1, 2. ¿Kasa waaʼinrajatka süpüla anain waya noʼuluʼu Maleiwa?

WAINMA wayuu jülüjaka aaʼin nakuwaʼipa shiiʼiree anain shia noʼuluʼu na waneeinnua. Akanasaʼa wayakana anoujüshiikana, shia jülüjüinjatka maʼin waaʼin tü wakuwaʼipakat noʼuluʼu Jeʼwaa. Süka jamüin, nia neʼe Jeʼwaa Aluwataakai saaʼu kasaka süpüshuaʼa otta «nia aapakaʼaya wamüin kataa oʼu» (Aluw. 17:25).

² Naashin chi aluwataaushikai Pedro, keeʼireesü naaʼin Jeʼwaa wuleinjatüin watuma tü wakuwaʼipakat otta waaʼinrüinjatüin tü kasa talatakalü atuma naaʼin (paashajeʼera 2 Pedro 3:11 *). Süpüla anainjanain waya noʼuluʼu Maleiwa wuleinjatü tü wakuwaʼipakat, jülüjüinjatü waaʼin tü kasa wulesükat otta wuleinjatü tü wanoulakat. Waaʼinrüinjatü tü kasa talatakalü atuma naaʼin Maleiwa süka kojutüin nia wamüin otta alin nia wapüla. Süpüla anain waya noʼuluʼu Maleiwa, nnojotsü waaʼinrüinjatüin neʼe tü kasa anasükat, wuleinjatü watuma tü wakuwaʼipakat. Soteesü waaʼin nütüjaain saaʼu Jeʼwaa tü suluʼukat waaʼin, nütüjaa aaʼu müleka wulere wakuwaʼipa jee waʼyataale nümüin süka süpüshuaʼa waaʼin (1 Crón. 29:17).

3. ¿Jarat tü pütchi jülüjüinjatkat waaʼin?

³ Nnojotsü nücheküin Chi Yolujaakai waaʼinrüinjatüin tü kasa nüchekakat Jeʼwaa. Wainma tü kasa niʼitaakat wapüleerua süpüla numojujüin wakuwaʼipa nümaa Jeʼwaa. Aküjüshi nia naʼalain otta niʼikeʼereein waya. Keeʼireesü naaʼin nimeʼejüin waaʼin otta nükayaleʼerüin waya nuulia Maleiwa (Juan 8:44; 2 Cor. 11:13-15). Jülüja waaʼin pütchikat tüü: «Kasache niʼitaaka Satanaa wapüleerua süpüla niʼikeʼerüin waya? ¿Kasa waaʼinrajatka süpüla ayatüinjachin waʼaleewain Jeʼwaa?».

4. ¿Jalasü niʼitaain Satanaa tü kasa mojusü keeʼireekat waaʼin? ¿Jamüsü niʼitaaka shia yala?

⁴ Müshi Santiago, chi nikirajüinkai Jesuu: «Kaainjaleeshi [wanee wayuu] süka noonooin sümaa tü kasa mojusü keeʼireekat naaʼin. Müleka naaʼinrüle tü mojusükat keeʼireekat naaʼin, kaainjalaa tia. Je müleka nnojoire nuuʼulaain suulia kaainjalaa, oukteechi nia» (Sant. 1:14, 15). Süpüla numojujüin wakuwaʼipa nümaa Maleiwa niʼitaain suluʼu waaʼin tü kasa mojusü keeʼireekat waaʼin.

5, 6. (1) ¿Kasa niʼitaaka Satanaa suluʼu waaʼin? (2) ¿Kasa numojujeʼeraka aka Satanaa naaʼin na wayuukana? ¿Jaralii na nuuʼulakakana aaʼin?

⁵ ¿Kasa niʼitaaka Satanaa suluʼu waaʼin? Müsü tü Wiwüliakat: «Tü wayuu manoujainsatkalüirua suluʼu mmakat süpüshua, nia aluwataaka saaʼu chi Yolujaakai» (1 Juan 5:19). Süka niain aluwataain, niʼitaain suluʼu waaʼin «tü kasa mojusü naaʼinrakat na manoujainsaliikana» (paashajeʼera 1 Juan 2:15, 16). Kakaliaichi maʼin nia sünain akumajaa sukuwaʼipa tü kasa nimeejakalü aka wayuu. Waaʼinmajüinjatü wakuwaʼipa suulia tia (Juan 17:15).

⁶ Süpüla numojujeʼerüin Satanaa naaʼin na wayuukana, wainma tü kasa keeʼireekat naaʼin nutuma. Müshi chi aluwataaushikai Juan: 1) «Keeʼireesü naaʼin kaainjalaa», 2) suchuntüin naaʼin tü neirakaakat amüin otta 3) «aʼwaatawaa suluʼu nawashirüin ooʼulaka suluʼu tü naaʼinrakat». Süka tia apünüinsükat kasa ooʼulakünüsü naaʼin Jesuu nutuma Satanaa chayaa anoouishii. Süka kiʼraichin nia sünain aaʼinraa tia, atüjüshi maʼin nia maaʼulu süpüleerua ooʼulakaa saaʼin wayuu. Süka nütüjaain maʼin saaʼu tü kasa jookalü apüla waya waneʼewai wakua, niʼitaain shia wapüleerua. Süpülapünaa wekirajaain sünain tü waaʼinrajatkat süpüla wayouktüin tü niʼitaakat wapüleerua, wekirajaa sünain tü naaʼinrakat sümüin Eva otta tü naaʼinrakat nümüin Jesuu. Otta wekirajaweerü anain tü saainjakat Eva otta tü naainjakat Jesuu shiʼipajee tia.

7. ¿Kasa naaʼinraka Satanaa süpüla niʼitaain suluʼu saaʼin Eva keeʼireeinjatüin saaʼin kaainjalaa?

⁷ Choʼujaasü namüin napüshuaʼa na wayuukana neküinjanain. Makalaka nukumajüin Jeʼwaa tü Mmakat sümaa anain maʼin shia süpüla wainmainjatüin eküülü suluʼu. Akaisaʼa Satanaa nütüjaa aaʼu choʼujaain wamüin weküinjanain otta eeshii süpüla nükayaleʼerüin waya nuulia Jeʼwaa sükajee tia. Wekirajaa süchiki tü naaʼinrakat sümüin Eva (paashajeʼera Génesis 3:1-6). Nüküjüin sümüin nnojoluinjatüin ouktüin shia müleka shiküle süchon «tü wunuʼu atüjaakat atüma wayuu saaʼu tü anasükat je saaʼu tü mojusükat» (Gén. 2:9). Müinjatü shia maʼaka naaʼin Maleiwa sünain shiyaawatüin saaʼu tü anasükat jee tü mojusükat. Müshi nia sümüin nnojoluin choʼujaain soonooin sümaa nünüiki Maleiwa süpüla katüinjatüin soʼu. ¡Alawaa neʼe tia nümakat! ¿Kasakaʼa saaʼinrüin Eva shiʼipajee tia? Eesü piamasü kasa eeka süpüla saaʼinrüin: shiyouktüin tü nümakat jee shiale jülüjüin saaʼin  shikeein amüin süchon tü wunuʼukat. Mayaapejeʼe wainmain süchon wunuʼu eejatka suluʼu tü apainkat, jülüjüsü maʼin saaʼin Eva tü nümakat chi Yolujaakai sümüin. ¿Kasa saaʼinraka Eva sutuma tia? Süsüʼütüin süchon tü wunuʼukat jee shikaka shia. Alatüsü tia sutuma niʼitaain Satanaa suluʼu saaʼin Eva keeʼireeinjatüin saaʼin wanee kasa nüpülajaka Maleiwa suulia.

8. ¿Kasa naaʼinraka Satanaa süpüla nuuʼulaküin naaʼin Jesuu süka ouktüin nia jamü? ¿Jamüsü nnojotka naainjüin Jesuu tia?

⁸ Müsia neʼe tü naaʼinrakat Satanaa nüka Jesuu, chi Nüchonkai Maleiwa. Wanaa sümaa naamajüin chaa anoouishii soʼu pienchi shikii kaʼi otta pienchi shikii ai, ooʼulakünüsü naaʼin nutuma chi Yolujaakai süka ouktüin nia jamü. Müshi nia nümüin: «Müleka nüchonle pia Maleiwa, puluwataa türa ipakat shiiʼiranajaaiwa pan» (Luc. 4:1-3). Eesü piamasü kasa eeka süpüla naaʼinrüin Jesuu: naainjüin wanee kasa pülasü süpüla eejaain pan nutuma jee nnojorüle naainjüin shia. Nütüjaa aaʼu Jesuu nnojoluinjatüin jülüjüin neʼe naaʼin tü keeʼireekat naaʼin nümüiwaʼa, shiainjatü jülüjaka naaʼin palajana tü nukuwaʼipakat nümaa Jeʼwaa. Makalaka nümüin niʼipajee: «Nnojo. Ashajünüsü paala wane pütchi suluʼu tü karaloukta nüchikimaajatkat Maleiwa, müsü yaa: ‹Nnojotsü shiain sümüiwa tü pankat katüin atüma soʼu wayuu, kateerü oʼu shiaya sütüma süpüshua tü nümakat chi Maleiwakai›» (Luc. 4:4).

9. ¿Jamaluʼulu tü pütchikat: suchuntüin naaʼin tü neirakaakat amüin? ¿Kasa naainjaka Satanaa süpüla suchuntüinjatüin saaʼin Eva tü shiirakaakalü amüin?

⁹ Nüküjüin chi aluwataaushikai Juan wanee kasa niʼitaaka Satanaa napüleerua na wayuukana: suchuntüin naaʼin tü neirakaakat amüin. ¿Jamaluʼulu tia? Weirakaale neʼe sümüin wanee kasa, eesü süpüla keeʼireein waaʼin shia. Alatüsü tia sümüin Eva wanaa sümaa nümüin Satanaa sümüin: «Meena aka jia Maleiwakai sünain jiyaawatüin saaʼu tü anasükat je tü mojusükat». Süka sünanajaa sümüin Eva süchon tü wunuʼukat, shikee maʼin amüinrü otta anasü maʼin shiyolojo suʼupaʼaluʼu.

10. ¿Kasa naainjaka Satanaa süpüla suchuntüinjatüin naaʼin Jesuu tü niirakaakalü amüin? ¿Jamüsü nünüiki Jesuu nümüin Satanaa?

¹⁰ ¿Kasa naainjaka Satanaa süpüla suchuntüinjatüin naaʼin Jesuu tü niirakaakalü amüin? «Niiʼiyatüin nümüin tü suumainkalüirua wayuu süpüshuaʼale wwatuoʼushi, sünain nümüin nümüin: ‹Tü mmakat süpüshua, aapünüsü tamüin süpüla tasülajüinjatüin shia nümüin chi wayuu eekai tacheküin süpüleerua›.» (Luc. 4:5, 6.) Nuʼupaʼaluʼusü neʼe Jesuu nutuma Satanaa tü suumainkalüirua wayuu shiiʼiree suchuntüinjatüin naaʼin tü niirakaakalü amüin. Müshi nia nümüin: «Müleka püsapainyoʼukale pia yaa tamülatuʼu sünain puʼwaajüin taya, taapeerü pümüin» (Luc. 4:7). Nnojotpejeʼe naaʼinreein Jesuu tü nümakat Satanaa. Makalaka nümüin: «Ashajünüsü paala: ‹Nia juʼwaajüinjachika, chi jümaleiwasekai nümüiwa, nia jiʼyataainjachika amüin nümüiwa›» (Luc. 4:8).

11. ¿Kasa naainjaka Satanaa süpüla niʼikeʼerüin Eva?

¹¹ Wanee kasa naaʼinraka maʼin na manoujüinsaliikana naashin Juan shia «aʼwaatawaa suluʼu nawashirüin ooʼulaka suluʼu tü naaʼinrakat». Niaiwaʼaya eein Adán sümaa Eva saaʼu tü mmakat, nnojotsü jaralüin naʼwaataain oʼupala suluʼu tü kasa namaʼanakat. Akatsaʼa naaʼinrüin wanee kasa, ¿jarat shia? Yaletayaasü naaʼin. Wanaa sümaa suuʼulakünüin saaʼin Eva nutuma Satanaa, nüküjüin sümüin naʼalijirüin Jeʼwaa kasa anasü suulia. Shikapa süchon «tü wunuʼu atüjaweetkat atüma wayuu saaʼu tü anasükat je saaʼu tü mojusükat», müshi Satanaa sümüin: «Meena aka jia Maleiwakai sünain jiyaawatüin saaʼu tü anasükat je tü mojusükat» (Gén. 2:17; 3:5). Sükajee tia nüküjüin sümüin eein süpüla sükayalaain nuulia Jeʼwaa. Sutuma yaletayaain saaʼin sunoujüin naʼalain Satanaa. Nnojoluinjatiaa ouktüin shia saaʼinruʼu, shikaka süchon tü wunuʼukat. ¡Malakatche maʼin sunoujaka naʼalain chi Yolujaakai!

12. ¿Kasa naainjaka Satanaa süpüla nuuʼulaküin naaʼin Jesuu? ¿Jamüsü nünüiki Jesuu nümüin Satanaa?

¹² ¡Anasü maʼin süpüla washatüin nukuwaʼipa Jesuu süka nnojoluin yaletayaain naaʼin! Ooʼulaküna aaʼinchi Jesuu nüchikuaʼa nutuma Satanaa shiiʼiree naainjüin wanee kasa ponoko maʼin saaʼin wayuu otta shiiʼiree nuuʼulaküin naaʼin Jeʼwaa. Nütüjaa aaʼu Jesuu yaletayaajeerüin naaʼin naainjüle tia. Makalaka nümüin: «Müsü tü ashajuushikat: ‹Nnojo juuʼulaküin naaʼin chi Jümaleiwasekai›» (paashajeʼera Lucas 4:9-12).

13, 14. ¿Kasa nimeejaka aka waya Satanaa maaʼulu yaa?

¹³ Akaʼaya maaʼulu, nimeejüin waya Satanaa süka tü kasa nimeejakalü aka Eva otta tü kasa nimeejeekalü aka Jesuu. Nimeejeein na wayuukana sükajee tü kasa keejiakat namüin süpüla naaʼinrüinjatüin kasa yarüttüsü, kasain naleʼe otta nasüliin. Süpüla suchuntajatüin naaʼin tü neirakaakalü amüin, niʼitaain suluʼu naaʼin nanajeein suluʼu Internet shiyaakua wayuu masheʼinsat jee amaʼüjiraasü sukuwaʼipa, yaaʼaleeka chi wayuu eekai nnojolin eejüin naaʼin, nnojoleechi isain nuulia. Niʼitaain suluʼu naaʼin na wayuukana kojuteein naya, naluwataweein jee washireein naaʼin. Naaʼinrüin tia süpüla yaletüinjatüin naaʼin na wayuukana otta süpüla naʼwaataainjanain suluʼu tü kasa namaʼanakat.

¹⁴ «Tü kasa mojusü naaʼinrakat na manoujainsaliikana», müsü aka saaʼin shimeeya tü jimekat. Awataasü sooʼomüin süka anain maʼin soʼuluʼu. Nnojotpejeʼe sütüjaain aaʼu kachetüin shia sünain wanee kulira. Nimeejüin Satanaa na  wayuukana sükajee tü kasa choʼujaakat namüin süpüla naainjirüin naya tü kasa nüpülajakat Maleiwa. Nnojotsü jaʼyain maʼin nutuma otta müsü anakai saaʼin wamüin shiiʼiree waainjüin kasa mojusü otta sumojujeʼerüin waaʼin. Keeʼireesü naaʼin chi Yolujaakai waaʼinmaainjatüin tü kasa choʼujaakat wamüin suulialeʼeya kacheʼein waya nümüin Jeʼwaa. ¿Nimeejeeiche pia chi Yolujaakai?

15. ¿Kasa waaʼinrajatka süpüla wachecherüin waaʼin maʼaka naaʼin Jesuu?

¹⁵ Emeejünüsü Eva nutuma chi Yolujaakai. Akaisaʼa Jesuu nüchecherüin naaʼin nuulia. Müshi Jesuu kojuyatua: «Ashajünüsü paala», «müsü tü ashajuushikat». Wekirajaale maʼin sünain tü Wiwüliakat otta wayaawatüle saaʼu tü sümakat, soteerü waaʼin tü wersiikulo akaaliinjeenakat waya süpüla wachecherüin waaʼin suulia tü kasa ooʼulakünakalü aka waaʼin (Sal. 1:1, 2). Jülüjüle waaʼin tü naainjakat na anoujüshii oonookana waneepia sümaa nünüiki Jeʼwaa, washateerü tü nakuwaʼipakat (Roma 15:4). Kojutüle wamüin Jeʼwaa, anale wamüin tü anakat nümüin otta walerajüle tü kasa nülerajakat, wachechereerü waaʼin nuulia Satanaa (Sal. 97:10).

16, 17. ¿Jamüsü sünainpünaaka wakuwaʼipa tü jülüjakat waaʼin?

¹⁶ Naashin chi aluwataaushikai Pablo atüjüinjana waya süpüleerua ayaawataa saaʼu wanee kasa. ¿Kasa apüla? Süpüla jüüjüüinjanain waya sümüin tü nümakat Maleiwa suulia tü namakat na manoujüinsaliikana (Roma 12:1, 2, TNM). Nüküjüin choʼujaain maʼin anainjatüin tü jülüjakat waaʼin, müshi nia: «Wajaʼttirüin tü ekirajünakalü anain otta waneeirua kasa nnojotka wanaawain sümaa tü ekirajünakat nüchiki Maleiwa, otta wanoukteʼerüin tü jülüjakat saaʼin wayuu süpüla jüüjüüin nümüin Cristo» (2 Cor. 10:5, TNM). Tü jülüjakat waaʼin sünainpünaasü tü wakuwaʼipakat; makalaka shiainjatüin jülüjüin waaʼin kasa eekai anain (Filip. 4:8).

¹⁷ Wuleere wakuwaʼipa, nnojoluinjatü jülüjüin waaʼin otta keeʼireein waaʼin kasa eekai mojuin. Keeʼireesü naaʼin Jeʼwaa alin nia wapüla sümaa wulein waaʼin (1 Tim. 1:5). Soteesü waaʼin eʼrülüin wayumüin tü waaʼinkat; makalaka waaʼinmajüinjatüin tü wakuwaʼipakat suulia waaʼinrüin neʼe «tü kasa mojusü naaʼinrakat na manoujainsaliikana» (Jer. 17:9). Woonoo sümaa tü nümakat Pablo: «Anakaja müleka jiyaawatüle saaʼu tü jaaʼinrakat [...] süpüla jütüjaainjatüin saaʼu müleka shiimüinre [junoujüin]» (2 Cor. 13:5). Wekirajaapa sünain tü Wiwüliakat, eesü süpüla müin wanüiki: «¿Talatüsüche naaʼin Maleiwa sutuma tü kasa jülüjakat taaʼin otta tü keeʼireekat taaʼin?»

18, 19. ¿Jamüshii waʼyataainjanaka süchiirua wulein wakuwaʼipa otta waaʼinrüin tü kasa talatakalü atuma naaʼin Jeʼwaa?

¹⁸ Wanee kasa akaaliinjeenaka waya süpüla nnojoluin waaʼinrüin tü kasa naaʼinrakat na manoujüinsaliikana shia jülüjüle waaʼin tü nümakat Juan: «Tü nakuaippakat na manoujainsaliikana sümaa tü kasa mojusü keeʼireekat naaʼin, yüüʼülaa meerü soʼuweena wane kaʼi. Aluʼujasa chi wayuu aaʼinrakai tü nuluwataakat anain Maleiwa, ayateechi nümaa süpüla kaʼikat süpüshua» (1 Juan 2:17). Nnojo wooʼulaain nimeejüin waya Satanaa. Najaʼttireerü Maleiwa süpüshuaʼa tü kasa nuluwataakalü aaʼu chi Yolujaakai.

¹⁹ Naashin chi aluwataaushikai Pedro wuleinjatü watuma tü wakuwaʼipakat sümaʼinruʼu jülüjüin maʼin waaʼin tü nükaliakat Jeʼwaa, tü kaʼi najaʼttirajatkalü oʼu tü kasa mojusükat (2 Ped. 3:12, TNM). Alüʼütsiaaje maʼin tü kaʼi najaʼttirajatkalü oʼu Jeʼwaa tü kasa nuluwataakalü aaʼu Satanaa. Sümaʼinruʼu tia, ayateechi Satanaa sünain emeejaa wayuu süka tü kasa naaʼinrakat na manoujüinsaliikana maʼaka naainjüin süka Eva otta nüka Jesuu. Nnojo jülüjüin waaʼin tü keeʼireekat neʼe waaʼin wamüiwaʼa maʼaka saainjüin shia Eva. Waainjüle tia, meerü anakai saaʼin wamüin wamaleiwasein Satanaa. Jaʼitairü müin anakai saaʼin wamüin tü kasa niʼitaakat wapüleerua, wayoukta shia maʼaka niyouktüin shia Jesuu. Waʼyataa maʼin süchiirua wulein wakuwaʼipa otta waaʼinrüin tü kasa talatakalü atuma naaʼin Jeʼwaa.