Eejatü wanee wayuu Gail sünülia, shiajaʼa joo tü waashajaayütkalü achiki sünain ekirajaaya piama. Ayateechi sotuin saaʼin chi suʼwayuusekai saashin, niajaʼa saʼatapajaka chi kaʼi eere nüsoʼireʼenneechin aaʼin chi suʼwayuusekai Paʼaraiisüpa tü mmakat. Anuu sünüiki Gail: «Kamalainsü maʼin tamüin tü sümakat Alateetkat Mapeena 21:3, 4, müsü mayaa: ‹Eeinjachi nia namaa waneepia süka niain Namaleiwasein. Nümülialeena naya. Müiria nnojolüin ouktaa, mojuu aaʼin, aʼyalajaa, je saalii ayuulii, süka sülatüitpain süpüshuaʼale makat aka tia›».

«Taashajeʼerapa tia pütchikat sümüin wayuu, nayaawatamaata aaʼu shia. Amülialaasü taaʼin naalin na wayuu ouktakana apüshi, na nnojoliikana atüjaain saaʼu süsoʼiraainjatüin saaʼin wayuu ouktüsü», müsü Gail. Ojuʼitüsü shia sünain aküjaa tia pütchikat namüin na wayuukana. Shiiʼiyatüin sükajee tia sünain sunoujain süsoʼiraainjatüin naaʼin na ouktüshiikana.

Eejachinkajaʼa wanee wayuu Job nünülia, mayeinshaatashi maʼin wayuukai chia (Job 2:7). Mayaapejeʼe oukteein nia, niʼitaain naaʼin sünain nüsoʼireʼenneechin aaʼin nutuma Maleiwa müleka ouktüle nia. Anuu nünüiki Job süchiki tia: «Kasataalejeseʼe puunjulüin taya suluʼu tü Seolkat. [...] Puunejeechi taya otta asoukteechi taya. Keeʼireesü maʼin paaʼin paainjain shia süka pukumajalain taya» (Job 14:13, 15, TNM). Niʼitaashaatain naaʼin Job sünain nüsoʼireʼenneechin aaʼin nutuma Maleiwa.

Shiimainshaata sünain nüsoʼireʼereerüin naaʼin Maleiwa Job, asoʼireʼenneerü naaʼin na anaajaainnakana. Ana ana meerü tü mmapaʼakat mapa (Lucas 23:42, 43, TNM). Saashin tü Wiwüliakat, asoʼiraainjatü naaʼin na ouktüshiikana (Aluwataaushikana 24:15). «Nnojo jainkuuin aaʼin sütüma tü taküjainjatkat jooluʼu jümüin: Soʼuweena wane kaʼi, saapeerü tanüiki süpüshua tü wayuu ouktüsükalüirua sümaa sujuitteerüin mmaapüjee», müshi Jesuu (Juan 5:28, 29). Eejeechi Job soʼu kaʼikat tia, jimaʼaijeechi nia nüchikuaʼa (Job 33:24, 25). Na wayuu eʼitaakana naaʼin sünain shikeraajeerüin tü pütchi nüpansaajakat Maleiwa nayeena eʼrakana tia.

Mayaapejeʼe paashajeʼerüin tü pütchi aashajaakat nachiki na wayuu anaajaainnakana, shiimain sünain nnojoleerüin süsünneʼerüin suluʼujee paaʼin tü mojaakalü aaʼin. Atütülaajeetpajaʼa paaʼin müleka paashajeʼerüle suluʼu paaʼin tü kasa anasü neʼreetkat nachikuaʼa na wayuu ouktüinnakana (1 Tesalónica 4:13).

Süpüla sütütülaainjatüin paaʼin, eesü wanee kasa anaka süpüla pikirajaain anain, ¿jamüsüche nuuʼulaaka Maleiwa mojulaainjatüin wayuu jee müliainjatüin shia? Süpüla pütüjaain saaʼu tia, piʼrajaa suluʼu Internet jw.org. Yala, pünteerü anain pütchi anasü suluʼujeejatka tü Wiwüliakat.