka paaʼinmajüin tü poʼukot suulia jamajüin shia» (Sal. 17:8).

7. ¿Jamüsü wayaawatüinjatka saaʼu alin waya nüpüla Jehová?

 ⁷ Nücheka achiki Jehová piyaawatüin saaʼu alin pia nüpüla. Nütüjaa aaʼu kapüleein pümüin piyaawatüin saaʼu tia sutuma tü kasa alatakat pümüin maaʼutpünaa. ¿Kasa paaʼinrajatka süpüla piyaawatüin saaʼu alin pia nüpüla? Pikirajaa süchiki tü naaʼinrakat Jehová süpüla niiʼiyatüin naalin Jesús, na wawalayuu aneekuushikana otta müshiʼiya wayakana. Wekirajaa süchiki tia.

TÜ NAAʼINRAKAT JEHOVÁ SÜKA AIPÜRALIN NIA

8. ¿Jamüsü nütüjaaka maʼin saaʼu Jesús alin maʼin nia nüpüla chi Nüshikai?

⁸ Süka kakaliainnain kottiraain Jehová nümaa Jesús, aleewashii naya jee aijiraashii maʼin naya. «Talatüshi taya nümaa», nnojoishi müin neʼe Jehová nümüin Jesús, nüküjaleeinña suluʼu Mateo 17:5 alin maʼin Jesús nüpüla. «Anii chi Tachon aishikai tapüla», müshi Jehová süpüla sütüjaanüin aaʼu talatüin nia nümaa Jesús (Éf. 1:7). Wainmatua nüküjain Jesús alin maʼin nia nüpüla Jehová süka niyaawatüin saaʼu tü naalinkat nüpüla (Juan 3:35; 10:17; 17:24).

9. ¿Kasa makalü aka saaʼin sukuwaʼipa tü naalinkat na aneekuushikana nüpüla Jehová? (Roma 5:5).

⁹ Aishiʼiya nüpüla Jehová na anoujashii aneekuushikana saashin Roma 5:5 (paashajeʼera). Tü aküjüneekalü achiki sükajee tia wetsiikulokot suluʼu griego shia müleʼuin maʼin naalin na anoujashii aneekuushikana nüpüla Jehová, müsü aka saaʼin wanee wüin muloʼu sümaa katsüin maʼin shia. Nayaawata aaʼulu na aneekuushikana alin maʼin naya nüpüla Maleiwa (Jud. 1). Wanaawasü naaʼin nümaa Juan wanaa sümaa nümüin: «Aitaʼaleeshiijaʼa maʼin waya nüpüla chi Washikai Maleiwa, weʼraajünakalaka suluʼu nüchonniin waya» (1 Juan 3:1). Nnojoishii nayain neʼe alin nüpüla Jehová na aneekuushikana, aishiʼiya nüpüla Jehová napüshuaʼa na aʼyataakana nümüin. Anashii wekirajaale süchiki tia.

10. ¿Kasa naaʼinraka Jehová piyaawataka atuma alin maʼin pia nüpüla?

¹⁰ Watüjaa maʼin aaʼulu alin maʼin waya nüpüla Jehová sükajee naakajirüin waya (Juan 3:16; Roma 5:8). Naapüin Jehová nikii chi Nüchon aishikai nüpüla süpüla outuin nia saaʼu waainjala jee süpüla anajiraainjanain waya nümaa (1 Juan 4:10). Jülüjale maʼin waaʼin tü naaʼinrakat Jehová otta Jesús wapüleerua, wayaawateerü aaʼu alin maʼin waya napüla (Gal. 2:20). Nnojotsü neʼe naapüin Jehová nikii Jesús süpüla nikeraajüin wanee pütchi nüikaleʼeraka, naaʼinrüinña tia süka alin maʼin waya nüpüla. Nuuʼulaainjeseʼe müliain jee outuin chi Nüchonkai waaʼu.

11. ¿Kasa watüjaka sünainjee tü sümakat Jeremías 31:3?

¹¹ Maʼaka wekirajaainnapain, nüküjain wamüin Jehová alin maʼin waya nüpüla (paashajeʼera Jeremías 31:3). Müshiijeseʼe nürütkeʼerüin waya nünainmüin (anasü paashajeʼerüle Deuteronomio 7:7, 8). «Nnojotsü eein wanee kasa amalajeʼereetka waalin nüpüla Maleiwa» (Roma 8:38, 39). ¿Jamüsü paaʼin sutuma pütüjaain saaʼu tia? Anashii wekirajaale sünain tü sümakat Salmo 23. Sümaʼainruʼu waaʼinrüin tia, jülüja waaʼin jamüin naaʼin David sutuma alin nia nüpüla Jehová otta jameerüin paaʼin sutuma alin pia nüpüla Jehová.

¿JAMÜSÜ PAAʼIN SUTUMA PÜTÜJAAIN SAAʼU ALIN MAʼIN PIA NÜPÜLA JEHOVÁ?

12. ¿Jamüsü nünüiki David suluʼu Salmo 23 nüchiki Jehová?

¹² (Paashajeʼera Salmo 23:1-6). Suluʼu Salmo kapiitulo 23, nüküjain David alin maʼin nia nüpüla Jehová jee naaʼinmajüin nia. Nüküjainña aleewajiraain maʼin nia nümaa otta  niain chi Arüleejakai nia. Anasü naaʼin David sutuma niain Jehová oʼunirüin nukuwaʼipa otta sutuma niʼitaain maʼin naaʼin nünain. Nütüjaa aaʼu David aijeechin nia nüpüla Jehová waneepia. Wekirajaa süchiki jamüin nüküjaka David tia nüchiki Maleiwa.

13. ¿Jamüsü nütüjaaka saaʼu David naaʼinmajüin nia Jehová?

¹³ «Nnojoleerü kasain choʼujaain tamüin». Nütüjaa aaʼu David naaʼinmajüin nia Jehová saaʼujee naapüin tü kasa choʼujaakat nümüin. Nütüjaa aaʼulia David aleewain nia nümaa otta talatüin nia nümaa. Jaʼitairü kasain maʼin tü alatakat nümüin David, nütüjaa aaʼulia nükaalinjeechin nia Jehová sünain tü kasa choʼujaakat nümüin. Sutuma nütüjaain maʼin saaʼu David alin nia nüpüla Jehová jee naaʼinmajeechin nia, nnojotsü shapaain maʼin naaʼin jee talatüshi nia (Sal. 16:11).

14. ¿Kasa naaʼinraka Jehová wapüleerua süka alin waya nüpüla?

¹⁴ Naaʼinmajüin waya Jehová sülatapa kasa mojusü wamüin. Jülüjataa waaʼin tü alatakat sümüin Claire, a alatüirü suulia 20 juya shiʼyataain suluʼu Weteet. Mojusü saaʼin süka isain süchiki sükaalinjain na süpüshikana soʼunnaa neʼrüin müliaa. Amülasü isha nikiiruʼu chi süshikai, ojuʼitinnüsü naʼakajee na wawalayuukana tü shimiiruakat, amülouisü noulia tü naʼyataapuʼukalü anain sümaʼaleeya tü nepiakat. ¿Kasa naaʼinraka Jehová süpüla nükaalinjain na süpüshikana? Müsü sünüiki Claire: «Naapüin Jehová süpüshuaʼa tü choʼujaakat namüin kaʼiwai. Wainmaleʼeya tü kasa naapakat Jehová namüin. Jülüjasü taaʼin waneepia tü naaʼinrakat Jehová tapüleerua süka alin taya nüpüla. Sutuma jülüjain taaʼin tia,  sükatsüinrüin taaʼin süpüla talatüin süchikumüin wanee müliaa».

15. ¿Jamüsü sükatsüinraaka naaʼin David süchikuaʼa? (Piirakaa sümüin tü ayaakuaakat).

¹⁵ «Akatchinraasü taaʼin süchikuaʼa». Shapaasü maʼin naaʼin David sutuma niʼrüin müliaa (Sal. 18:4-6). Akatsüinraapejeʼe naaʼin David süka niyaawatüin saaʼu alin nia nüpüla Jehová. Müsü nünüiki David süka aleewain nia nümaa Jehová: «Nümaashi taya sünain eemerawaa eere wüittuulin alama otta nümaashi taya sünain eemerawaa eere jouluin wüin». Sutuma tia sükatsüinrüin naaʼin süpüla ayatüin niʼyataain nümüin Jehová sümaa talatüin naaʼin (Sal. 18:28-32).

16. ¿Kasa naaʼinraka Jehová süpüla nükatsüinrüin paaʼin?

¹⁶ Weʼrapa müliaa eeshii süpüla wamüin: «Süka miyoʼuin waalin nüpüla Jehová nnojoishii waya najaʼttirüin» (Lam. 3:22; Col. 1:11). Jülüjataa waaʼin tü alatakat sümüin Rachel. Mojushaatasü maʼin saaʼin soʼunnaa tü ayuuliikat COVID-19 süka nuuʼulaain shia chi suʼwayuusekai otta nuuʼulaain suulia anoujaa. ¿Kasa naaʼinraka Jehová süpüla nümülialüin saaʼin? Müsü sünüiki: «Teʼrüin alin taya nüpüla Jehová süka nükaalinjain taya nakajee na taʼaleewainkana. Alatitshii naya kaʼi tamaa, akolojushii naya tamüin, naluwataain mensaaje sümaa pütchi akatsüinraka taaʼin, naküjain pütchi tamüin suluʼujee tü Bibliakat amülialaka taaʼin, kamaneeshii naya tamüin otta naküjain tamüin naaʼinmajüin taya Jehová. Taapüin maʼin analuʼutka nümüin Jehová süka naʼakain taya wayuu aipüraliikana maʼin».

17. «Nnojoleerü kasain mmoluin eema taya süka eein pia tamaa», ¿jamüshi nümaka David?

¹⁷ «Nnojoleerü kasain mmoluin eema taya süka eein pia tamaa». Wainmatua najachijünüin David natuma na nüʼünüükana, anapejeʼe naaʼin süka nütüjaain saaʼu alin nia nüpüla Jehová jee naaʼinmajeechin nia. Jaʼitairü kasain alatüin nümüin, nütüjaa aaʼulu eejeechin Jehová nümaa waneepia. Müsüjeseʼe müin nünüiki suluʼu wanee jayeechi: «Wainma kasa mojusü nuʼtteʼeraka achikumüin taya» (Sal. 34:4). Sutuma nütüjaain saaʼu David alin maʼin nia nüpüla Jehová, nnojoishi nia eimmolojooin neema na nüʼünüükana.

18. Sülatüle wamüin wanee kasa mojuka maʼin, ¿jamüsü sükatsüinraka waaʼin watüjain saaʼu alin waya nüpüla Jehová?

¹⁸ Sülatüle kasa kapüleesü wamüin, ¿kasa  naaʼinraka Jehová wayaawataka atuma alin waya nüpüla? Jülüjataa waaʼin tü sümakat wanee wawala pürekutsoot kanüliaka Susi süchiki jamüin saaʼin nümaa chi suʼwayuusekai süchikijee nuʼunajiraain naaʼin chi nachonkai. Müsü sünüiki: «Sülatüle pümüin wanee kasa mojuka maʼin, mojusü paaʼin sutuma jee nnojotsü pütüjaain saaʼu jamüinjatüin pukuwaʼipa». Sutuma wayaawatüin saaʼu alin waya nüpüla Jehová, anasü waaʼin. Anuu sünüiki tü wawalakat Rachel, tü waküjayütkalü anülia suluʼu pütchi 16: «Soʼu wanee ai mojuka oʼu taaʼin sutuma shapaain taaʼin, oʼuraajüsü taya nümüin Jehová sümaa taʼyalajüin. Süchikijee toʼuraajüin nümüin jimatüsü taaʼin, nümülialüin taaʼin maʼaka sümülialüin wanee wayuu saaʼin süchonchon. Süchikijee tia atunkusü taya. Jülüjeerü taaʼin tia waneepia». Jülüjataa waaʼin tü alatakat nümüin wanee laülaashi, Tasos nünülia. Pienchi juya püreesain nia süka nnojolin surulaaleein nia, naaʼinmajüin nia Jehová naashin. Anuu nünüiki: «Naapüin Jehová süpüshuaʼaleeya tü choʼujaakat tamüin, akatsüinraasü taaʼin sutuma tia. Mayaainjeʼe saʼakain taya wayuu mojulaasü, talatüsü taaʼin süka nükaalinjain taya Jehová sükajee tü nüpülainkat. Teʼitaale maʼin taaʼin nünain Jehová, tayaawateerü maʼin aaʼu alin taya nüpüla. Müshijeseʼe taneeküin pürekutsoolin rekulaat taya soʼunnaa püreesain taya».

WAʼALEEWAJAA NÜMAA CHI WAMALEIWASE AIPÜRAIKAI

19. (1) ¿Jameerü wanüiki woʼuraajapa watüjaale saaʼu alin waya nüpüla Jehová? (2) ¿Jeʼtsü tü wetsiikulo atanatkat paaʼin aashajaaka süchiki aipüralin Jehová? (Paashajeʼera tü pütchikat « Wetsiikulo aashajaaka süchiki alin waya nüpüla Jehová»).

¹⁹ Sünainjee tü naaʼinrakat Jehová napüleerua na wawalayuukana, wayaawata aaʼulu niain «chi Maleiwa aikai apüla wayuu» (2 Cor. 13:11). Jülüjashii waya naaʼin waneʼewai wakua. Watüjaa maʼin aaʼulu naaʼinmajeenain waya waneepia süka müleʼuin waalin nüpüla (Sal. 32:10). Jülüjale waaʼin tia, weʼitaajeerü maʼin waaʼin nünain jee arütkaajeena waya nünainmüin. Müshijeseʼe eein süpüla wachuntuin nümüin ayatüinjanain alin waya nüpüla. Eesü süpüla waküjain nümüin tü shapaakalü atuma waaʼin. Watüjaa aaʼu niyaawatüin saaʼu jamüin waaʼin jee nükaalinjeein maʼin waya (Sal. 145:18, 19).

20. ¿Kasa paaʼinreetka piyaawatüle saaʼu alin pia nüpüla Jehová?

²⁰ Aire maʼin jemiai arütkaamaatüshii waya sünainmüin wanee sikoʼu süpüla waatulajüin. Akaataajaʼa süka alin waya nüpüla Jehová aleeweeshii maʼin waya nümaa. Talatüshii maʼin waya süka müleʼuin maʼin tü waalinkat nüpüla Jehová. Kasataalejeseʼe müin wanüiki wapüshuaʼa mayaa: «Aishi taya nüpüla Jehová» (Sal. 116:1).