Tia, sünüiki wanee jintut asülajünaka amüin wanee etchon. 13 suuyase tia jintutkat. Jee müsia saashin wanee wayuu anaka maʼin aʼyataain suluʼu wanee konpainyiia, anoutaʼaleesia sukuwaʼipa majayülüiwaʼaya shia sutuma tü computador nüsülajakat chi süshikai sümüin. Naashin wanee wayuu kaʼwayuuseshi, nnojotsü eein wanee asülajuushi anaka maʼin suulialeʼeya tü karaloutachon süshajakat tü nuʼwayuusekat nümüin soʼu nekeraajüin wanee juya sünain kasaalüin naya.

Juyawai wainma wayuu alatiraka kaʼi otta akataajaka nneerü sünain ayaʼlajaa wanee kasa nasülajüinjatka nümüin wanee napüshi jee niale wanee naʼaleewain. Otta shia keeʼireeka naaʼin müinjatüin sünüiki wayuu maʼaka sünüiki tü jintut waküjayütpakalü achiki. ¿Jama piakai? ¿Asülajeeshi pia wanee kasa talateetka atuma saaʼin wayuu? ¿Shiataapa keeʼireein paaʼin püsülajünüin amüin?

Eesüjaʼa keeʼireere paaʼin tia süka pütüjaain saaʼu jamüin naaʼin wanee wayuu süsülajünüle wanee kasa nümüin otta pütüja aaʼu jamüin naaʼin chi asülajakai. Anuu sünüiki tü Wiwüliakat: «Anakuaippaʼireʼeya chi wayuu aapakai nuulia chi aapünakai amüin» (Aluwataaushikana [Hechos] 20:35). Talataleepajaʼa maʼin waaʼin talatüle chi wasülajakai amüin.

¿Kasa paaʼinrajatka süpüla talatüin paaʼin sünain asülajaa otta süpüla talatüin naaʼin chi wayuu püsülajakai amüin? Isale püchiki anashaatain maʼin tü püsülainkat, ¿kasa paaʼinrajatka süpüla kojutuin shia nümüin chi püsülajakai amüin?