¿Kasa paaʼinrajatka süpüla kamalain pümüin aashajeʼeraa tü Wiwüliakat jee anain pukuwaʼipa sutuma? Anuu jaʼraisü kasa naaʼinraka wainma wayuu süpüla nountüin tia.

Püchajaa eere anain aashajeʼeraa. Paashajeʼera eere yüütüülin. Püchajaa sukuwaʼipa süpüla nnojoluin eein wanee kasa ekeʼejaka paaʼin. Nnojoluinjatü kojoin piyuushi paashajeʼerapa jee nnojoluinjatü alin walatshi.

Nnojo püsürülüin pikii. Tü Wiwüliakat, nümaʼanajeejatü shia chi Washi iipünaajachikai. Aneerü maʼin pukuwaʼipa sutuma müleka paashajeʼerüle shia maʼaka naaʼin wanee jintüi aashajeʼeraka wanee karaloukta nuluwataaka chi nüshikai nümüin. Püsünneʼera suluʼujee pikii wanee alawaa aküjünaka süchiki tü Wiwüliakat jee puuʼulaa nikirajai pia Jeʼwaa (Salmo 25:4).

Puʼuraaja süpülapünaa aashajeʼeraa. Tü pütchi suluʼukat tü Wiwüliakat shia tü nünüikikat Maleiwa, müsüjeseʼe choʼujaain nükaaliinjain pia süpüla piyaawatüin saaʼu. Naashin Maleiwa, naapeechi chi naaʼinkai nümüin chi eekai nuchuntüin shia nümüin (Lucas 11:13). Nükaaliinjeechi pia chi naaʼinkai Maleiwa süpüla piyaawatüin saaʼu tü jülüjakat naaʼin Maleiwa. Mapa, pütüjaajeerü aaʼu «süpüshua tü kasa jülüjakat naaʼin» (1 Corinto 2:10).

Piyaawata saaʼu tü paashajeʼerakat. Jülüjeesü paaʼin tü paashajeʼerakat. Püsakireʼera paaʼin: «¿Jarat tü nukuwaʼipakat chi wayuu taashajeʼerakai achiki? ¿Kasa taaʼinrajatka süpüla teʼitaain suluʼu takuwaʼipa tü taashajeʼerakat?».

Piʼitaa püpüleerua tü pikirajaainjatkalü anain. Süpüla kamalain pümüin aashajeʼeraa tü Wiwüliakat, pikirajaa sünain wanee pütchi jalouijeetka pümüin. Eeshi süpüla pikirajaain maʼin nüchiki Maleiwa, pikirajaain sünain tü paaʼinrajatkat süpüla wayuuinjachin anamia pia, süpüla anajiraain pia sümaa puʼwayuuse jee sünain waneeirua kasa. Püneeka jaralüin tü pütchi suluʼujeejatkat tü Wiwüliakat akaaliinjeechika pia. *

Tü jaʼraisü pütchi wekirajaaitpakalü anain, sükaaliinjeechi pia süpüla puʼttüin sünain aashajeʼeraa tü Wiwüliakat. ¿Kasaka paaʼinrüinjatüin süpüla kamalainreein pümüin aashajeʼeraa shia? Aküjünüsü tia suluʼu tü wanee ekirajaayakat.