Neʼrüin alin naya napüla na wawalayuukana
YOMARA, Marcelo nümaa Hiver moʼusalii naya otta pawalaawashii naya. Kepiashii naya suluʼu wanee pueulo chaa Guatemala. Oʼttusü Yomara sünain ekirajawaa sünain tü Bibliakat namaa na Aküjaliikana pütchi otta mapa ekirajaashii na suwalayuukana. Eepejeʼe wanee kasa kapüleeka namüin, isasü nachiki aashajeʼeraa süka braille. Chi ekirajakai naya, naashajeʼerüinjatü tü pütchikat namüin otta tü wetsiikulo suluʼujeejatkat tü Bibliakat.
Kapüleesü namüin oʼunaa sünain tü outkajawaakat. Eetaasü maʼaka 40 minuuto wopuluʼuin naya süpüla nantüin suluʼumüin tü Piichi Outkajaaleekat. Nnojoliipejeʼe süpüla noʼunuin namüiwaʼa. Müshiijeseʼe pachikuatüin na wawalayuukana süpüla namaain naya. Wanaa sümaa noʼttuin sünain ekirajaa sünain tü outkajawaakat Wakuwaʼipa otta Waʼyataain nümüin Maleiwa, akaalinjünüshii naya natuma na wawalayuukana süpüla natüjain süpüleerua tü nanüikinjatkat.
Maayoʼu soʼu 2019, oʼttushii na Aküjaliikana pütchi sünain aainjaa tü outkajawaakat suluʼu tü pueulo kepiakalü aluʼu naya. Akolojooshi chamüin wanee wawala sümaa nuʼwayuuse, pürekutsoot rekulaat naya. Mayaainjeʼe matüjain naya wawalayuukana braille, ayatüshii nekirajüin naya apünüinruʼu sünain aashajeʼeraa otta ashajaa süka braille. Oʼunushi chi wawalakai sümaa nuʼwayuuse suluʼumüin wanee biblioteca süpüla natüjain süpüleerua braille otta tü sukuwaʼipainjatkat shikirajia natuma.
Marcelo asoutushi sünain tü outkajawaakat shiʼipajee tü asakinnakalü anain.
Maʼaka jeʼra kashi, Yomara, Marcelo otta Hiver atüjashii maʼin naya aashajeʼeraa braille. Sutuma tia akatchinraasü maʼin tü nanoulakat. a Pürekutsootshii rekulaat naya otta Marcelo neʼipajanashi nia na laülaashiikana. Wainma kaʼi nalatiraka semaanawai sünain aʼyatawaa nümüin Jehová. Süka neʼrüin na wawalayuukana talatüin naaʼin, meesü nakuwaʼipa maʼaka naaʼin.
Talatüshii maʼin naya apünüinruʼu saaʼujee tü naaʼinrakat na wawalayuukana napüleerua otta süka neʼrüin alin naya napüla. «Soʼujee tü kaʼi weʼraajakalü oʼu na wawalayuukana, weʼrüin shiimain alin waya napüla», müsü sünüiki Yomara. Anuu nünüiki Marcelo: «Aleewashii maʼin waya namaa na wawalayuu woutkajaakana amaa otta naʼakashii waya na wawalayuu eekana sainküin mmakat paaʼinwaka maʼin sükajee aijiraain naya». Yomara otta müshiʼiya na suwalayuukana, neʼree amüinrü maʼin tü kaʼi paʼaraiisüinjatkalü oʼu tü Mmakat nutuma Maleiwa (Sal. 37:10, 11; Is. 35:5).
a Tü poyeetokot Aprenda a leer braille akumajünüsü shia napüla na moʼusaliikana otta na moʼupaʼakana süpüla natüjain aashajeʼeraa otta nashajüin süka braille.
Eesüjaʼa kamalainjeerüle pümüin aashajeʼeraa tüü
¿JAMÜSÜ SUKUWAʼIPA ATUMAWAA TÜ NNEERÜ ASÜLAJÜNAKAT?
Karaloʼutairua talataka atuma naaʼin na moʼusaliikana
Nnojotsü wakumajüin neʼe karaloʼuta suluʼu braille, wekirajüin na moʼusaliikana süpüla naashajeʼerüinjatüin shia.
